1 Thessalonians 5

Ahirani (आहिराणी नवा करार) - No Year

← Chapter 4 Jump to:

1पण ओ विश्वासी भावूसहोण, ह्या गोष्टी कवय होतीन तेना टाईम आणि कायस्ना बारामा तुमना जोळे काही लिखामा येवो एनी गरज नई शे.

2कारण कि तुमले चांगलच माहिती शे कि परमेश्वर ना दिन असा ईन जसा चोर रात ले येस.

3जव लोक सांगतीन, “सगळ काही शांत आणि सुरक्षित शे,” तव अचानक विनाश तेस्ना वर ईपळीन. ज्या प्रकारे बायतीन बाई वर पीडा येस तसाच हय अचानक हुईन, आणि लोक नई वाचाव.

4पण ओ विश्वासी भावूसहोण, तुमी अंधकार मा नई शेतस, कि प्रभु ना परत येवाना दिन तुमना वर चोर सारखा ईपळो.

5कारण कि तुमी सर्वा उजाया ना लोक शेतस आणि दिन ना लोक शेतस. आमी रात व अंधकार ना संतान नई शेतस.

6एनासाठे, आमी दुसरास्ना सारखा जपत नई ऱ्हावाले पाहिजे, पण जागत आणि सावधान राहाले पाहिजे.

7कारण कि ज्या लोक जपतस त्या रातलेच जपतस, आणि ज्या नशावाला राहतस, त्या रातलेच नशावान ऱ्हातस.

8पण आमी त दिन ना लोक शेतस, एनासाठे आमले स्वता वर काबू ठेवाले पायजे. आमी विश्वास आणि प्रेम नि झीलम घालीसन आणि तारण नि आशा ना टोप घालीसन सावधान राहा.

9परमेश्वर नि आमले तेना राग ना द्वारे दंडीत होवा साठे नई निवाळ, पण एनासाठे निवाळेल शे कि आमी आपला प्रभु येशु ख्रिस्त व्दारे तारण प्राप्त करूत.

10जो आमना साठे ह्या मुळे मरणा कि जव तो येवो त भले आमी जित्ता राहोत कि ख्रिस्त मा मरेल राहो, सर्वा मियसन तेनाच संगे कायम ना साठे जगसुत.

11एनामुळे एक दुसरास्ना प्रोत्साहन करा आणि एक दुसरा नि मदत करा, जसा कि तुमी आते बी करी ऱ्हायनात.

12ओ विश्वासी भावूसहोण, आमी तुमले विनंती करतस, कि ज्या तुमना मा परिश्रम करतस, प्रभु मा तुमना पुढारी शेतस, आणि ख्रिस्ती जीवन मा तुमले निर्देश देतस, तेस्ना आदर करा.

13आणि तुमना साठे तेस्ना काम ना मुळे प्रेम मा तेस्ले गैरा आदर करत राहा. आणि आपस मा मित्रभाव कण राहा.

14ओ विश्वासी भावूसहोण, आमी तुमले विनंती करतस कि ज्या चांगला नई वागतस तेस्ले जताळा, भित्रास्ले धाळस द्या, शक्तिहीनस्नि मदत करा, सर्वास संगे सहनशीलता दाखाळा.

15ध्यान द्या कि कोणी कोणा संगे वाईट ना बदला मा वाईट नई करो, पण कायम एक-दुसरा ना संगे आणि सर्वा लोकस संगे चांगल कराले आपला लक्ष बनाई ल्या.

16तुमी कायम खुश राहा.

17कायम प्रार्थना करत राहा.

18प्रत्येक गोष्टीस्मा परमेश्वर ना धन्यवाद करत राहा, कारण कि तुमना साठे ख्रिस्त येशु मा परमेश्वर नि हईच ईच्छा शे.

19पवित्र आत्मा ना कामस्ले मर्यादित नका करा.

20भविष्यद्वाणीस्ना तिरस्कार नका करा.

21सगळ्या गोष्टीस्ले परखा, आणि ज्या गोष्टी चांगल्या शे तेस्ले स्वीकार करा.

22आणि सगळ्या प्रकार ना वाईटस पासून वाचीसन राहा.

23शांती देणार परमेश्वर तुमले पुरा पवित्र करो, आणि तुमनी आत्मा, जीव आणि शरीर आमना प्रभु येशु ख्रिस्त ना येवा लगून पूर्णपणे निर्दोष आणि सुरक्षित राहो.

24तुमना बलावणार परमेश्वर विश्वास योग्य शे, आणि तो असाच करीन.

25ओ विश्वासी भावूसहोण, आमना साठे बी प्रार्थना करा.

26सर्वा विश्वासी भावूस्ले पवित्र प्रेम कण नमस्कार करा.

27मी तुमले प्रभु ना अधिकार कण आज्ञा देस कि हय पत्र सर्वा विश्वासीस्ले वाचीसन आयकाळा मा येवो.

28आमना प्रभु येशु ख्रिस्त नि कृपा तुमना वर होत राहो.

← Chapter 4 Jump to: