Psalms 137

Balinese

1Titiang negak ring sisin-sisin tukade ring Babel. Irika titiang ngeling rikalaning titiang eling ring Sion.

2Titiang ngantungang rebab-rebab titiange ring carang-carang tarune sane wenten irika.

3Jadmane sane nawan titiang ngenken titiang makidung, ipun ngenken titiang nglipur ipun, sapuniki baosipune: “Kidungangja buat idewek kidung unduk Sione.”

4Sapunapi antuk titiang ngidungang kidung pabuat Ida Sang Hyang Widi Wasa ring jagat sunantarane.

5Oduh Yerusalem dumadak mangda titiang nenten naenin malih mrasidayang nyuarayang rebab, yening titiang engsap ring ragane.

6Dumadak mangda titiang nenten naenin mrasidayang makidung, yening titiang nenten eling ring ragane, yening ragane nenten dadosang titiang kabungahan titiange sane pinih ageng!

7Duh Ratu Sang Hyang Widi Wasa, elingangja paindikan sane kalaksanayang antuk wong Edome, rikalaning kota Yerusaleme kakaonang. Elingangja baosipune sane kadi asapuniki: “Uugangja apang kanti asah teken tanahe.”

8Ih Babel, iba bakal kuugang. Bagia anake ane ngwales teken iba paundukan ane suba laksanayang iba teken kai,

9ane nyuang rare-raren ibane tur mantigang rare-rarene ento di batu kaange.

← Chapter 136 Chapter 138 →