2 Thessalonians 2

Chin TBR17 (Tedim Bible Revision 2017)

← Chapter 1 Jump to: Chapter 3 →

1Sanggamte aw, i Topa Jesu Khris hong pai nading thu le amah a dawn dingin eite i kikhop nading thu tawh kisai-in note kiangah kong thum nopna uh panin:

2Topaʼ hong pai ding ni hong tung khinta hi, ci-a thu kigenna hangin lunghimawhin lungmangin om kei un. Thuhilh khat peuhpeuh in hih bang thu hong gen kha thei dinga, tua thu pen koteʼ gen leh gelh hi, ci-in zong gen kha ding uh hi.

3Ahi zongin kuama khem sa-in ta kei un. Bang hang hiam cih leh nakpi takin Pasian langpanna lianpi le hell khuk sung a tung ding ahi A Gilopa hong kilat matengin tua Ni hong tung lo ding hi.

4Tua A Gilopa in miteʼ biak pasian a kici khempeuh le na khempeuh nial gawp ding hi. Tuate khempeuh sangin a lian zaw-in a kingaihsut banah, Pasian ka hi hi, ci-in Pasianʼ biakinn sung mahmah ah pai-in va tu ding hi.

5Note tawh ka hong om khawm lai-in hih thute khempeuh hong gen khin ka hih manin na phawk lai ding uh hi.

6Ahi zongin tu laitakin tua bang a pian loh nadingin a kham khat om ahihna thu na thei uh hi. A hun a tun ciangin A Gilopa hong kilang ding hi.

7Kuamah kim in a phawk loh Gitloh Gamtatna kigamta khinta a, ahi zongin hih thu a pian ding a khamcip pa a kilakkhiat khit matengin a hong piang ding thu hong piang nai lo ding hi.

8A khamcip pa a kilakkhiat khit ciangin A Gilopa hong kilang dinga, Topa Jesu hong pai ciangin tua A Gilopa mut lum dinga, vanglian minthangin hong kilatna tawh a maimangsak ding hi.

9Satanʼ vangliatna tawh A Gilopa hong pai-in, lim le nalamdang a tuamtuamte hong bawl dinga,

10gitloh khemna a nam tuamtuam zangin, siatna a thuak ding mite a khem ding hi. Tua bang mite in a suahtak nadingun thuman sang nuam lo, deih lo uh ahih manin siatna a tuak uh ahi hi.

11Tua ahih manin Pasian in amaute lakah nasem dingin zuau thahatna paisak ahih manin amaute in a man lo thu um uh hi.

12Tua ahih manin thuman um loin, mawhna sungah nuam a sa khempeuh in mawhsak thukhenna thuak ding uh hi.

13Ahi zongin sanggamte aw, Topa in note hong it a, Kha Siangtho vangliatna hang le note in thuman na upna uh hangin ama mi siangthote na suah nadingun nopsakna a ngah masa dingin Pasian in note hong teel ahih manin note hangin Pasian tungah lungdamna ka ko tawntung uh hi.

14Topa Jesu Khris tawh minthanna na ngahkhawm theih nadingun note tungah kong hilh uh Lungdamna Thu tawh hih nopsakna ah Pasian in note a hong sam ahi hi.

15Tua ahih ciangin sanggamte aw, kam tawh ahi a, lai tawh ahi zongin kong hilh uh thumante limtakin zui unla, kip takin om un.

16I Topa Jesu Khris mahmah leh, eite hong itin, a hong hehpihna tawh thakhauhna le lametna a hong pia tawntung eiteʼ Pa Pasian in

17note lungsimah thakhauhna hong guan henla, a hoih thu khempeuh genin a sem zo dingin na tha uh hong hatsak tahen.

← Chapter 1 Jump to: Chapter 3 →