Ezekiel 36:2 — Compare Translations

Bugis

‘Wettunna bangsa-bangsaé ri seddému maggasa sibawa rampo'ko, napakatunani mennang sininna Israélié. Nasibawang arennung makkedai mennang makkedaé sining bulu-bulu riyoloéro mancajiwi appunnangenna mennang. Rimakkuwannanaro, éh sining bulué sibawa bulu-bulué, ana'-ana' saloé sibawa lompo'é, éh kota-kota iya mancaji sésa-sésa ruttungengngé sibawa iya risalaiyénna ri iya monroiyéngngi enrengngé rirampo sibawa riyéllé ri bangsa-bangsaé ri seddéna, éngkalingai aga napowada Puwang Iya Pommatanré lao ri iko: Ri laleng allumpana cai-Ku Ubantai bangsa-bangsaé ri seddému na lebbi-lebbipi Edom, nasaba nasibawang asennangeng mennang sibawa mappakatuna, purai nasittai tana-Ku nenniya narampasa sining padang wellana. Makkekkuwangngé macai-Ka sibawa majjallo nasaba iyaro bangsa-bangsaé purai napakatuna senna'ko enrengngé napakariyawako.