1 Thessalonians 3

Ahirani (आहिराणी नवा करार) - No Year

← Chapter 2 Jump to: Chapter 4 →

1आखरी वर आमी तुमना पासून दूर नई राही सकनुत, एनासाठे आमनी निर्णय कर कि अथेनै शहर मा एखलाच ऱ्हाय जावूत.

2जव आमी तीमुथियुस ले जो ख्रिस्त नि सुवार्ता मा आमना भावू आणि परमेश्वर ना सेवक शे, तुमना जोळे एनासाठे धाळ कि तो तुमना धाळस वाळावो आणि ख्रिस्त वर पक्का विश्वास ठेवाना बारामा तुमनी मदत करो आणि तुमले उत्साहित करो कि तुमी कायम तेनावर विश्वास करत राहा.

3एनासाठे कि तुमना मधून कोणी बी ह्या क्लेशस्ना मुळे ख्रिस्त वर विश्वास करान नई सोळी देवो. कारण कि तुमले त माहिती शे कि ह्या प्रकार ना क्लेश परमेश्वर नि ईच्छा प्रमाणे आमना भाग शे.

4कारण कि जव आमी तुमना संगे होतुत, त आमी पहिलेच पासून तुमले सांगेल होतुत कि आमले क्लेश उचना पळतीन, आणि जस कि तुमाले माहिती बी शे कि असच हुयेल शे.

5ह्या मुळे मले आखो नई ऱ्हावायन, एनासाठे मनी तीमुथियुस ले तुमना विश्वास ना हाल देखा साठे धाळनु, कि कदी अस नई होवो कि सैतान तुमनी परीक्षा लीधी हो, आणि आमना पुरा कष्ट व्यर्थ हुईग्या हो.

6आते तीमुथियुस आमना जोळे परत ईजायेल शे, आणि तेनी आमले तुमना विश्वास आणि प्रेम ना बारामा सुवार्ता आयकाळेल शे. तेनी आमले सांगेल शे कि तुमी कायम प्रेम कण आमले आठवण करतस, आणि तुमी आमले परत देखानी अशा करतस, जसा आमी बी तुमले देखानी करतस.

7एनासाठे ओ विश्वासी भावूसहोण, आमी आपला पुरा दुख आणि क्लेश मा तुमना पक्का विश्वास ना विषय मा आयकीसन उत्साहित होतस.

8कारण कि आते कदी तुमी प्रभु मा पक्का ऱ्हाश्यात त हय आमना साठे नवा जीवन सारखा शे.

9आते आमी तुमना साठे आपला परमेश्वर ना उपस्थिती मा धन्यवाद करतस. तुमना मुळे आमले जो आनंद शे तेना साठे आमी परमेश्वर ले धन्यवाद देतस.

10परमेश्वर ना समोर आमी कायम प्रार्थना करत राहातस, कि आमी तुमना संगे भेटूत आणि ख्रिस्त येशु मा तुमना विश्वास वाळावामा तुमनी मदत करूत.

11आमी प्रार्थना करतस कि आमना परमेश्वर आणि बाप स्वताच आणि आमना प्रभु येशु, तुमना आठे येवा साठे आमनी पुढाकारी करो.

12आणि प्रभु असा करो कि जसा आमी तुमना वर प्रेम करतस, तसाच तुमना प्रेम बी आपस मा आणि सर्वा लोकस संगे वाळो, आणि प्रगती करत जावो.

13ह्या प्रमाणे प्रभु येशु त्या दिन लोंग, जव तो आपला सर्वा पवित्र लोकस संगे ईन, तव तुमना सर्वास्ना हृदय ले आमना बाप परमेश्वर ना समोर पवित्र आणि निर्दोष बनाईसन ठेवा. आमेन.

← Chapter 2 Jump to: Chapter 4 →