Joshua 8:33 — Compare Translations

Mien Bible (Thai Script) © Thailand Bible Society, 2007

อิ​สะ​ลา​เอน เญย หฒวัง เมี่ยน, ไม้ กุ๊น ป๊วน-เต่ย เมี่ยน ไฟ เยียม นิ่น บัว บุด๋ง เญย กั้น ฝีง เมี่ยน, เหธา เมี่ยน โก๋, เหธา โหฒว โฮล เญย เจียน, เหธา เซี้ยม ฒุ์ย เจียน, โซ้ว เจี๊ยน เฒี้ยว เญย แล์ง แหง่ง หว่า ฟาง อี ปูง กะเฮลน, เยียม แกง แล์ง แหง่ง หว่า ฟาง เญย เล​วี ไซ เมี่ยน เญย หฑะเฮมียน. อิ​สะ​ลา​เอน เมี่ยน เหยียด ป่วน โซ้ว เจี๊ยน เก​ลิ​ซิม บง หฑะเฮมียน แหมง, เหยียด ป่วน โซ้ว เอ​บาน บง หฑะเฮมียน แหมง, ฮนั้ง เฒี้ยว เญย โปว, โม​เซ, ฒิ่น ด่าง พ้าย เหฒียง นิ่น บัว เหว่ย ปวัง หว่า ปุน อิ​สะ​ลา​เอน เมี่ยน.

ฉบับอักษรโรมันใหม่ - Thailand Bible Society, 2007

I^saa^laa^en nyei zuangx mienh, maiv gunv buonv-deic mienh fai yiem ninh mbuo mbu'ndongx nyei ganh fingx mienh, caux mienh gox, caux zoux hlo nyei jien, caux siemv zuiz jien, souv jienv Ziouv nyei Laengz Ngaengc Waac Faang i bung ga'hlen, yiem gaeng Laengz Ngaengc Waac Faang nyei Lewi sai mienh nyei nza'hmien. I^saa^laa^en Mienh yietc buonc souv jienv Ge^li^sim Mbong nza'hmien maengx, yietc buonc souv E^mbaan Mbong nza'hmien maengx, hnangv Ziouv nyei bou, Mose, zinh ndaangc paaiv ziangx ninh mbuo weic buang waac bun I^saa^laa^en Mienh.