1 Thessalonians 4

Mien Bible (Thai Script) © Thailand Bible Society, 2007

← Chapter 3 Jump to: Chapter 5 →

1ก๋อ- โย์ว อ่า, เซ้ด เมว์ย แอ๋ง ม่าย เต๋ย หว่า ก๊อง. เยีย บัว หฌาว เจี๋ย เม่ย บัว ฮนั้ง หาย นอ เยียม เสย หฒั่ง โหฒว หอบ ทิน-ฮู่ง เญย เฮญี้ยว. เซ ฮนั้ง อี้ หฒั่น เม่ย บัว เยียม นอ. มป่า อี้ หฒั่น เยีย บัว เหว่ย เฒี้ยว เยซู โท้ เม่ย บัว หย่า ขวิน เม่ย บัว อ๋อย หฒุ โหฒว จา ธั้ม เจี๊ยน ฝาว.

2เม่ย บัว ฮิ้ว ตุ๊ เยีย บัว หล่ง เฒี้ยว เยซู เญย หัด ม์า ฮนั้ง หาย นอ พ้าย เหฒียง เม่ย บัว.

3ทิน-ฮู่ง เญย เอ๋ย เซ ฮนั้ง น้าย. นิ่น อ๋อย เม่ย บัว โหฒว ธีง-เหฑ่ง, ซิ้ม ฆอย เหฮยียน เญย สี่.

4เม่ย บัว เก๊าะ-เมี่ยน อ๋อย หฒุ ฮิ้ว ตุ๊ ฮนั้ง หาย นอ หล่ง ธีง-เหฑ่ง เญย, ท่าย เญย หฒะเอ๋ย กุ๊น กั้น เญย ซิน.

5ไม้ ตู๋ง เซว่ย กั้น เญย เฮญี้ยว หั่น โหฒว, ฮนั้ง ไม้ เสียน ทิน-ฮู่ง เญย เมี่ยน โหฒว นอ.

6ฮนั้ง หน่าย, เยียม น้าย เต๋ย สี่, หาย เต้า ไม้ ตู๋ง โหฒว ต่อง ไฟ โหฒว เจี๋ย ด่าง หอบ หฒุ โหฒว เญย ปุน นิ่น เญย ก๋อ-โย์ว. น้าย เต๋ย หว่า ฒิ่น ด่าง เยีย บั๋ว เจี๋ย เม่ย บัว, หย่า เฮนี้ยๆ เญย ขวิน เม่ย บัว, เหว่ย หฒุ หาย เต้า โหฒว น้าย เต๋ย สี่, วั้ว เต้า ฯฒฯ หฒุ เฒี้ยว ตี่ง ฒุ์ย อ๊ะ.

7ทิน-ฮู่ง เห่ว บัว ต้าย ไม้ เฒ์ย เหว่ย โหฒว ไม้ ธีง-เหฑ่ง. นิ่น อ๋อย บัว โหฒว ธีง-เหฑ่ง เญย.

8ฮนั้ง หน่าย, หาย เต้า เฆ่ม น้าย เต๋ย หฌาว เญย หว่า, วั้ว เต้า ไม้ เฒ์ย เฆ่ม ป้าม เมี่ยน เซ เฆ่ม ทิน-ฮู่ง, ต้ง เหธย สีง ลี่ง ปุน เม่ย บัว วั้ว เต้า.

9ก๊อง เถา ฮนั้ม ก๋อ-โย์ว เญย สี่ เยีย บัว ไม้ หฒุ เฟี้ย, เหว่ย หฒุ เม่ย บัว กั้น ตุ๊ ทิน-ฮู่ง หฌาว ลิ์ว เม่ย บัว ล่าน อ๋อย หฒุ ฮนั้ง หาย นอ ฮนั้ม ล่าน.

10เม่ย บัว ฒู้ง ฮนั้ง น้าย นอ ฮนั้ม เยียม ก๋อม มาซีโดเนีย แซ้ง เญย หฒวัง ก๋อ-โย์ว. มป่า ก๋อ-โย์ว อ่า, เยีย บัว ขวิน เม่ย บัว อ๋อย หฒุ จา ฮนั้ม นิ่น บัว ธั้ม เจี๊ยน ฝาว.

11อ๋อย หฒุ เหลียบ ตี่ง เฮญี้ยว โหฒว ป๊วน-ส่วน เมี่ยน, โก๋ว กั้น เญย หฑะเฮมียน หย่า หล่ง กั้น เญย ปั์ว โหฒว กง ยู์ง แหม่ง, ฮนั้ง ฒิ่น ด่าง เยีย บัว บั๋ว เม่ย บัว วั้ว นอ.

12ฮนั้ง น้าย นอ โหฒว เม่ย บัว ฯฒฯ ตุ๊ กะเหญี่ย เญย เมี่ยน ท่าย เม่ย บัว, หย่า ไม้ หฒุ ปั่ง หาย เต้า ตุ๊ เม่ย บัว เฉียม หล่ง เญย กะน้าย.

13หฒวัง ก๋อ-โย์ว อ่า, เยีย บัว อ๋อย เม่ย บัว เฒียนๆ เญย ฮิ้ว ตุ๊ ไต่ มี่ง เญย เมี่ยน ฮนั้ง หาย นอ, เหว่ย ปุน เม่ย บัว ไม้ หฒุ เฑ่า ฮนั้ง วั้ว เต๋ย ไม้ ลั่ม ฮนั้ม เญย เมี่ยน เฑ่า นอ.

14เยีย บัว เสียน เยซู ไต่ มี่ง แอ๋ง นั่ง ต้าย ฯฒฯ เสียน ทิน-ฮู่ง หย่า อ๋อย ต้อ เหยียด ฒู้ง เสียน เยซู เญย เมี่ยน, ต้ง ไต่ มี่ง วั้ว เต๋ย, เหธา เจี๊ยน เยซู เหยียด เจ๊า แอ๋ง ต้าย.

15อี้ หฒั่น เยีย บัว บั๋ว เม่ย บัว เญย เซ หฒิว เฒี้ยว หฌาว เยีย บัว เญย หว่า. เฒี้ยว แอ๋ง ต้าย วั้ว ฮนอย, บัว หธ่อ เฒี่ยง เจี๊ยน เญย เมี่ยน ฒู้ง ไม้ ตุ๊ มี่ง ด่าง ไต่ มี่ง เญย เมี่ยน.

16วั้ว หฒั่น เฒี้ยว กั้น ฯฒฯ เยียม วั้ว ทิน-ต้อง เหฌี่ย ต้าย. ม่าย เฉีย หัด บุย เญย, แอ๋ง ม่าย ฟิน-เมี่ยน เปย๊ย เญย เฉีย หย่า ม่าย ทิน-ฮู่ง เญย หฑัด บุย. เสียน ลิ์ว กีตู่, ไต่ มี่ง วั้ว เต๋ย, ฯฒฯ นั่ง ด่าง.

17ฆะฮ้า บัว หธ่อ เฒี่ยง เจี๊ยน เญย เมี่ยน เหธา นั่ง ต้าย วั้ว เต๋ย ฯฒฯ ฝาว มี่ง เยียม บ๋วน กะญั์ว ปวั้ง เฒี้ยว เยียม วั้ว ด๊าม-ลู่ง. ฮนั้ง หน่าย, บัว ตุ๊ เหยียด ลิ์ว เหธา เฒี้ยว เยียม.

18เหว่ย น้าย อ๋อย หฒุ หล่ง น้าย เต๋ย หว่า ล่าน ออน ล่าน เญย เฮญี้ยว.

← Chapter 3 Jump to: Chapter 5 →