Song of Solomon 3

Edo ((E Baibol Ẹdo) Version 1996)

← Chapter 2 Jump to: Chapter 4 →

1I gha vbiẹ vbe ukpo mwẹ vbe asọn hia I ghi gha mina miẹn enida mwẹ, I te gha gualọ ẹe sokpan I ma miẹn ọẹn.

2I keghi gha zozo lele ẹvbo khian, I la ughe la ovbi odẹ, I na gha gualọ enida mwẹ, I gualọ ẹe sokpan, I ma miẹn ọẹn.

3Avbe iran ni khẹ ughe miẹn mwẹ I keghi nọ iran wẹẹ, “Wa miẹn enida mwẹ ra?”

4I ghi wa da kpao vbe ehe ne iran yerre I keghi miẹn ọẹn I keghi gbae ginna egbe, I ma ghi sẹ ọẹ rae. Rhinrin I te do rhie ẹre gha die owa iye mwẹ, gha die ughugha ne a na biẹ mwẹ.

5Wa yan ma mwẹ, wa ne ikhuo e Jerusalẹm wa ya ẹrhuẹ ne ọ vin kevbe uzo vẹn ihẹn. Wẹ wa i ra fi ukpe ye ẹmwẹ aho ẹmwẹ ọmwa ima.

6Vbe ọna khin ne ọ ke ato dee na yi? Zẹ vbe iki ighogho? Ne ọ winhin eturari kevbe oziya eturari ne avbe ekpatẹ khiẹn?

7E Solomọn dee, a ya ẹkete ẹre mu ẹẹn dee. Avbe ivbiyokuo iyeha ọrọre iran ne ọ ya khẹ egbe, avbe ivbiyokuo ni maa sẹ vbe Izrẹl.

8Te umozo wa gua iran hia obọ ro. Ivbiyokuo nẹdẹ ne egbe ẹre gbe ikpan ye okuo ọ re iran khin. Dọmwadẹ ọghọe vbe uwu iran mwẹ umozo, ne a ya gha khẹ odẹ ẹmwẹ igbinna asọn.

9Ẹkete ne a ye erhan ne ọ maa sẹ ru. Ọ re a ya tọn e Solomọn mu dee.

10Esiliva ọ re a ya rhu erhan ne a viọ mudia lele ẹe, a keghi ya ukpọn ne a ya igoru mu ona yi rhu ẹe. Ukpọn ododo ọ re a ya gue ukohunmwu ni rrọọ ikhuo e Jerusalẹm ọ re ọ do ẹe mose mose.

11Wa ne ikhuo e Zaiọn, wa do ghe Solomọn. Ọ mu ẹde ne iyẹe mu ye ọ re uhunmwu rhuẹ, vbe ẹdẹ ne ọ rhie ọha vbe oghọghọ kevbe ọyẹnmwẹ ọghọe.

← Chapter 2 Jump to: Chapter 4 →