Ezekiel 48

Balinese

1Bates kajan tanahe ento ngawit uli Segara Tengah laut nganginang ka kota Hetlon, ka margane ane ka Hamat, ka Hasar-Enon laut ka bates ane di selagan kaprabon Damsike muah Hamate. Asing-asing suku patut maan tanah abagian, ane nglajur uli batese ane bedangin ngauhang neked ka Segara Tengah. Dumannyane ento, meped uli kaja ngelodang kene:

7Suku Ruben. Suku Yehuda.

8Bagian tanah ane lenan patut kanehang buat kaperluan-kaperluan ane istimewa. Dawan tanahe ane kanehang ento roras atengah kilometer muah bawakne masih asah amonto, nglajur uli kangin ngauhang, patuh buka duman tanah ane kaserahang teken parasuku bangsane. Perhyangan Agunge lakar ada di bagian tanahe ene.

9Di basan tengah bagian tanahe ene, patut kanehang pakarangan ane dawanne roras tengah kilometer muah bawakne dasa kilometer, buat katurang teken Ida Sang Hyang Widi Wasa.

10Parapanditane patut maan duman uli pakarangan ane suci ene. Dumannyane ento kasikut uli kangin ngauhang dawanne roras atengah kilometer muah uli kaja ngelodang limang kilometer. Perhyangan Agung Ida Sang Hyang Widi Wasa ada di basan tengah pakarangane ene.

11Pakarangan ane suci ene, kasediaang pabuat parapandita katurunan Sadoke. Ia suba saking satia tuu ngayahin Ulun, tur tusing bareng-bareng teken wong Israele lenan sajeroning nglaksanayang paundukan ane pelih buka ane kalaksanayang baan suku Lewine ane lenan.

12Ento awanane ia patut maan pakarangan ane istimewa, di samping pakarangan ane kagelah baan suku Lewine, tur pakarangane ento lakar dadi pakarangan ane paling sucine.

13Wong Lewine masih patut maan pakarangan istimewa, bedelod duman parapanditane ento. Dawanne masih patuh roras atengah kilometer uli kangin ngauhang muah limang kilometer uli kaja ngelodang.

14Pakarangan ane katurang di ayun Ida Sang Hyang Widi Wasa ento bagian tanah ane paling melaha, tur tanahe ento tusing pesan dadi adep wiadin silurin wiadin serahang teken anak len. Pakarangane ento suci tur dadi druen Ida Sang Hyang Widi Wasa.

15Sisan pakarangan ane istimewa, ane dawanne roras atengah kilometer, muah bawakne duang kilometer atengah, ento tusingja suci, nanging dadi anggon kaperluan rakyate ane biasa. Rakyate dadi nongos ditu tur ngarap tanahe ento. Kotane patut ada di basan tengah tanahe ento,

16tur kotane ento patut mrepat, ane dawan sisinne suang-suang 2.250 meter.

17Kotane ento kiter di bilang sampingne baan tanah lapang ane linggahne 125 meter.

18Tanah sisan tegak kotane ento, ane delod pakarangan ane suci ento pesan, sisi kanginne limang kilometer nglawan duang kilometer atengah, muah sisi kauhne limang kilometer nglawan duang kilometer atengah, patut kanggon tanah garapan baan rakyate ane nongos di kota.

19Nyenja ane nongos di kota, yadian uli suku bangsa ane encenja kawitnyane, ia dadi ngarapa tanahe ento.

20Dadinne linggah tanahe ane di bagian tengah ane kanehang ento, roras atengah kilometer mrepat, neked kayang ka tegak kotane.

21Sisan tanahe bedangin muah bedauh tanahe ane dadi tongos Perhyangan Agunge, duman tanah parapanditane, duman tanah parawong Lewine muah tegak kotane, ento dadi gelah sang prabu. Tanahe ento nglajur nganginang kanti teked di batese bedangin, muah ngauhang kanti neked ka Segara Tengah, tur kajanne kabatesin baan tanah duman suku Yehudane muah kelodne kabatesin baan tanah duman Benyamine.

23Delod tanahe ane kanehang ento, ditu suku-suku bangsane ane tonden maan duman, pada maan tanah, nglajur uli bedangin ngauhang neked ka Segara Tengah. Tegak duman tanahe, meped uli kaja ngelodang kene: Suku Benyamin. Suku Simeon. Suku Isakar. Suku Sebulon. Suku Gad.

28Sisi kelod tanah duman suku Gade, batesne ngelod kauhang uli Tamar neked ka yeh klebutan Meribane ane di Kades. Uli ditu laut ngaja kauhang nuluh bates gumi Mesire kanti neked ka Segara Tengah.

29“Keto patut caranne ngedum tanahe ento, dadi bagian-bagian buat cecatun suku-suku bangsa Israele.” Kadi asapunika sabdan Ida Sang Hyang Widi Wasa Sane Maha Luur.

30Wenten gapura roras akehipun buah jaga ngranjing ka kota Yerusalem. Asing-asing tembok sane panjangipun 2.250 meter madaging gapura tetiga. Asing-asing gapurane punika maderbe wasta suku-suku bangsane suang-suang. Gapura sane ring temboke baler, kawastanin Ruben, Yehuda miwah Lewi. Sane ring temboke bedangin kawastanin Yusup, Benyamin miwah Dan. Sane ring temboke bedelod kawastanin: Simeon, Isakar miwah Sebulon. Sane ring temboke bedauh, kawastanin Gad, Aser miwah Naptali.

35Panjang tembok kotane punika makaileh wenten sia tali meter. Wastan kotane punika ngawit saking mangkin ngantos sapanglanturipun inggih punika: “Ida Sang Hyang Widi Wasa malinggih iriki”.