bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Balinese
/
Balinese
/
Psalms 78
Psalms 78
Balinese
1
Duh bangsan tiange, pirengangja paurukan tiange, tur linguangja baos tiange.
2
Tiang jaga ngunayang baos sane wicaksana, miwah jaga nerangang pepingitan sane saking nguni-nguni.
3
Paindikan sane sampun piragi miwah uningin iraga, inggih punika paindikan sane sampun katuturang antuk wong tuan iragane ring iraga.
4
Iraga nenten jaga ngengkebang indike punika ring pianak-pianak iragane. Iraga taler jaga nuturang ring katurunan sane jaga rauh, indik kawisesan Ida Sang Hyang Widi Wasa miwah pakaryan-pakaryan Idane sane ageng, saha paindikan-paindikan sane luih sane sampun kardi Ida.
5
Ida sampun mapaica pidabdab ring bangsa Israel miwah pituduh-pituduh ring katurunan Dane Yakub. Ida nitahang leluur iragane mangda ngurukang pidabdab-pidabdab Idane ring pianak-pianaknyane,
6
mangda katurunan sane jaga rauh mrasidayang mlajahin pidabdab-pidabdabe punika, tur sapanglanturnyane, ipun patut nuturang ring pianak-pianaknyane.
7
Mangda malantaran sakadi asapunika ipun taler suksrah ring Ida Sang Hyang Widi Wasa, tur nenten lali ring paindikan sane sampun kardi Ida, nanging tansah sairing ring pituduh-pituduh Idane.
8
Mangda sampunang ipun sakadi leluurnyane, inggih punika bangsa sane sampun brontak miwah tungkas, tur nenten naenin seken suksrah ring Ida Sang Hyang Widi Wasa miwah nenten satia tuu ring Ida.
9
Suku Epraim, sane masanjata panah, sami pada ajerih kapilayu ring payudan.
10
Ipun nenten ngamanggehang prajanjianipune ring Ida Sang Hyang Widi Wasa, tur ipun nenten nyak ninutin pidabdab Idane.
11
Ipun lali ring paindikan sane sampun kardi Ida, inggih punika katawahan sane sampun panggihin ipun.
12
Ring ajeng paraleluurnyane, Ida Sang Hyang Widi Wasa ngardi katawahan-katawahan, ring tegal Soane ring tanah Mesir.
13
Ida nyibak segarane tur ngajak ipun nglintangin segarane punika. Ida ngawinang toyan segarane nyeleg sakadi tembok.
14
Rikalaning rahina Ida nuntun ipun antuk ambun, tur rikalaning wengi antuk cayaning geni.
15
Ring tegal melakange Ida nyibak bukit batu, tur mapaica toya maliah-liah ring ipun sareng sami sakadi toyan sawang segarane.
16
Ida ngawinang wenten tlabah medal saking gunung batune, tur ngawinang wenten toya membah sakadi tukad.
17
Nangingke ipun ngraris ngardi dosa pamantuka ring Ida Sang Hyang Widi Wasa, tur ring tegal melakange ipun brontak nglawan Ida Sane Maha Luur.
18
Ipun nyelapang mintonin Ida Sang Hyang Widi Wasa, malantaran ipun nunas pangan kinum sane dotang ipun.
19
Ipun mabaos marep ring Ida Sang Hyang Widi Wasa asapuniki: “Apake Ida Sang Hyang Widi Wasa nyidayang mapaica pangan kinum di tegal melakange?
20
Saja tuah Ida manteg bukit batu, laut pesu yeh membah suluk pesan, nanging apake Ida nyidayang masih ngicen iraga roti muah be?”
21
Duaning punika Ida Sang Hyang Widi Wasa tumuli duka pisan duk Ida mirengang baosnyane kadi asapunika. Ida ngeseng kaulan Idane antuk geni, tur pidukan Idane ring ipun sayan ngagengang,
22
santukan ipun nenten pracaya ring Ida, tur nenten pracaya mungguing Ida jaga ngrahayuang ipun.
23
Nanging Ida raris ngandika ring langite baduur, tur mrentahang mangda ipun ngampakang jelananipune.
24
Ida mapaica ring ipun sareng sami gandum saking suargan, malantaran Ida nedunang manna buat dados panganipune.
25
Duaning punika ipun nunas ajeng-ajengan malaekat, tur Ida Sang Hyang Widi Wasa ngicen ipun sakancan sane dotang ipun.
26
Ida taler sane ngawinang angine bedangin mampeh tur antuk kawisesan Idane Ida ngawinang angine sane bedelod taler pada mampeh.
27
Ida mapaica paksi ring kaulan Idane, sane akehipun sakadi biase ring segarane.
28
Paksi-paksine punika ulung ring pakemahannyane, ring kiwa tengen kemah-kemahipune.
29
Irika rakyate tumuli pada nunas tur wareg. Ida Sang Hyang Widi Wasa maicayang ring ipun napija sane dotang ipun.
30
Nanging ipun durung taler lega ring sane dotang ipun. Yadiastun ipun sedek madaar,
31
Ida Sang Hyang Widi Wasa raris duka ring ipun, tur ngamademang jadmanipune sane pinih siteng-siteng miwah truna-truna sane pinih becik ring Israel.
32
Yadiastunja kadi asapunika, rakyate kantun taler ngardi dosa. Yadian ipun sampun ngeton katawahan-katawahan Idane, ipun taler nenten pracaya ring Ida.
33
Punika awinanipun Ida raris muputang tuuhipune waluya sakadi angkihan akeplisan miwah uripipune kapuputang antuk bencana sane tan pasangkan.
34
Rikala Ida ngamademang makudang-kudang diri saking pantaran ipune, sane lianan raris mawali tangkil ring Ida, tur ipun raris kapok saha ngastawa saking nekeng ati ring Ida.
35
Ipun raris eling mungguing Ida Sang Hyang Widi Wasa dados pasayubanipune miwah Sane Maha Wisesa dados panulung ipune.
36
Nanging baos ipune makasami bobab. Sane baosang ipun nenten wenten sane jujur.
37
Ipun nenten subakti ring Ida, tur ipun nenten satia ring janjin ipune ring Ida.
38
Nanging Ida Sang Hyang Widi Wasa sih sueca ring kaulan Idane. Ida ngampurayang dosanipune tur nenten nyirnayang ipun. Sering pisan Ida ngandeg pidukan Idane tur nanggehang bendun Idane.
39
Ida eling mungguing ipun wantah manusa pada, waluya sakadi angin sane mampeh raris ical.
40
Sering pisan ipun brontak nglawan Ida ring tegal melakange, tur sering pisan ipun ngawinang Ida sungsut.
41
Mawali-wali ipun mintonin Ida Sang Hyang Widi Wasa, tur ngawinang sungkan pakayunan Widin Israele sane suci.
42
Ipun lali ring kawisesan Idane sane agung miwah ring rahina daweg ipune kaluputang saking meseh-mesehipune,
43
miwah daweg Idane nyinahang pakardin Idane sane mawisesa miwah katawahan-katawahan sane kardi Ida ring tegal Soane ring jagat Mesire.
44
Ida ngubah toyan tukade dados rah, ngantos wong Mesire nenten maderbe toya buat kinum.
45
Ida nedunang buyung ring pantaranipune, sane nyakitin ipun miwah godogan sane ngusakang tanahipune.
46
Ida nedunang balang buat neda upon-upon tanahipune miwah ngrusak pategalanipune.
47
Ida ngamademang punyan angguripune antuk sabeh batu miwah wit aanipune antuk damuh es.
48
Ida ngamademang bantengipune antuk sabeh batu miwah ingon-ingonipune antuk kilap.
49
Ida ngawinang ipun katiben kakewehan sane ageng malantaran Ida mriokang bebendu miwah piduka sane tan kadi-kadi, sane rauhnya tan bina sakadi utusan sang patine.
50
Ida nenten nanggehang bebendun Idane, wiadin madalem uripipune, nanging Ida ngamademang ipun antuk grubug.
51
Ida ngamademang pianakipune muani sane pinih kelih, ring sawatek kulawargan wong Mesire.
52
Sasampune punika Ida raris nuntun kaulan Idane medal, waluya sakadi pangangon, tur nuntun ipun nglintangin tegal melakange.
53
Ida nuntun ipun saha rahayu, tur ipun pada nenten ajerih. Nanging segarane rauh nglancah tur ngelemang meseh-mesehipune.
54
Ida ngajak ipun ka tanah Idane sane suci, ka gunung-gununge sane sampun kaonang Ida.
55
Ida ngulah jadma uedan ring arepan kaulan Idane, tur Ida ngadum tanahipun ring pantaran suku-suku bangsa Israele, saha maicayang pumahan ring kaulan Idane.
56
Nanging ipun brontak nglawan Ida Sang Hyang Widi Wasa Sane Maha Wisesa, tur mintonin Ida. Ipun nenten satinut ring pituduh-pituduh Idane.
57
Nanging ipun brontak miwah nenten subakti pateh sakadi leluuripune, nenten nyandang gega sakadi panah sane bengkok.
58
Ipun ngawinang Ida duka malantaran genah pangubaktinipune sane cemer, tur malantaran arca-arcanipune, ipun ngawinang Ida bendu.
59
Ida Sang Hyang Widi Wasa duka pisan, rikala Ida nyingak indike punika. Punika awinannya Ida nulak kaulan Idane makasami.
60
Ida nilar kemah Idane ring Silo, pecak genah Idane malinggih ring pantaran iragane.
61
Ida nglugrain meseh-meseh iragane nyarah Peti Prajanjiane, sane makadados pralambang kawisesan miwah kaluihan Idane.
62
Ida duka pisan ring kaulan Idane, tur manggayang ipun kapademang antuk meseh-mesehipune.
63
Truna-trunane pada kapademang ring payudan, kantos truni-truninnyane angan adiriko nenten wenten sane nganten.
64
Parapanditane seda antuk kawirosan tur balu-baluan danene nenten kalugrain mapangenan.
65
Pamuputipun, Ida Sang Hyang Widi Wasa raris matangi sakadi anak sane wau matangi saking sirep. Ida waluya anak sane siteng sane wau punyah malantaran nginem anggur.
66
Ida ngebug meseh-meseh Idane, tur ngaonang ipun kantos nandang kimud salami-laminnya.
67
Nanging Ida nulak katurunan Dane Yusup, tur Ida nenten milih suku Epraim.
68
Ida tumuli nyelik suku Yehuda miwah Gunung Sion, sane sayangang Ida pisan.
69
Irika Ida ngwangun Perhyangan Agung Idane waluya sakadi purin Idane ring suargan. Ida ngrajegang Perhyangan Agung Idane waluya sakadi mrecapadane, kukuh bakuh salami-laminipun.
70
Ida nyelik parekan Idane Daud, tur Ida ngambil dane saking tegal pangonane,
71
ring genah danene ngangonang ingon-ingon danene, tur Ida nadosang dane ratun wong Israele, pangangon kaulan Ida Sang Hyang Widi Wasa.
72
Dane Daud matiningin ipun antuk pakayunan sane nulus, tur nuntun ipun antuk kawidagdan.
← Chapter 77
Chapter 79 →