Judges 18:7 — Compare Translations

Ilonggo (Ang Biblia (1982))

Niyan ang lima ka lalaki nagtaliwan, kag nag-abut sa Lais, kag nakakita sang katawohan didto, kon paano nga pagpuyo nila sa kalig-onan, sono sa pamatasan sang mga Sidonhon, malinong kag malig-on, walay bisan sin-o sa duta, nga may gahum, nga makapakahuya sa ila sa bisan anong butang, kag malayo sila sa mga Sidonhon kag wala sila sing mga paghisayo sa bisan kay sin-ong tawo.

Ilonggo (Maayong Balita nga Biblia (2012))

Gani ang lima ka mga lalaki naghalin, kag naglakat pakadto sa banwa sang Lais. Nakita nila kon daw ano kalig-on ang pag-estar didto sang mga pumoluyo pareho sang mga Sidonhon. Mahidaiton sila kag mahipos nga mga tawo, kag wala sing kasuayon sa kay bisan sin-o. Wala sila ginakulang sang ila mga kinahanglanon. Nagaestar sila nga malayo sa mga Sidonhon, kag wala sila nagapakig-angot sa iban nga mga katawhan.

Ilonggo APD 2022 (Ang Pulong Sang Dios)

Nagpadayon ining lima ka lalaki kag nakaabot sila sa Laish. Nakita nila nga matawhay ang pagpangabuhi sang mga tawo didto pareho sa mga Sidonhon. Malinong ini nga lugar, kag ara ang tanan nga kinahanglan sang mga tawo. Nagasalig gid ang mga pumuluyo nga wala sing may mag-ano sa ila. Ini nga lugar malayo sa mga Sidonhon, kag wala sila sing kadampig nga banwa.