Psalms 46

Balinese

1Ida Sang Hyang Widi Wasa dados pasayuban miwah kakuatan iragane. Ida setata nulungin iraga sajeroning iraga nemu kakewehan.

2Duaning punika iraga nenten jaga ajerih, yadiastun jagate puniki magejeran miwah gunung-gununge pada maclempung ka sawang samudrane,

3yadiastun segarane jaga makuug tur ngrubeda miwah bukit-bukite pada magejeran antuk kawirosannyane.

4Wenten tukad membah sane mamuat kaliangan ngungsi kotan Ida Sang Hyang Widi Wasa, ka purin Ida Sane Maha Luur Sane Suci.

5Ida Sang Hyang Widi Wasa wenten ring kotane punika, tur kotane punika nenten naenin pacang sirna. Pasemengan pisan Ida jaga rauh mapaica pitulungan.

6Parabangsane pada jejeh ngetor, tur sakancan kaprabone pada magejeran. Ida Sang Hyang Widi Wasa makuug tur pretiwine jaga nyag ajur.

7Ida Sang Hyang Widi Wasa Sane Maha Wisesa nyarengin. Widin Dane Yakub dados pasayuban iragane.

8Mrikija cingakin paindikan sane sampun kakardi antuk Ida Sang Hyang Widi Wasa. Cingakinja paindikan sane kalintang ngangobin sane sampun kardi Ida ring mrecapada.

9Ida ngrarianang sakancan yudane ring sakuub jagate sami. Ida ngelung sakancan panahe miwah nyirnayang sakancan tumbake, saha nunjel tamenge sami.

10Ida ngandika sapuniki: “Suudja masiat, iba pada nawang mungguing Ulun ene Widi, ane ngwengku parabangsane muah murbeng rat.”

11Ida Sang Hyang Widi Wasa Sane Maha Kuasa nyarengin iraga. Widin Dane Yakube dados pasayuban iragane.

← Chapter 45 Chapter 47 →