Psalms 68

Balinese

1Ida Sang Hyang Widi Wasa matangi tur nyambehang meseh-meseh Idane. Jadmane sane geting ring Ida sami pada kaon tur jerih kapilayu.

2Sakadi anduse malepuk raris sirna, kadi asapuniki Ida ngampehang ipun. Sakadi liline nyag ring arepan genine, kadi asapunika taler jadmane dursila winasa ring ajeng Ida Sang Hyang Widi Wasa.

3Nanging jadmane sane patut pada liang miwah masuka rena ring ayun Idane. Ipun pada bagia miwah masuryak-suryak kabatek antuk liangipune.

4Makidungja buat Ida Sang Hyang Widi Wasa, makidungja muji parab Idane. Cawisangja margine pabuat Ida mamargi ring duur ambune. Parab Idane punika Ida Sang Hyang Widi Wasa. Pada liangja ring ayun Idane!

5Ida Sang Hyang Widi Wasa sane jumeneng ring Perhyangan Agung Idane. Ida matiningin anake ubuh miwah nyayubin anake balu-balu.

6Ida mapaica umah ring anake sane nglisting buat dados genahipune, tur mebasang anake mapangkeng buat muponin kaliangan sajeroning kabebasan. Nanging soroh pembrontake jaga kagenahang ring tanahe sane suung.

7Duh Ratu Sang Hyang Widi Wasa, rikala Palungguh IRatu nuntun kaula druene, tur rikala Palungguh IRatu mamargi nglintangin tegal melakange,

8jagate magejeran tur akasane nedunang sabeh, santukan Ida Sang Hyang Widi Wasa, Widin Gunung Sinaine miwah Widin Israele rauh.

9Palungguh IRatu nedunang sabeh bales pisan miwah mecikang malih tanah druene sane sampun berag.

10Irika kaulan Palungguh IRatune pada ngwangun cecanggahanipune. Malantaran kabecikan Palungguh IRatu, Palungguh IRatu nyawisang kabuatan jadmane sane tiwas-tiwas.

11Ida Sang Hyang Widi Wasa mapaica pituduh, mawinan akeh paraistri pada mamuat orti kadi asapuniki:

12“Pararatu miwah wadua balan idane pada jerih kapilayu.” Paraistri sane jumah pada ngedum jejarahan, inggih punika:

13pepindan paksi darane sane malapis antuk perak miwah kampid-kampidnyane kakaput antuk mas sane ngreneb. (Napi awinannya makudang-kudang diri saking pantaran ragane kantun pada ngoyong ring badan biri-birine daweg rahina payudane punika!)

14Rikala Ida Sang Hyang Widi Wasa Sane Maha Wisesa nyambehang pararatune ring Gunung Salmon, Ida nedunang salju irika.

15Ambate wisesan Gunung Basane, gunung sane mamuncuk akeh.

16Napi awinannyane saking muncuk-muncuk ragane sane mawisesa punika ragane nganistayang gunung sane kaselik antuk Ida Sang Hyang Widi Wasa buat dados linggih Idane? Ida Sang Hyang Widi Wasa jaga malinggih irika ngantos salami-laminipune.

17Ida Sang Hyang Widi Wasa rauh saking Sinai ngranjing ka genah Idane sane suci, kairing antuk panyiu-nyiuan kretan Idane sane mawisesa.

18Ida munggah ka genah sane luur, saha makta tawanan akeh pisan. Ida nrima aturan saking jadmane sane brontak. Ida Sang Hyang Widi Wasa jaga malinggih irika.

19Pujija Ida Sang Hyang Widi Wasa, sane negen tetegenan iragane nyabran rahina. Ida punika Widi sane ngrahayuang iraga.

20Widin iragane punika Widi sane ngrahayuang. Ida punika Ida Sang Hyang Widi Wasa. Widin iragane sane ngluputang iraga saking sang pati.

21Ida Sang Hyang Widi Wasa janten pacang ngencak tenggek meseh-meseh Idane, inggih punika tenggek jadmane sane kukuh malaksana dosa.

22Ida Sang Hyang Widi Wasa sampun masabda sapuniki: “Ulun lakar ngaba musuh-musuh kitane malipetan uli Basan. Ulun lakar ngaba ia malipetan uli di sawang pasihe,

23apanga kita nyidayang maceleban sig getihnyane muah cicing-cicing kitane nyidayang nginem getihnyane sakita karepnyane.”

24Duh Ratu Sang Hyang Widi Wasa, kamenangan Palungguh IRatu sampun kapanggihin antuk jadmane sami, inggih punika peedan Ida Sang Hyang Widi Wasa ratun titiange ka genah Idane sane suci.

25Juru kidunge mamargi ring ajeng, tur juru tabuhe magenah ring ungkur, ring tengah-tengahnyane paradaane sane nabuh rebab.

26“Pujija Ida Sang Hyang Widi Wasa sajeroning pauman kaulan Idane. Ih parakaturunan Dane Yakub, pujija Ida Sang Hyang Widi Wasa!”

27Suku Benyamin suku sane pinih alita mamargi pinih riin, wusan punika raris parapamimpin Yehudane kasarengin antuk rombongan danene, raris kairing antuk parapamimpin Sebulon miwah Naptaline.

28Duh Ratu Sang Hyang Widi Wasa, sinahangja kawisesan Palungguh IRatune, inggih punika kawisesan sane sampun gunayang Palungguh IRatu pabuat titiang,

29saking Perhyangan Agung Palungguh IRatune ring Yerusalem, ring genah pararatune ngaturang aturan ring ayun Palungguh IRatu.

30Dukainja jagat Mesire, inggih punika sato alas sane ring ambengane punika. Dukainja bangsa-bangsane, sane ngangonang banteng miwah godel-godelnyane, ngantos ipun sareng sami pada sumungkem tur ngaturang perak ipune ring ayun Palungguh IRatu. Sambehangja bangsa-bangsane sane demen ngardi yuda.

31Parautusane pacang rauh saking Mesir, tur wong Sudane pacang nyakupang liman ipune ngastawa ring Ida Sang Hyang Widi Wasa.

32Duh parakaprabon jagate sami, makidungja muji Ida Sang Hyang Widi Wasa. Pujija Ida Sang Panembahan.

33Pujija Ida sane mamargi ring ambarane, ring langite sane nguni. Piragiangja sabdan Idane, Ida masabda antuk kerug sane mawisesa.

34Lumbrahangja kawisesan Ida Sang Hyang Widi Wasa, duaning kagungan Idane nguub wong Israele, tur kawisesan Idane nguub langit.

35Ambate luih Ida Sang Hyang Widi Wasa, Widin Israele, rikala Ida rauh saking linggih Idane sane suci. Ida mapaica kakuatan miwah kawisesan ring kaulan Idane. Pujija Ida Sang Hyang Widi Wasa!

← Chapter 67 Chapter 69 →