Psalms 140

Balinese

1Duh Ratu Sang Hyang Widi Wasa, luputangja titiang saking jadmane sane dursila. Luputangja titiang saking jadmane nyapa kadi aku.

2Ipun setata ngrincikang paindikan-paindikan sane dursila, tur setata ipun ngardi ieg.

3Layahipune waluya sakadi ula sndi tur baos ipune tan bina sakadi upas ula polenge.

4Duh Ratu Sang Hyang Widi Wasa, sayubinja titiang saking kakuasaan jadmane dursila. Luputangja titiang saking jadmane sane nyapa kadi aku, sane sigum jaga nyelekang titiang.

5Jadmane sane sumbung masang jeet pabuat titiang. Ipun sampun masang santeb, tur sapanjang margi ipun sampun masang jeet buat ngejuk titiang.

6Titiang matur ring Ida Sang Hyang Widi Wasa sapuniki: “Palungguh IRatu punika Widin titiange.” Duh Ratu Sang Hyang Widi Wasa, pirengangja pinunas ican titiange, buat nunas pitulungan.

7Duh Ratu Sang Hyang Widi Wasa, Widin titiange, patindih titiange sane kukuh bakuh. Palungguh IRatu sampun nyayubin titiang ring payudan.

8Duh Ratu Sang Hyang Widi Wasa sampunangja dagingina paindikane sane kadotang antuk jadmane sane dursila. Sampunangja lugraina paiguman ipune sida karya.

9Sampunangja icena meseh-meseh titiange menang. Dadosangja sakancan rencananipune marep ring titiang mangda mawali nibenin ipun.

10Dumadak mangda ipun katepen antuk baa sane ngendih murub, tur dumadak mangda ipun kentungang ka bangbange tur nenten mrasidayang malih medal saking irika.

11Dumadak sakancan anake sane saking bobab nalih timpalnyane nenten jaga sida karya. Dumadak mangda jadmane sane nyapa kadi aku kuber tur kasirnayang antuk kajaatannyane.

12Duh Ratu Sang Hyang Widi Wasa, titiang uning mungguing Palungguh IRatu matindih ring wicaran jadmane sane tiwas-tiwas miwah mapaica kadilan ring jadmane sane kakirangan.

13Sujatinipun jadmane sane patut jaga muji Palungguh IRatu, tur ipun jaga urip ring ayun palungguh IRatu.

← Chapter 139 Chapter 141 →