Psalms 142

Balinese

1Titiang nunas ica ring Ida Sang Hyang Widi Wasa, buat nunas pitulungan. Titiang nguningayang paindikan titiange ring Ida.

2Titiang ngaturang sakancan kaberatan titiange ring Ida, tur titiang nguningayang sakancan kamewehan titiange ring Ida.

3Rikala titiang sedia jaga suksrah, Ida wikan punapi sane pacang laksanayang titiang. Ring margine sane marginin titiang, meseh-meseh titiange sampun masang jeet pabuat titiang.

4Rikala titiang matolihan ka samping, nenten wenten panggihin titiang jadma sane jaga nulungin titiang, tur nenten wenten anak sane jaga nyayubin titiang samaliha nenten wenten anak sane lingu ring titiang.

5Duh Ratu Sang Hyang Widi Wasa, titiang masesambatan nunas pitulungan ring Palungguh IRatu. Duh Ratu Sang Hyang Widi Wasa, Palungguh IRatu punika pasayuban titiange. Wantah Palungguh IRatu ngraga sane andelang titiang sajeroning urip titiange puniki.

6Pirengangja sesambatan titiange nunas pitulungan, santukan titiang sampun nenten madue pangajap-ajap malih. Luputangja titiang saking meseh-meseh titiange, duaning ipun kalintang kuat bandingang ring titiang.

7Bebasangja titiang saking kamewehan titiange, kenginan titiang jaga muji Palungguh IRatu ring pauman parakaulan Palungguh IRatune, malantaran sih pasuecan Palungguh IRatune ring titiang.

← Chapter 141 Chapter 143 →