Ephesians 6

Институт перевода Библии, 2022

← Chapter 5 Jump to:

1Háy balalar, Iyemizge tiyisli bolǵan sizler, ata-anańızǵa boysınıńlar! Sebebi usılay islegenińiz durıs boladı.

2«Ata-anańdı húrmetle», – bul wáde menen birge berilgen eń baslı buyrıq.

3Sol wáde bolsa mınaday: «Sonda sen bereket tabasań hám jerdegi ómiriń uzaq boladı».

4Háy ákeler, balalarıńızdıń ashıwın keltirmeńler. Olardı Iyemizdiń tálim-tárbiyası menen ósirińler.

5Háy qullar, dúnyadaǵı xojayınlarıńızdıń sózin Masiyxtıń sózin tıńlaǵanday, tereń húrmet, qorqıw hám pák júrek penen tıńlańlar.

6Bunı adamlarǵa jaqsı kóringisi keletuǵınlar sıyaqlı, kózabaǵa islemeńler. Qudaydıń qálewin Masiyxtıń qulları sıpatında shın júrekten orınlańlar.

7Adamlarǵa emes, al Iyemizge xızmet etip atırǵanday, inta menen xızmet etińler.

8Óytkeni qul bolsın, azat adam bolsın, hár bir adamnıń islegen jaqsılıǵınıń Iyemizden qaytatuǵının bilesizler.

9Háy xojayınlar, sizler de qullarıńızǵa usınday qatnasta bolıp, olardı qorqıtıwdı toqtatıńlar. Sebebi olardıń da, sizlerdiń de Iyeńiz aspanda ekenin hám Onıń adamlardı ayırmaytuǵının bilesizler.

10Juwmaqlap aytqanda, Iyemiz benen qatnasta bolıp, Onıń qúdiretiniń kúshi menen bekkemlenip barıńlar.

11Shaytannıń hiylelerine qarsı tura alıw ushın, Qudaydıń barlıq sawıt-saymanları menen qurallanıńlar.

12Óytkeni urısımız qan hám etten ibarat bolǵan adam balasına qarsı emes, al bul dúnyadaǵı kózge kórinbeytuǵın hákimlerge, biylewshilerge, bul qarańǵı zamannıń kúshlerine hám aspandaǵı jawız ruwxlarǵa qarsı.

13Sonlıqtan jaman kúnde olarǵa qarsılıq kórsete alıwıńız ushın hám tolıq jeńiske eriskenińizden soń, bekkem tura alıwıńız ushın, Qudaydıń barlıq sawıt-saymanları menen qurallanıńlar.

14Solay etip, ornıńızda bekkem turıńlar. Belińizdi haqıyqat belbewi menen buwıp, kókiregińizge haqlıq sawıtın kiyińler.

15Tınıshlıq Xosh Xabarın járiyalaw tayarlıǵın ayaqlarıńızǵa ayaq kiyim qılıp kiyińler.

16Bulardıń hámmesine qosa shaytannıń barlıq otlı oqların óshire alatuǵın isenim qalqanın qollarıńızǵa alıńlar.

17Qutqarılıw duwlıǵasın hám Qudaydıń sózi bolǵan Muxaddes Ruwxtıń qılıshın alıńlar.

18Hár túrli tilek hám jalbarınıw menen, Muxaddes Ruwxtıń basqarıwında hámme waqıt duwa etińler. Usı maqset penen sergek bolıp, pútkil muxaddesler ushın taban tirep sorańlar.

19Men ushın da duwa etińler. Awzımdı hár ashqanımda maǵan kerekli sóz berilip, Xosh Xabardıń sırın batırlıq penen bildire alayın.

20Jáne de, Xosh Xabar ushın elshi bolǵan men házir tutqın bolsam da, Xosh Xabardı ılayıqlı túrde mártlik penen járiyalawım ushın da duwa etińler.

21Awhalımnıń qalay ekenin hám ne islegenimdi sizler de biliwińiz ushın, súyikli tuwısqanımız hám Iyemizdiń isenimli xızmetshisi Tixik sizlerge hámmesin aytıp beredi.

22Mine, men usı maqset penen onı sizlerge jiberip atırman. Ol hal-jaǵdayımızdı bildirip, sizlerdiń kewillerińizge jubanısh beredi.

23Ákemiz Quday hám Iyemiz Iysa Masiyx tuwısqanlarǵa tınıshlıq hám isenim menen birlikte súyispenshilik bersin.

24Iyemiz Iysa Masiyxtı óshpes súyispenshilik penen súyiwshilerdiń hámmesine Qudaydıń miyrimi yar bolsın!

← Chapter 5 Jump to: