2 Kings 18

Baoule (NYANMIƐN NDƐ'N 1998)

← Chapter 17 Jump to: Chapter 19 →

1Kɛ Ela i wa Oze yoli Izraɛl famiɛn'n, i afuɛ nsan'n su yɛ Akaz i wa Ezekias kusu yoli Zida famiɛn-ɔn.

2Kɛ ɔ ´yo famiɛn'n, wuun ɔ lɛ afuɛ ablaɔn-nin-nnun. Ɔ yoli famiɛn afuɛ ablaɔn-nin-ngwlan Zerizalɛm lɔ. I nin suan Abi, Zakari i wa-a.

3Ɔ nantili klanman Anannganman i atin'n su kɛ i nannan David sa.

4Ɔ bubuli sraka yiwlɛ lika bɔ be o kpɔlɛ'm be su'n. Ɔ bubuli yɛbuɛ nga be takali be'n. Ɔ kpɛli waka nga be takali bɔ be sɔ be'n. Ɔ fufuli aaba wuo nga Moiz yoli i laa'n nun, afin kɛ ɔ ´fa ju blɛ sɔ'n nun'n, wuun Izraɛlfuɛ'm be yra ansans man aaba wuo sɔ'n. Be tɔnnin i dunman kɛ Nɛistan.

5Ezekias fɛli i wla guali Anannganman b'ɔ ti Izraɛl Nyanmiɛn'n i su. Famiɛn nga be dunnin mmua i nyrun mun o, be nga be bali i sin mun o, be wie fi nin i a sɛ-man.

6Ɔ mantannin Anannganman, ɔ'a kpɔci-mɛn i le. Ɔ fali mmla nga Anannganman fa mannin Moiz'n su.

7Anannganman kusu jrɛnnin i sin. Like ng'ɔ yoli be'n, be kwlaa be yoli ye i sa nun. Ɔ jasoli Asiri famiɛn'n i wun, ɔ'a su-mɛn i kun.

8Ɔ kwlali Filistifuɛ mun lele juli Gaza nvle'n nun. Ɔ fali lika fleiinfleiin bɔ be jran be su be sasa klɔ'n. Ɔ kwlali klɔ nga be sisili bé wun'n be nunfuɛ mun.

9Kɛ Ezekias yoli famiɛn'n, i afuɛ nnan'n su'n, Salmanazar b'ɔ ti Asiri famiɛn'n fali alɛ wlali Samarifuɛ'm bé sin. Ɔ nin i sran'm be wa boli be nanmue Samari klɔ'n i sin. Kɛ ɔ ´yo sɔ'n, wuun Ela i wa Oze yoli Izraɛl famiɛn ɔ'a di afuɛ nso.

10Kɛ be boli nanmue'n, i afuɛ nsan'n su'n, be fali Samari klɔ'n. Ezekias i afuɛ nsiɛn'n su'n b'ɔ ti Oze b'ɔ ti Izraɛl famiɛn'n i afuɛ ngwlan su'n, yɛ Samari klɔ'n tɔli-ɔ.

11Asiri famiɛn'n trali Izraɛlfuɛ'm be lomuɛn yɛ ɔ fali be ɔli Asiri. Ɔ ko sieli wie mun Kalak nvle'n nun. Ɔ ko sieli wie mun nzue ba bɔ be flɛ i Kabɔr'n i nuan. Nzue ba sɔ'n wo Gɔzan nvle'n nun. Yɛ ɔ ko sieli wie mun ekun Medifuɛ'm be klɔ'm bé su.

12Sa sɔ'n juli be su yɛlɛ kɛ b'a tie-man Anannganman be Nyanmiɛn'n i aniɛn'n. Sa sɔ'n i bo'n i wie yɛlɛ kɛ aenguɛ nga Anannganman nin be trali'n, b'a bu-mɛn i like fi, yɛ b'a fa-man ndɛ nga Anannganman i sufuɛ Moiz kan kleli be'n su. I ti b'a nian-man su b'a nanti-man.

13Kɛ Ezekias yoli famiɛn'n, i afuɛ blu-nin-nnan'n su'n, Sankerib b'ɔ ti Asiri famiɛn'n fali alɛ wluli Zida klɔ nga be sisili bé wun'n be kwlaa be nun, nan ɔ'a fa be.

14Ezekias sunmannin sran Asiri famiɛn'n i wun lɔ. Kɛ ɔ ´yo sɔ'n, wuun famiɛn'n wo Lakis lɔ. I waan be ko se i kɛ: «Fɔnlɛ yɛ n fɔnnin-ɔn. Yaci, nán se kɛ a ´fa alɛ wla min sin. Like nga ɔ waan n `fa man wɔ'n, n ´fa man wɔ.» Asiri famiɛn'n waan sɛ ɔ ti sɔ'n, wuun man Ezekias mɛn i jɛtɛ ufue tɔnun ngwlan, yɛ sika ɔkwlɛ kilo ya ngwlan.

15Nan Ezekias ɔ'a fa sika ng'ɔ o Anannganman i sua'n nun'n nin ng'ɔ o famiɛn sua'n nun lɔ bɔlɛ'n nun'n ɔ'a man.

16Famiɛn Ezekias tutuli sika ɔkwlɛ b'ɔ man be klo guali Nyanmiɛn i sua'n i anuan nin i kadri'm bé wun'n, nan ɔ'a fa man Asiri famiɛn'n.

17Asiri famiɛn'n sunmannin sonja kpɛnngbɛn'm be su kpɛn'n, nin i mantanfuɛ'n, ɔ nin safunyrɛn b'ɔ dun alɛ'n i mmua'n Ezekias sin Zerizalɛm. Kɛ be ´kɔ'n, be nin sonja kpanngban kpa yɛ be ɔli-ɔ. I blɛ sɔ nun'n, wuun i bɔbɔ o Lakis. Be ɔli. Kɛ be juli Zerizalɛm klɔ'n nun lɛ'n, be jrannin nglo lɔ fɛtɛ'n i mmuɛ'n bɔ be yili'n i wun lɛ. Lika sɔ'n wo ble wlafuɛ'm be lika'n i wun lɛ.

18Be waan be ´kan ndɛ kle famiɛn'n. Ilkiza i wa Eliakim b'ɔ ti famiɛn'n i awlo'n i su kpɛn'n, ɔ nin Sɛbna b'ɔ ti famiɛn'n i fluwa klɛfuɛ'n, ɔ nin Azaf i wa Zɔas b'ɔ ti famiɛn'n i nuan ijɔfuɛ'n be ɔli be ko toli be kan be jrannin lɔ'n.

19Safunyrɛn'n seli be kɛ: «Amun `ko se Ezekias kɛ famiɛn dan'n b'ɔ ti Asiri famiɛn'n waan e usa wɔ kɛ: ‹?Nguɛ su liɛ a fa ɔ wla'n gua-a?

20?Kɛlɛ a bu i kɛ be nuan nun ndɛ kanlɛ ngbɛn'n yɛ be fa kun alɛ nin-ɔn? Be dun mmua jaja alɛ'n, kpɛkuun be tra be anwlɛn yɛ be kun-ɔn! ?Nan wan su yɛ a fa ɔ wla'n gua bɔ i ti yɛ a jaso mín wun nin-ɔn?

21?Nán Ezipt'n i su yɛ a fa ɔ wla'n gua-a? Ezipt'n ti kɛ ndɛma nga bɔ ɔ'a bu'n sa. Sɛ a kisa su-ɔ, ɔ wɔ ɔ́ sa klun fiti i bo nun lɔ. Be nga be fa bé wla gua Ezipt famiɛn'n su'n, kɛ ɔ ti sɔ man be-ɔ.

22Wienun-ɔn, amun wa tɛ min su kɛ: Anannganman e Nyanmiɛn'n i su yɛ e fa é wla'n gua-a. ?Nán i yɛ Ezekias bubuli i sraka yiwlɛ lika bɔ be o kpɔlɛ'm be su'n nin i sɔwlɛ mun nin-ɔn? ?Ezekias ɔ'a se-man Zidafuɛ mun, nin Zerizalɛmfuɛ'm be kɛ san Nyanmiɛn sɔwlɛ ng'ɔ o Zerizalɛm lɔ'n i kunngba i wun lɔ yɛ be `su Anannganman-an?

23Nan yoo! Asiri famiɛn'n b'ɔ ti min min'n, i waan amun `kpɛkpɛ. Sɛ wɔ yɛ a fali atin klanman'n, ɔ ´fa nnɛn kpanngɔ akpi nnyɔn (2.000) ´man wɔ, sɛ a kwla nyan sran fu be su'n.

24?I kpa nin-ɔn, min min i sonja'm be nun kaan kpa'n bɔbɔ'n, a jrɛn i nyrun-ɔn, ɔ yo ye? ?Yɛ ɔ yo sɛ ti yɛ a lafi Ezipt famiɛn'n su bɔ a bu i kɛ ɔ ´man wɔ kakaklolo nin nnɛn kpanngɔ nin-ɔn?

25Sɛ nán Anannganman bɔbɔ fanngan nun yɛ min min'n ba mɛn nga i nunnunlɛ'n, wuun ɔ wa yo nzu wa? Anannganman seli i kɛ: A nin be `ko kun, ko nunnun be.› »

26Ilkiza i wa Eliakim, ɔ nin Sɛbna, ɔ nin Zɔas be seli safunyrɛn'n kɛ: «E ´srɛ wɔ kpa ti-ɔ, kɛn i Aram aniɛn'n nun, e ti. Nán kɛn i Ebre nun, ɔ yo sɔ-ɔ, nzrafuɛ'm bɔ be o klɔ'n i wun talɛ'n su'n be ´ti.»

27Safunyrɛn'n tɛli be su kɛ: «?Amun bu i kɛ amun nin amun min'n amun ngunmin yɛ e min liɛ'n sunmannin ye kɛ e wa kan ndɛ nga e kle amun-ɔn? Sran nga be o klɔ'n i wun talɛ'n su'n, be ti yɛ m bali i kanlɛ-ɔ. Ɔ cɛ kan-an, amun nin sran sɔ mun amun sewie'n yɛ amun wa di-ɔ, yɛ amun mmie'n yɛ amun wa nɔn-ɔn!»

28Safunyrɛn'n wa sin jrannin. Ɔ kpannin kekle Ebre'n nun kɛ: «Amun `sie amun su be tie ndɛ nga Asiri famiɛn dan'n kan'n.

29Famiɛn'n wan yoo: ‹Sɛ Ezekias laka amun'n, nán amun fa su. Afin ɔ kwla de-man amun mín sa nun!

30Sɛ ɔ se amun kɛ amun `fa amun wla'n gua Anannganman su nan Anannganman ɔ ´de amun yɛ Asiri famiɛn'n su fa-man klɔ nga'n, nán amun fa su.

31Nán amun tie Ezekias i ndɛ ng'ɔ kan'n!› Asiri famiɛn'n wan yoo: ‹Amun man e siesie ye afiɛn, amun `fa amun wun man min, i liɛ'n amun ´kwla di amun bɔbɔ amun vinyi'n ɔ nin amun bɔbɔ amun figie'm be su mma, yɛ amun ´kwla nɔn amun bɔbɔ amun nzue gbo'n be nun nzue'n.

32Cɛn nga m ba'n, n ´fa amun n ´kɔ mɛn kun b'ɔ ti kɛ amun liɛ sa'n nun. Mɛn sɔ'n i asiɛ'n ti kpa. Ble nga be fa yo kpaun'n, nin vinyi nga be fɛ i mma'n yi nzan'n, ɔ nin olivie nga be fɛ i mma'n yi ngo'n, ninnge sɔ'm be yo ye lɔ kpa. Awɛma nzue o lɔ ekun. Amun su wu-man, sanngɛ amun ´nyan nguan. I ti nán amun tie Ezekias b'ɔ kpɛ amun gblɛ'n i nuan ndɛ'n. Ɔ se amun kɛ: Anannganman ´de ye! Gblɛ yɛ ɔ kpɛ-ɔ!

33?Mɛn onin cɛ yɛ i nunfuɛ'm be amuɛn'm be kwla deli be min sa nun-ɔn? ?Amatfuɛ mun nin Arpadfuɛ'm be amuɛn'm be o nin ndɛ?

34?Sɛfarvaimfuɛ mun, nin Enafuɛ mun, ɔ nin Ivafuɛ'm be amuɛn'm be o nin ndɛ? ?Amuɛn sɔ'm be kwla deli Samari mín sa nun?

35?Amuɛn sɔ'm be nun onin cɛ yɛ ɔ kwla deli i mɛn'n mín sa nun-ɔn? ?Yɛ Anannganman'n ´yo sɛ yɛ ɔ ´kwla de Zerizalɛm'n min sa nun-ɔn?› »

36Sran nga be o lɛ'n be guali bliin, b'a tɛ-man su, afin famiɛn Ezekias seli be kɛ nán be kan ndɛ fi.

37Yɛ Ilkiza i wa Eliakim b'ɔ ti famiɛn'n i awlo'n su kpɛn'n nin Sɛbna b'ɔ ti fluwa klɛfuɛ'n, ɔ nin Azaf i wa Zɔas b'ɔ ti famiɛn Ezekias i nuan ijɔfuɛ'n be titili bé wun tralɛ'm be nun-ɔn, nan b'a ko kan ndɛ nga safunyrɛn'n kannin'n b'a kle i.

← Chapter 17 Jump to: Chapter 19 →