bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Balinese
/
Balinese
/
Psalms 35
Psalms 35
Balinese
1
Duh Ratu Sang Hyang Widi Wasa lawanja jadmane sane nglawan titiang, tur yudainja jadmane sane nyiatin titiang.
2
Ambilja tameng miwah kawaca besi druene, tur rarisangja rauh ngluputang titiang.
3
Amengangja tumbak miwah kapak druene nglawan jadmane sane nguber titiang. Nikayangja ring titiang mungguing Palungguh IRatu jaga ngrahayuang titiang.
4
Dumadakja jadmane sane mamanah ngamademang titiang kaon, tur nandang kimud. Dumadakja jadmane sane mapiguman jaga nglawan titiang pada mabalik tur paling.
5
Dumadakja ipun sakadi gumpang sane ampehang angin, rikala malaekat Ida Sang Hyang Widi Wasa nguber ipun.
6
Dumadak marginipune peteng dedet tur belig, rikala malaekat Ida Sang Hyang Widi Wasa nglempag ipun.
7
Tan pakrana ipun masang jeet pabuat titiang, tur makarya bangbang dalem buat ngejuk titiang.
8
Nanging kasinangkaonan jaga nibenin ipun, sadurung ipun tangeh ring indike punika. Ipun jaga kajeet antuk jeetipune niri, tur labuh ring kasinangkaonanipune!
9
Irika titiang jaga rumasa liang malantaran Ida Sang Hyang Widi Wasa, titiang jaga rumasa bagia santukan Ida ngrahayuang titiang.
10
Saking saguluking manah titiang jaga matur ring Ida Sang Hyang Widi Wasa sapuniki: “Tan wenten sane nyamenin Palungguh IRatu. Palungguh IRatu nyayubin jadmane sane tiwas saking sane nindes.”
11
Jadmane sane corah pada dados saksi nglawan titiang, tur nalih titiang nglaksanayang kajaatan sane nenten uningin titiang.
12
Ipun ngwales kabecikan titiange antuk kacorahan, tur titiang kaliput antuk manah sane putus asa.
13
Nanging rikala ipun katempuh antuk pinakit, titiang ngrangsuk pangangge kaduhkitan titiange, tur ngenta dewek titiange. Titiang sumungkem ngastawa,
14
tan bina sakadi titiang ngastawa buat salah tunggal timpal wiadin nyaman titiange muani. Titiang mamargi milehan sajeroning nandang duhkita sakadi anak nandang duhkita malantaran katinggal padem antuk memenipune.
15
Nanging yening titiang katempuh antuk kamewehan, ipun sareng sami pada liang, sarwi mapunduh ngiter tur minjulin titiang. Wong sunantara pada nglempag titiang tur tan mari ngebug titiang.
16
Sakadi anake sane minjulin anak perot, ipun nelik ring titiang duaning rumasa geting.
17
Duh Ratu Sang Hyang Widi Wasa, malih amunapike suenipun Palungguh IRatu jaga wantah macingak kewanten. Luputangja titiang saking gegebugipune. Luputangja urip titiang saking singa-singane punika!
18
Irika titiang jaga matur panyuksma ring ayun Palungguh IRatu sajeroning paruman kaulan Palungguh IRatune. Titiang jaga muji Palungguh IRatu ring arepanipune sareng sami.
19
Sampunangja lugraina meseh-meseh titiange inggih punika jadmane sane bobab-bobab punika rumasa liang ring manah ngeton kakaonan titiange. Sampunangja banggayanga jadmane sane tan pakrana geting ring titiang punika, kenyir-kenyir sajeroning kaliangan ngeton kasedihan titiange.
20
Ipun nenten mabaos nganggen rasa pasawitran, nanging ipun munduhang sakancan paindikan sane bobab ngeniang indik jadmane sane demen ngulati dame.
21
Ipun nalih titiang, sarwi masuryak sapuniki: “Tiang suba nepukin unduk ane laksanayang jerone.”
22
Nanging Palungguh IRatu sampun ngaksi paindikane puniki duh Ratu Sang Hyang Widi Wasa. Sampunangja Palungguh IRatu meneng, duh Ratu Panembahan. Sampunangja Palungguh IRatu kantun ngedoh saking titiang.
23
Duh Ratu Sang Hyang Widi Wasa, rarisangja matangi tur tindihinja titiang. Rarisang matangi duh Ratu Widin titiange, tur belaninja wicaran titiange.
24
Duh Ratu Sang Hyang Widi Wasa, Palungguh IRatu maraga adil. Duaning punika sinahangja mungguing titiang tan paiwang. Sampunang banggayanga meseh-meseh titiang rumasa liang manggihin titiang.
25
Sampunangja banggayanga ipun mabaos ring pantaranipune kadi asapuniki: “Iraga suba masmi ia! Tuah ento ane edotang iraga!”
26
Dumadakja jadmane sane rumasa liang ngeton kasangsaran titiange, mangda ipun kaon pisan tur pada bingung. Dumadak jadmane sane mamanah dados becikan ring titiang mangda kaliput antuk kimud miwah kacemeran.
27
Dumadak jadmane sane mamanah manggihin titiang kapatutang, pada masuryak kagirangan tur mawali-wali mabaos kadi asapuniki: “Ambate agungne Ida Sang Hyang Widi Wasa! Ida ledang nyingak kaulan Idane sane labda karya.”
28
Irika titiang jaga nglumbrahang kadilan Palungguh IRatune, tur titiang jaga muji Palungguh IRatu sapanjang rahina.
← Chapter 34
Chapter 36 →