1 Kings 17

Chin TBR17 (Tedim Bible Revision 2017)

← Chapter 16 Jump to: Chapter 18 →

1Tu-in Gilead gam sung Tishbe khua panin Tishbe mi Elijah in Ahab kiangah, “A mai ah ka dinna Israel Pasian, Topa a nungta ahih mah bangin keima thu tawh loin daitui ahi a, guah ahi zongin hong tung ding kumte sungah om lo ding hi,” a ci hi.

2Tua ciangin ama kiangah Topaʼ thu hong tunga,

3“Hih lai panin kihemin nisuahna lamah kihei inla, Jordan nisuahna lam Kherith lui ah bu in.

4Nangmah in lui panin tui na dawn ding hi. Tua lai ah nangmah a hong vak dingin va-akte thu ka pia zo hi,” a ci hi.

5Tua ahih ciangin amah pai-in Topaʼ thugen bangin gamta a, Jordan nisuahna lam Kherith lui gei ah a om hi.

6Tua ciangin va-akte in ama kiangah zing le nitakin anlum le sa puak a, amah in lui panin tui a dawn hi.

7Tua gam sungah guah zu lo ahih manin tawl khat khit ciangin a lui a kang hi.

8Tua ciangin Elijah kiangah Topaʼ thu hong tunga,

9“Ding inla, Sidon miteʼ khua Zarefath ah pai-in tua lai ah om in. Tua lai ah nangmah a hong vak dingin meigongnu khat thu ka pia zo hi,” a ci hi.

10Tua ahih ciangin amah dingin Zarefath ah a pai hi. Khuapi kulh kongpi a tun ciangin, meigongnu khat in sing na tom hi. Amah in tua nu samin, “Ka dawn theih nadingin beel khat sungah tui tawm hong paipih in,” a ci hi.

11Tua nu in paipih dingin a kisak laitakin, amah in tua nu samin, “Anlum neu khat hong tawi kawm in,” a ci hi.

12Tua ciangin amah in, “ Topa na Pasian a nungta ahih mah bangin em sa bangmah ka nei kei a, beel sungah annel khut dim khat le um sungah sathau tawmno khat bek om hi. Tu-in keimah le ka tapa adingin tuate bawlin kote in ka nek theih nadingun singkang nih khawng a tom ka hi a, tua ciangin a si ta ding ka hi uh hi,” a ci hi.

13Tua ciangin Elijah in ama kiangah, “Lunghimawh kei in; pai inla na gen sa bangin an hong bawl in. Kei adingin moh neu khat hong bawlsak masa-in kei kiangah hong paipih inla, tua khit ciangin nang le na tapa ading bawl in.

14Bang hang hiam cih leh Israel Pasian, Topa in hih bangin ci hi: ‘ Topa in leitungah guah a zuksak ni matengin beel sunga annel bei lo dinga, um sunga sathau zong kiam ngei lo ding hi,’ ci hi,” a ci hi.

15Tua ciangin amah pai-in Elijahʼ gen sa bangin hih hi. Tua nu le amah le tua nuʼ innkuan in ni tampi sung ne uh hi.

16Elijahʼ tungtawnin Topaʼ thugen bangin beel sunga annel bei lo a, um sunga sathau zong kiam ngei lo hi.

17Hih thu khit ciangin inn sung nupi ahi numeiʼ tapa a ci na hi. A natna nasia mahmah ahih manin gim semsemin a si hi.

18Tua ciangin amah in Elijah kiangah, “Pasianʼ mipa aw, keiʼ lang khat ah bang thu nei na hi hiam? Ka khialhna a pholak ding ka tapaʼ sihna a piangsak dingin kei kiangah nong pai hi,” a ci hi.

19Tua ciangin amah in tua nu kiangah, “Na tapa hong pia in,” a ci hi. Amah in tua nuʼ ang panin amah la-in ama giahna innkhum zang ah pua to-in ama lupna tungah a sial hi.

20Tua ciangin Topaʼ tungah kiko-in, “ Topa ka Pasian aw, ama tapa thahna tawh ka peemna meigongnuʼ tung nangawn ah gimna hong tungsak na hi hiam?” a ci hi.

21Tua ciangin naupang tungah amah thum vei kikhuangin Topaʼ tungah kiko a, “ Topa ka Pasian aw, hih naupang hingkiksak in,” a ci hi.

22Tua ciangin Topa in Elijahʼ aw ngai hi; naupang hong nakkikin a hingkik hi.

23Tua ciangin Elijah in naupang la-in inn khumzang panin inn sungah paipih suk a, a nu kiangah a pia hi. Tua ciangin Elijah in, “En in, na tapa nungta hi,” a ci hi.

24Numei in Elijah kiangah, “Nang, Pasianʼ mi na hihna le Topa in nang tungtawnin thu a gen takpi ahihna tu-in ka thei hi,” a ci hi.

← Chapter 16 Jump to: Chapter 18 →