Psalms 33

Balinese

1Sawatek semeton sane patut, pada masuryakja masuka rena malantaran paindikan sane sampun kakardi antuk Ida Sang Hyang Widi Wasa. Pujija Ida, ih parasemeton sane astiti bakti ring Ida.

2Aturangja panyuksma ring Ida Sang Hyang Widi Wasa antuk rebab, tur makidungja pabuat Ida kadulurin antuk suaran gambus.

3Kidungangja kidung sane anyar pabuat Ida, tur suarayangja rebabe mangda becik tur masuryakja saha liang.

4Sabdan Ida Sang Hyang Widi Wasa sujati patut, tur sakancan pakaryan Idane nyandang kandelang.

5Ida Sang Hyang Widi Wasa asih sueca ring paindikan sane patut miwah adil. Sih pasuecan Idane sane tan rered-rered ngebekin jagate.

6Ida Sang Hyang Widi Wasa ngardi akasane antuk titah Idane, tur surya, candra miwah bintang-bintang antuk sabdan Idane.

7Ida munduhang toyan segarane ring genahe asiki, tur Ida ngancing sawang samudrane ring genah panyimpenannya.

8Ih sawatek sane wenten ring jagate, pada ajerihja ring Ida Sang Hyang Widi Wasa! Luihangja Ida, ih parajadma ring jagate sami!

9Rikala Ida masabda, jagate raris wenten, tur malantaran titah Idane raris metu saananing sane wenten.

10Ida Sang Hyang Widi Wasa ngurungang tetujon bangsa-bangsane, tur Ida ngandeg ipun mangda nenten mrasidayang nglaksanayang rencananipune.

11Nanging rencanan Idane mamargi salami-laminipun, tur tetujon Idane kasidan sakayang-kayang.

12Bagia bangsane sane Widinnyane punika Ida Sang Hyang Widi Wasa miwah bagia rakyate sane sampun kaselik dados druen Idane.

13Ida Sang Hyang Widi Wasa macingak saking suargan tur ngaksi sakancan manusane.

14Saking singasanan Idane Ida macingak ring sakancan sane urip ring mrecapada.

15Ida nabdab sakancan pepinehipune, tur wikan ring sakancan laksananipune.

16Ida sang prabu nenten molih kamenangan malantaran kawisesan wadua balan idane sane wisesa miwah prajurite nentenja molih ring rana malantaran kasitenganipune.

17Kuda perange punika tan paguna buat ngulati kamenangan miwah kasitenganipune sane ageng nenten mrasidayang ngrahayuang.

18Ida Sang Hyang Widi Wasa nyaga jadmane sane astiti bakti ring Ida, inggih punika sakancan jadmane sane suksrah ring sih pasuecan Idane sane nenten rered-rered.

19Ida ngluputang ipun saking baya pati miwah matiningin uripipune rikalaning masan sayah.

20Iraga ngajap-ajap Ida Sang Hyang Widi Wasa, santukan Ida punika pasayuban miwah pitulungan iragane.

21Iraga marasa bungah ring manah malantaran Ida, tur iraga suksrah ring parab Idane sane suci.

22Duh Ratu Sang Hyang Widi Wasa, dumadakja sih pasuecan Palungguh IRatu sane nenten rered-rered punika wenten ring titiang, sakadi pangajap-ajap titiange ring Palungguh IRatu.

← Chapter 32 Chapter 34 →