1 Kings 12

Chin TBR17 (Tedim Bible Revision 2017)

← Chapter 11 Jump to: Chapter 13 →

1Shekhem ah Rehoboam pai hi. Bang hang hiam cih leh amah kumpi a suaksak Israel mi khempeuh Shekhem ah hong pai uh hi.

2Nebatʼ tapa Jeroboam in tua thu a zak ciangin (bang hang hiam cih leh kumpi Solomon kiang panin a taina Egypt ah amah om lai hi), Egypt panin hong ciahkik hi.

3Tua ciangin amaute in mi sawlin amah sam uh hi. Tua ciangin Jeroboam le a kikhawm khempeuhte hong pai-in Rehoboam kiangah,

4“Na pa in kote hong gimbawlin van gikpi hong suan hi. Tua ahih ciangin tu-in na paʼ nasep haksate le kote tungah a gik lua thuhaksate zangsak in. Tua hileh kote in nangma na kong sem ding uh hi,” a ci uh hi.

5Amah in amaute kiangah, “Ni thum sung va kihem unla, tua ciangin kei kiangah hong paikik un,” a ci hi. Tua ahih ciangin mite paikhia uh hi.

6Tua ciangin Kumpi Rehoboam in a pa Solomon a nuntak lai-in ama mai ah a ding ngei khangham mite thu dongin, “Hih mite ka dawn nading ngaihsutna hong bangci piak ding na hi uh hiam?” a ci hi.

7Tua ciangin amaute in ama kiangah, “Nangmah in tu ni-in hih miteʼ deihna bang zui inla, amaute na dawn ciangin kam hoih pau lecin, amaute pen a tawntungin nangma nasemte hi ding uh hi,” a ci uh hi.

8Ahih hangin khanghamte in ama tungah ngaihsutna a piakte nusia-in, amah tawh a khangkhawm ama mai ah a ding khangnote thu dong hi.

9Amah in amaute kiangah, “‘Na pa in kote tungah hong suat van gik zangsak in,’ kei tungah hong ci hih mite i dawn nading ngaihsutna hong bangci piak ding na hi uh hiam?” a ci hi.

10Tua ciangin amah tawh a khangkhawm khangnote in ama kiangah, “Nang kiangah, ‘Na pa in van gikpi hong puasak ahih manin kote adingin hong zangsak in,’ hong ci hih mite kiangah hih bangin na gen ding hi. Amaute kiangah, ‘Ka khut meno pen ka paʼ kawng sangin gol zaw hi.

11Tu-in ka pa in note tungah van gik hong suat banah kong behlap lai ding hi. Ka pa in ciang tawh note hong thuhilh hi. Ahih hangin keimah in ciang lingnei tawh note kong thuhilh ding hi,’ na ci ding hi,” a ci uh hi.

12Tua ahih ciangin kumpipa in, “Ni thum ni-in ka kiangah hong paikik un,” a cih mah bangin Jeroboam le mi khempeuh a ni thum ni-in Rehoboam kiangah hong pai uh hi.

13Tua ciangin kumpipa in mite ngawh dawn a, khangham mite in ama tungah ngaihsutna a piakte nusia-in,

14khangnoteʼ ngaihsut piakna tawh kizui-in amaute kiangah thu gen a, “Ka pa in noteʼ tungah van gik hong suat banah keimah in kong behlap lai ding hi. Ka pa in ciang bek tawh note hong thuhilh hi. Ahih hangin keimah in ciang lingnei tawh note kong thuhilh ding hi,” a ci hi.

15Tua bangin kumpipa in miteʼ deihna zui lo hi. Bang hang hiam cih leh Topa in Shiloh khuami Ahijahʼ tungtawnin Nebatʼ tapa Jeroboamʼ tungah a gen sa thu a tunsak nadingin Topa in a piansak thu kiheina ahi hi.

16Kumpipa in amauʼ thu a ngaih lohna Israel-te khempeuh in a muh uh ciangin mite in kumpipa dawng uh a, “David sungah kote in bang ngah nei ka hi uh hiam? Jessi tapa sungah gamhluah ka nei kei uh hi. Israel-te aw, na inn ciat uh ah ciah un. Rehoboam in ama ading vaihawm tawm tahen,” a ci uh hi. Tua ahih ciangin Israel-te a inn ciat uh ah kihem uh hi.

17Ahih hangin Rehoboam in Judah khuapite sungah a teeng Israel mite a uk hi.

18Tua ciangin Kumpi Rehoboam in aana tawh nasemte a uk Adoram, Israel-te tawh a kimu dingin sawl a, ahi zongin amaute in amah suang tawh na deng lum uh hi. Tua ciangin Jerusalem ah a tai dingin Kumpi Rehoboam a sakol leeng ah a tuang dingin nawh tai hi.

19Tua ahih ciangin tu ni dongin leilu lam Israel-te in Davidʼ suanteʼ ukna lehdo uh hi.

20Jeroboam hong ciahkik khitna thu Israel-te khempeuh in a zak uh ciangin amaute in mi sawlin kikhopna ah amah samsak uh a, Israel-te khempeuh tungah kumpi-in amah a bawl uh hi. Davidʼ suante a zui kuamah dang om lo a, Judah minam bek in a zui uh hi.

21Jerusalem ah Rehoboam a tun ciangin, a kumpi gam a ngahkik nadingin Israel mite a sim dingin Judah minam khempeuh le Benjamin minam, a kiteel galhang mi tul za khat le tul sawm giat a khawm hi.

22Ahih hangin Pasianʼ mi Shemaiahʼ tungah Pasianʼ thu hong tung hi:

23“Judah kumpipa, Solomonʼ tapa Rehoboam tung le Judah le Benjamin minam khempeuh tung le a om lai midang khempeuh tungah gen in.

24‘ Topa in hih bangin ci hi: Note na kuan to kei ding uh a, na beh uh ahi Israel-te na do kei ding uh hi. Mi khempeuh a inn ciat uh ah ciah hen. Hih thu pen keima vaihawm ahi hi,’ ci hi,” a ci hi. Tua ahih ciangin amaute in Topaʼ thu ngai uh a, Topaʼ thugen bangin inn ah a ciahkik uh hi.

25Tua ciangin Jeroboam in Efraim mual tung gam sungah Shekhem khua phutin tua lai ah tawl khat sung a teeng hi. Tua ciangin amah pai khia-in Penuel a puah hi.

26Tua ciangin Jeroboam in a lungsim sungah, “Tu-in kumpi gam pen Davidʼ suanteʼ tungah kiheikik kha thei ding hi.

27Jerusalem-a Topaʼ biakinn ah biakna pia dingin hih mite pai to leh, hih miteʼ lungsim Judah kumpi Rehoboam, a topa uh lamah kiheikik kha dinga, amaute in kei hong thatin Judah kumpi Rehoboam kiangah ciahkik ding uh hi,” ci hi.

28Tua ahih ciangin kumpipa in thu kikupna khat bawl a, tua ciangin kham bawng no nih bawl hi. Tua ciangin amah in mite kiangah, “Jerusalem ah sauvei khop na pai khinta uh hi. Israel mite aw, Egypt leitang panin note hong paikhiatpih na pasian-te uh en un,” a ci hi.

29Amah in Bethel ah khat koihin, Dan ah a dang khat a koih hi.

30Hih na pen khialhna khat a suak hi. Bang hang hiam cih leh mite Bethel a bia ding le Dan a bia dingin a gamla pekah va pai uh hi.

31Amah in mual dawnte ah zong biak nading inn lamin mite khempeuh lak panin Levi mi ahi lo mite siampi-in a seh hi.

32Tua ciangin Jeroboam in Judah a om pawi tawh a kibangin a kha giatna a ni sawm le nga ni-in pawi khat bawl a, biakna tau tungah biaknate a pia hi. Tua mah bangin amah in Bethel ah bawlin ama bawl sa bawng no milimte tungah biakna a pia hi. Tua ciangin amah in ama bawl sa mual tunga biakna siampite Bethel ah a koih hi.

33A kha giatna a ni sawm le nga ni, ama deih kha sungin Bethel a ama bawl sa biakna tau ah amah pai to hi. Amah in Israel mite adingin pawi khat kipsak a, paknamtui hal dingin biakna tau ah a pai to hi.

← Chapter 11 Jump to: Chapter 13 →