2 Samuel 21:10 — Compare Translations

Ewe (Agbenya La) 2020

Rizpa, Aya ƒe vinyɔnu, ame si nye ŋutsu eveawo dada la keke akpanya ɖe agakpe aɖe dzi eye wònɔ afi ma le viawo ƒe kukuawo gbɔ tso nuxaɣi va se ɖe tsidzaŋɔli la, ale be akagawo mavuvu wo le ŋkeke me o eye lã wɔadãwo hã maɖu wo le zã me o.

Ewe 1913 (Biblia alo Ŋɔŋlɔ Kɔkɔe La Le Eʋegbe Me 1913)

Tete Aya vinyɔnu Rizpa tsɔ akpanya keke ɖe agakpe la dzi tso nuŋeɣi ƒe gɔmedzedze, vaseɖe esime tsi dza tso dziƒo ɖe wodzi; eye mena dziƒoxewo dze ɖe wo dzi le ŋkeke me, alo gbemelãwo va wo gbɔ le zã me o.

Ewe 2014 (EƲEGBE BIBLIA)

Tete Aya vinyɔnu, Rizpa tsɔ akpanya wɔ nɔƒe ɖe agakpe si dzi ame kukuawo le la dzi, eye wònɔ afi ma tso nuŋeɣi la ƒe gɔmedzedze va se ɖe esime tsi de asi dzadza me le tsidzaɣi. Enyaa xeviwo ɖa le ame kukuawo ŋu le ŋkeke me, eye le zã me la, ekpɔa egbɔ be gbemelãwo mete ɖe wo ŋu o.