Judges 18:7 — Compare Translations

Kamba (MBIVILIA ŨVOO MŨSEO)

Kwoou andũ asu atano nĩmaumie vau mathi ndũanĩ ya Laisa. Nĩmoonie ũndũ andũ ma vau mekalaa me ũsũvĩonĩ, ta andũ ma Sitoni. Mekalaa na mũuo, matena w'ĩa wa kũvithũkĩwa nĩ amaitha, na maĩ na syĩndũ syonthe ila maĩ na vata nasyo. Matũaa vaasa na andũ ma Sitoni na mayaĩ na ngwatanĩo ya ũndũ o na ũmwe na andũ ala angĩ.

Kamba (Mbivilia) 1956

Nĩvo ĩndĩ ala andũ atano maendie, na mavika Laisa, na moona andũ ala maĩ nthĩnĩ wayo, ũndũ matũaa meyelele, o tondũ Asitoni matwĩe, mauĩtye na meyelele; nũndũ kũtyaĩ mũndũ nthĩnĩ wa nthĩ ĩsu waĩ na ũtonyi ũla waĩ amasonokya ũndũnĩ o na wĩva, namo maĩ kũasa na Asitoni, na matyaĩ na ũndũ na mũndũ o na wĩva.