1 Kings 16

Chin TBR17 (Tedim Bible Revision 2017)

← Chapter 15 Jump to: Chapter 17 →

1Tua ciangin Baasha langpangin Hanani tapa Jehu tungtawnin Topaʼ thu hong tunga,

2“Keimah in leivui lak panin nang hong sang to sakin ka mi Israel-te tungah makai-in nang hong bawl napi-in, nangmah in Jeroboamʼ khekhap mah tawnin ka mi Israel-te na khialsak a, amauteʼ khialhna tawh kei hong hehsak na hih manin

3en in, keimah in Baasha le a innkuan ka phiatsiang dinga, Nebatʼ tapa Jeroboamʼ innkuan bangin na innkuan ka bawl ding hi.

4Baashaʼ mi, khuapi sunga a si peuhpeuh uite in ne dinga, ama mi gamlak ah a si peuhpeuh huihlak vasate in ne ding uh hi,” a ci hi.

5Tu-in Baashaʼ gamtatna a omlaite, a septe le a thahatna, Israel Kumpiteʼ Khang Tangthu Laibu sungah kigelh hi.

6Tua ciangin Baasha si a, Tirzah ah kivui hi. Ama tangin a tapa Elah in uk hi.

7Tua tham loin Jeroboam innkuan bangin ama nasepna tawh hehsakin Topaʼ muhna ah a sia a gamtatna khempeuh hang le amah in Jeroboam le a innkuan a suksiatna hangin Hananiʼ tapa kamsang Jehuʼ tungtawnin Baasha le a innkuan langpangin Topaʼ thu hong tung hi.

8Judah kumpi Asaʼ kum sawm nih le gukna kumin Baashaʼ tapa Elah in Tirzah panin Israel tungah uk ding kipan a, kum nih sung uk hi.

9Ahih hangin ama leengte alang a ukpa ama nasem Zimri in amah sawm sim hi. Tirzah a kumpi inn sung a ukpa Arzaʼ inn ah zukhamin Tirzah ah a om laitak,

10Judah kumpi Asaʼ kum sawm nih le sagihna kumin Zimri hong pai-in Elah sattukin that a, ama tangin a uk hi.

11Amah in uk dinga a kipat, kumpi tokhom tungah a tut khit phetin amah in Baashaʼ innkuan khempeuh that hi. Ama behte pasal khat beek ahi a, a lawmte ahi zongin khat zong siit lo hi.

12Baashaʼ khialhnate le a khialh sa uh ahi a tapa Elahʼ khialhnate le amaute in Israel khialsakin, a milimte uh tawh Israel Pasian, Topa a hehsakna uh hangin, Baasha langpangin kamsang Jehu tungtawnin Topaʼ thugenna bangin Baashaʼ innkuan khempeuh tua bangin Zimri in susia hi.

14Tu-in Elahʼ gamtatna a omlaite le a sep khempeuh, Israel Kumpiteʼ Khang Tangthu Laibu sungah kigelh hi.

15Judah kumpi Asaʼ kum sawm nih le sagihna kumin Zimri in Tirzah ah ni sagih sung uk hi. Tua laitakin Filistia-teʼ khua Gibbethon simin Israel galkapte in giahphual sat uh a,

16giahphual sat a om galkapte in, “Zimri in sawm simin kumpipa that khin hi,” a kicihna a za uh hi. Tua ahih ciangin Israel-te khempeuh in tua ni-in giahphual ah galkap a ukpa Omri kumpi-in a bawl uh hi.

17Tua ahih ciangin Omri le amah tawh a om Israel khempeuh Gibbethon panin pai to-in amaute in Tirzah umcih uh hi.

18Ama hih sa a khialhna, Topaʼ muhna ah a siat gamtatna, Jeroboamʼ khekhap a totna le a hih sa a khialhna, Israel a khialhsakna hangin, a khuapi kila khinta hi, ci-in Zimri in a muh ciangin kumpipaʼ inn muanhuai sungah amah pai a, kumpipaʼ inn tawh amah mei-in kihalnelhin a si hi.

20Tu-in Zimriʼ gamtatna a omlaite le ama hih sa a sawm simna, Israel Kumpiteʼ Khang Tangthu Laibu sungah kigelh hi.

21Tua ciangin Israel mite pawl nihin kikhen uh hi. Mi pawl khat in kumpi-in a bawl dingin Ginathʼ tapa Tibni zui uh a, a pawl khat in Omri zui uh hi.

22Ahih hangin Omri a zui mite in Ginathʼ tapa Tibni a zuite zo uh ahih ciangin Tibni si a, Omri kumpi a suak hi.

23Judah kumpi Asaʼ kum sawm thum le khatna kumin Omri in Israel-te tungah uk ding kipan a, kum sawm le kum nih sung a uk hi. Amah in kum guk sung Tirzah ah uk hi.

24Amah in Shemerʼ tung panin ngun talen nihin Samaria mual lei hi. Amah in kulh tawh a mual um a, tua mual a nei pa Shemerʼ min tamin a lam sa khuapi min Samaria a phuak hi.

25Topaʼ muhna ah Omri a sia gamta a, ama mai-a om mi khempeuh sangin a sia tam zaw gamta hi.

26Bang hang hiam cih leh Nebatʼ tapa Jeroboamʼ gamtat khempeuh le Israel a khialhsakna khialhnate, a milimte uh tawh Israel Pasian, Topa a hehsakna uh a zui hi.

27Tu-in Omriʼ gamtatna a omlaite le a thahatna a lahna, Israel Kumpiteʼ Khang Tangthu Laibu sungah kigelh hi.

28Tua ciangin Omri si a, Samaria ah kivui hi. Tua ciangin ama tangin a tapa Ahab in a uk hi.

29Judah kumpi Asaʼ kum sawm thum le giatna kumin Omriʼ tapa Ahab in Israel tungah uk ding kipan a, amah in Samaria panin Israel-te tungah kum sawm nih le nih sung a uk hi.

30Omriʼ tapa Ahab, ama mai-a mite khempeuh sangin Topaʼ muhna ah a sia tam zaw gamta hi.

31Nebatʼ tapa Jeroboamʼ khialhnate zuih ding ama adingin a thuzang tawh a kibat mah bangin, amah in Sidon miteʼ kumpi Ethbaalʼ tanu Jezebel zi-in la a, pai-in Baal na semin a bia hi.

32Amah in Samaria-a a lam Baal inn sungah Baal adingin biakna tau khat dingsak hi.

33Tua ciangin Ahab in Asherah milim khat bawl hi. Ahab in ama mai-a om Israel kumpite khempeuh sangin Israel Pasian, Topa hehsak nading tam hih zaw hi.

34Ama hun sungin Bethel mi Hiel in Jerikho a puah hi. Topa in Nun tapa Joshuaʼ tungtawnin a gen bangin amah in a tacil Abiramʼ luang khamin a bulpi phut a, a tapa neu pen Segubʼ luang khamin a kongpite a phut hi.

← Chapter 15 Jump to: Chapter 17 →