1 Kings 14

Chin TBR17 (Tedim Bible Revision 2017)

← Chapter 13 Jump to: Chapter 15 →

1Tua hun laitakin Jeroboamʼ tapa Abijah a ci na hi.

2Jeroboam in a zi kiangah, “Ding inla, na mel kiseelin Jeroboamʼ zi na hih lam kitheisak kei inla, Shiloh ah va pai in. Hih mite tungah kumpi ka hih nading thu a gen kamsang pa Ahijah tua lai ah om hi.

3Anlum sawm, moh pawl khat, khuaizu thawl khat keng inla ama kiangah va pai in. Naupang tungah a piang ding thu amah in nang kiangah hong gen ding hi,” a ci hi.

4Jeroboamʼ zi tua bangmahin gamta hi. Amah kithawi-in Shiloh ah pai a, Ahijahʼ inn va tung hi. A khanghamna hangin a mitte maang ahih manin Ahijah in khua mu thei lo hi.

5Tua ciangin Topa in Ahijah kiangah, “En in, a tapa tawh kisai nangma kiangah thu a dong dingin Jeroboamʼ zi hong pai hi. Bang hang hiam cih leh a tapa a ci na hi. Tua bang tua bangin tua nu tungah na gen ding hi,” a ci hi. Amah hong pai ciangin numei dang khatin kineih hi.

6Ahih hangin Ahijah in amah kongkhak hong tun a kheging a zak ciangin, “Hong tum in Jeroboamʼ zi aw, bang hangin midang khat kineih na hi hiam? Nang adingin thugik khat kei tungah hong kipia hi.

7Pai inla Jeroboam kiangah hih bangin gen in, ‘Israel Pasian, Topa in hih bangin ci hi: “Mite lak panin nang hong liansakin ka mi Israel-te tungah makai-in kong bawl a,

8Davidʼ suanteʼ tung panin kumpi gam bal khia-in nangma tungah kong pia hi. Ahi zongin nang pen ka thupiaknate zui-in, a lungsim khempeuh tawh kei hong zui-in ka muhna ah a man nate bek a sem ka nasem pa David na bang kei a,

9nangmah in na mai-a om mite khempeuh sangin siatna bawl zaw-in, pai-in pasian dangte le a kisung milimte nang adingin bawlin ka heh nadingin nong phin a, na nung lamah kei nong paai hi.

10Tua ahih ciangin en in, mi khat in a bei matengin ek a hal tum mah bangin Jeroboam innkuan tungah siatna tungsakin, sal le sal ahi lo mi a kibangin pasal khempeuh Jeroboam innkuan panin ka susia dinga, Israel sungah Jeroboam innkuan ka beisiangsak ding hi.

11Tua ahih ciangin Jeroboamʼ mi, khuapi sunga a si mi peuhpeuh uite in ne dinga, gamlak ah a si mi peuhpeuh huihlak vasate in ne ding hi. Bang hang hiam cih leh Topa in gen khin hi,” ci hi,’ ci-in a gen hi.

12“Tua ahih ciangin ding inla na inn ah ciah in. Na khua na tun ciangin na tapa si ding hi.

13Tua ciangin Israel mi khempeuh ama hangin kapin vui ding uh hi. Bang hang hiam cih leh Israel Pasian, Topaʼ tungah a lungkimhuai na khat Jeroboamʼ innkuan sung panin ama tungah kimu ahih manin Jeroboam sung panin amah bek mah hanah kivui ding hi.

14Tua tham loin tu ni-in Jeroboam innkuan a beisak ding, Israel-teʼ tungah kumpi khat Topa in ama adingin khangsak ding hi. Tua hun a kipan

15tui sunga pumpeeng a kilin mah bangin Topa in Israel mite vatin amau pute pate tungah a piak hih gam hoih panin Israel zunglot dinga, Eufratis gun gal khat ah amaute thehthang ding hi. Bang hang hiam cih leh amaute in Asherah milimte bawlin Topa a heh nadingin phin uh hi.

16Tua ciangin ama khialhna le Israel-te a khialhsakna ahi Jeroboamʼ khialhna hangin amah in Israel nusia ding hi,” a ci hi.

17Tua ciangin Jeroboamʼ zi dingin kihem khia a, Tirzah ah a ciah hi. Amah inn tungin sangkil a kan laitakin naupang a si hi.

18Tua ciangin a nasem kamsang Ahijah tungtawnin Topaʼ thugenna tawh kizui-in Israel mi khempeuh in amah vui-in ama hangin a kap uh hi.

19Tu-in Jeroboamʼ gamtatna a omlaite, a galsimna le a gam uknate, Israel Kumpiteʼ Khang Tangthu Laibu sungah kigelh hi.

20Jeroboamʼ uk hunsung kum sawm nih le nih ahi hi. Tua ciangin amah si a, ama tangin a tapa Nadab in a uk hi.

21Tu-in Solomonʼ tapa Rehoboam in Judah ah uk hi. Gam uk dingin a kipatin Rehoboam kum sawm li le khat pha a, a min koih nadingin Topa in Israel minam khempeuh sung panin a teelkhiat khuapi Jerusalem ah amah in kum sawm le kum sagih sung uk hi. Ama nu a min Naamah hi a, Ammon mi ahi hi.

22Tua ciangin Judah mite, Topaʼ muhna ah a sia gamta uh a, a pu a pate khempeuh uh hih sangin a tam zaw-in amauʼ khialhnate uh tawh ama hazat nading piangsak uh hi.

23Bang hang hiam cih leh amaute in amau adingin mual tunga biaknate, biakna songte le mual sang tung khempeuh le singniim nuai khempeuh ah Asherah milimte bawl uh a,

24biakna phualte ah numei pasal paktat pawlte zong om uh hi. Topa in Israel miteʼ mai ah a hawlkhiat minam dangteʼ gamtatna a kihhuai khempeuh bangin amaute gamta uh hi.

25Kumpi Rehoboamʼ kum ngana kumin Jerusalem a sim dingin Egypt kumpi Shishak hong kuan to hi.

26Amah in Topaʼ biakinn-a van manphate le kumpipaʼ inn-a van manphate la khia hi. Amah in na khempeuh la khia hi. Amah in Solomonʼ bawl sa kham lumte khempeuh zong la hi.

27Tua ciangin Kumpi Rehoboam in tuateʼ tangin sumngo lumte bawl a, kumpipaʼ inn kongkhak a cing inncing ulianteʼ khut sungah tuate a ap hi.

28Topaʼ biakinn ah kumpipa a pai simin inn cingte in tuate pua-in, tua ciangin inn cinna inn dei sungah tuate koihkik zel uh hi.

29Tu-in Rehoboamʼ gamtatna a omlaite le a sep khempeuh, Judah Kumpiteʼ Khang Tangthu Laibu sungah kigelh hi.

30Tua ciangin Rehoboam le Jeroboamʼ kikalah gal kidona om tawntung hi.

31Tua ciangin Rehoboam si a, David khuapi sungah a pate tawh kivui hi. Ama nu a min Naamah hi a, Ammon mi ahi hi. Tua ciangin ama tangin a tapa Abijam in a uk hi.

← Chapter 13 Jump to: Chapter 15 →