1 Kings 3

Balinese

1Ida Sang Prabu Salomo makanti sraya ring ida sang prabu ring Mesir, malantaran ida ngambil okan sang prabu Mesire kanggen rabi. Ida ngajak rabin idane punika ring Kota Daud, kantos ida puput ngwangun purin idane, Perhyangan miwah tembok panyengker kota Yerusaleme.

2Daweg Perhyangan Linggih Ida Sang Hyang Widi Wasa durung puput kawangun, rakyate kantun ngaturang aturan ring makudang-kudang genah sane matios-tiosan.

3Ida Sang Prabu Salomo astiti bakti ring Ida Sang Hyang Widi Wasa, tur satinut ring sapatitah ajin idane Sang Prabu Daud, nanging ida taler nampah wewalungan buat katurang ring pamorboran aturan sane matios-tiosan punika.

4Sedek rahina anu ida lunga ka Gibeon buat ngaturang aturan, santukan irika wenten genah maturan sane kalintang kasub. Irika ida ngaturang aturan maborbor panyatusan akehipun.

5Ring wengi punika Ida Sang Hyang Widi Wasa mapakantenang raga ring ida sajeroning panyumpenan. Ida Sang Hyang Widi Wasa mataken ring ida sapuniki: “Apa ane tunas kita teken Ulun?”

6Ida Sang Prabu Salomo tumuli matur, sapuniki: “Palungguh IRatu tan mari nyinahang sih pasuecan sane ageng ring parekan Palungguh IRatu bapan titiange Daud, tur ipun tansah malaksana ayu, subakti miwah jujur ring Palungguh IRatu. Samaliha Palungguh IRatu tan rered-rered nyinahang sih pasuecan Palungguh IRatu sane ageng punika ring ipun, malantaran Palungguh IRatu ngicen ipun pianak muani, sane ngentosin ipun mrentah ring rahinane puniki.

7Duh Ratu Sang Hyang Widi Wasa, Widin titiange, Palungguh IRatu sampun nglugrain titiang ngentosin bapan titiange madeg ratu, yadiastun titiang kantun kalintang wimuda, tur nenten uning ring paindikan mrentah.

8Sane mangkin titiang wenten ring pantaran bangsa sane sampun selik Palungguh IRatu buat dados druen Palungguh IRatu, inggih punika bangsa sane kalintang akeh, kantos tan keni antuk ngwilang.

9Duaning punika icenja titiang kawicaksanaan sane buatang titiang buat mrentah kaulan Palungguh IRatu antuk kadilan, samaliha mangda titiang mrasidayang maminayang paindikan sane becik miwah sane kaon. Yen tan kadi asapunika, sapunapi jagi antuk titiang mrasidayang mrentah bangsa druene sane ageng punika?”

10Ida Sang Hyang Widi Wasa ledang ring kayun santukan Sang Prabu Salomo nunas kawicaksanaan punika.

11Duaning punika Ida raris masabda sapuniki: “Sawireh kita nunas kawicaksanaan apang kita bisa mrentah saha adil, tur tusing nunas umur panjang wiadin kasugihan, wiadin apang musuh-musuh kitane mati,

12dadinne Ulun lakar ngisinin pinunas kitane. Ulun lakar ngicen kita kawicaksanaan muah pangresepan lebihan teken ane taen gelahanga baan anake ane maluan wiadin ane durian teken kita.

13Ulun masih lakar maicayang teken kita paundukan ane tusing tunas kita, nah ento sapanjang umur kitane, kita lakar muponin kasugihan muah kamulian lebihan teken ane kapuponin baan pararatune ane lenan.

14Buina yening kita satinut teken Ulun, tur ngamanggehang pidabdab muah titah Ulune, buka ane kalaksanayang baan bapan kitane Daud, Ulun lakar ngicen kita tuuh ane lantang.”

15Ida Sang Prabu Salomo tumuli matangi tur ida uning mungguing Ida Sang Hyang Widi Wasa sampun masabda ring ida sajeroning panyumpenan. Sasampune punika, ida raris lunga ka Yerusalem, tumuli ngadeg ring arepan Peti Prajanjian Ida Sang Hyang Widi Wasa, saha ngaturang aturan maborbor miwah aturan karahayuan ring Ida Sang Hyang Widi Wasa. Wusan punika ida raris namiu sawatek prakanggen idane makasami.

16Sedek rahina anu wenten anak luh panayang sareng kalih nangkil ring ajeng Ida Sang Prabu Salomo.

17Sane adiri matur ring ida sapuniki: “Duh ratu sang prabu, jadmane luh punika sareng-sareng dados aumah ring titiang. Risedek ipun sareng-sareng jumah titiang raris ngembasang rare muani adiri.

18Sasampun raren titiange matuuh kalih rahina, jadmane punika taler ngembasang rare muani adiri. Ring umahe punika wantah titiang ring ipun kewanten, nenten wenten malih anak sane lianan.

19Sasampune punika sedek rahina anu, rikalaning wengi pianakipune keni teteh ipun kantos rarenipune punika padem.

20Rikala wengi, sedekan titiang kantun pules, raren titiange raris ambil ipun saking pedeman titiange, raris genahang ipun ring pedemanipune tur raren ipune sane sampun padem punika genahang ipun ring pedeman titiange.

21Benjang semengipun, rikala titiang bangun jaga manyonyoin raren titiange, raris panggihin titiang raren titiange sampun padem. Rarene punika tumuli paekin tur telektekin titiang, raris panggihin titiang mungguing rarene punika boya pianak titiange.”

22Nanging anake luh sane malih adiri punika raris mabaos sapuniki: “Sing saja keto. Rarene ane idup ene pianak icange, tur ane mati ento pianak nyaine.” Anake luh sane kapangawit raris masaur sapuniki: “Singja keto. Rarene ane mati ento raren nyaine, tur ane idup ento raren icange.” Kadi asapunika ipun masogsag ring ajeng ida sang prabu.

23Ida Sang Prabu Salomo tumuli ngandika sapuniki: “Nyai suang-suang pada ngorahang mungguing rarene ane idup ento raren nyaine, muah rarene ane mati ento raren timpal nyaine.”

24Ida raris ngandikayang ngambil pedang, tur sasampune ida katurin pedang,

25ida ngandika sapuniki: “Tugelja rarene ane idup ento dadiang dadua laut serahang teken anake luh makadadua ento pada matugel.”

26Memen rarene sane sujati, manah ipune kabekin antuk katresnan ring pianak ipune, tumuli matur ring ida sang prabu sapuniki: “Duh ratu sang prabu, sampunangja pademanga rarene punika! Paicayangja rarene punika ring jadmane luh punika!” Nanging jadmane luh sane lianan tumuli matur sapuniki: “Sampunangja rarene punika paicayanga ring titiang salah tunggil. Rarisangja getep ipun dados kalih.”

27Sasampune punika Ida Sang Prabu Salomo raris ngandika sapuniki: “Buungang ngamatiang rarene ento. Serahang rarene ento teken anake luh ane pangawit, sawireh ia memen rarene ento ane sasajaane.”

28Rikala bangsa Israele miragi indik kaputusan Ida Sang Prabu Salomo punika, ipun sareng sami pada banget pisan ngajiang ida, santukan ipun uning mungguing Ida Sang Hyang Widi Wasa sampun ngicen ida kawicaksanaan buat nepasin wicara saha adil.

← Chapter 2 Chapter 4 →