Psalms 62

Balinese

1Saking sabar titiang nyantosang Ida Sang Hyang Widi Wasa buat ngrahayuang titiang. Titiang wantah nyleleg ring Ida ngraga.

2Ida ngraga sane nyayubin miwah ngrahayuang titiang. Ida sane makadados patindih titiange, tur titiang nenten jaga naenin kaon.

3Malih amunapike suenipun jerone sareng sami jaga nglawan anake sane kakuatanipune nenten lebihan bandingang ring pagehane sane uug?

4Jerone wantah mamanah jaga nyurudang ipun saking genahipune sane luih. Jerone seneng ring paindikan sane bobab. Jerone maucap-ucap nunasang merta, nanging ring tengah pakayunan jerone, jerone nemah anake punika.

5Titiang nyleleg wantah ring Ida Sang Hyang Widi Wasa ngraga. Titiang wantah ngajap-ajap ring Ida kewanten.

6Ida ngraga sane nyayubin miwah ngrahayuang titiang. Ida sane makadados patindih titiange, tur titiang nenten pacang naenin kaon.

7Karahayuan miwah kaluihan titiange gumantung ring Ida Sang Hyang Widi Wasa. Ida makadados pasayuban titiange sane kukuh. Ida dados genah titiange masayuban.

8Ih bangsan titiange, suksrahja ring Ida Sang Hyang Widi Wasa salami-laminipun. Aturangja sakancan kamewehan semetone ring Ida, santukan Ida dados pasayuban iragane.

9Manusane makasami waluya sakadi angkihane akeplisan. Agung miwah alit sami pateh tan paguna. Indayangja genahang ipun ring panimbangane, sinah nenten wenten bobotipun. Ipun inganan bandingang ring angine.

10Sampunangja semeton ngandelang kawirosan, tur sampunangja ngajap-ajap molihing gae ulihan ngrampok. Yadiastun kasugihan semetone sayan maweweh-weweh, sampunangja semeton gumantung ring kasugihane punika.

11Langkungan ring apisan titiang sampun miragi Ida Sang Hyang Widi Wasa masabda, mungguing kawisesane punika druen Idane.

12Samaliha sih pasuecan Idane nenten rered-rered. Duh Ratu Sang Hyang Widi Wasa, ledang Palungguh IRatu ngraga mapaica pikolih ring jadmane sami, manut laksananipune suang-suang.

← Chapter 61 Chapter 63 →