2 Thessalonians 3

Kamba (Mbivilia) 1956

← Chapter 2 Jump to:

1Kũminũkĩlya, ana‐a‐asa, tũvoyeei, kana ndeto ya Mwĩaĩi ĩtonye ũthi ĩsembete na kũtaĩwa, o ũndũ ĩtilyĩ kwenyu;

2na kana tũtangĩĩwe kwa andũ mbaa matũ na andũ athe; nũndũ ti andũ onthe me na mũĩkĩĩo.

3Ĩndĩ Mwĩaĩi e na kĩthito, nake akamũlũlũmĩlya, na kũmũsũvĩa kwa ũla mũthũku.

4Na nĩtũũmũĩkĩĩa Mwĩaĩi kwondũ wenyu, kana nĩmũkwĩka maũndũ ala tũmwĩaĩaa na mũkamekaa.

5Na Mwĩaĩi natongoesye ngoo syenyu ilike wendonĩ wa Ngai, na wũmĩĩsyonĩ wa Klĩsto.

6Nĩtũũmwĩaĩa, ana‐a‐asa, syĩtwanĩ ya Mwĩaĩi waitũ Yesũ Klĩsto, kana mwĩvathane na kĩla mwana‐a‐asa ũla ũvikĩlaa maũndũ mataĩle, na ti kũvikĩla ũmanyĩsyo ũla mwoosie kwitũ.

7Nũndũ inyw’ĩ ene nĩmwĩsĩ ũndũ mwaĩlwe nĩ kwĩelekan’ya naitũ: nĩkwĩthĩwa tũtyaavikĩla maũndũ mataĩle yĩla twaĩ kwenyu:

8o na tũtyaaya lĩu wa mũndũ o na wĩva mana, ĩndĩ wĩanĩ wĩ vinya na ũnyamaonĩ, ũtukũ na mũthenya twatethisye wĩa, nĩ kana tũikamũtw’ĩkĩe mũio mũndũ o na wĩva kwenyu:

9ti kwĩthĩwa tũti na ũkũmũ, ĩndĩ nĩ kana twĩtw’ĩkĩthye ngelekan’yo kwenyu, nĩ kana inyw’ĩ mwĩelekanasye naitũ.

10Nũndũ o yĩla twaĩ nenyu, nĩtwamwĩaĩe ũũ. Ethĩwa mũndũ o na wĩva ndekwenda kũtethya wĩa, o na kũya, ndakaye.

11Nũndũ nĩtũkwĩw’a ũvoo wa andũ amwe ala maendaa katĩ wenyu ũndũ ũtaĩle, ala matatethasya wĩa nongi, ĩndĩ nĩ elikya maũndũnĩ ma andũ angĩ.

12Na ala mailyĩ ũu nĩtũũmeaĩa na kũmataa nthĩnĩ wa Mwĩaĩi Yesũ Klĩsto, kana matethye wĩa mauĩtye, na kũya lĩu woo ene.

13Ĩndĩ inyw’ĩ, ana‐a‐asa, mũikanoe nĩ kwĩka nesa.

14Na ethĩwa mũndũ o na wĩva ndew’aa ndeto yaitũ ya valũa ũũ, mũsisyei mũndũ ũsu, mũikavulane nake, nĩ kana asonoke.

15Ĩndĩ mũikamũtale kwĩthĩwa nĩ mũmaitha, ĩndĩ mũtaei ta mwana‐a‐asa.

16Na yu Mwĩaĩi wa mũuo we mwene namũnenge mũuo mavinda onthe maũndũnĩ onthe. Mwĩaĩi nĩethĩwe vamwe nenyu inyw’onthe.

17Ngethi yakwa, nyie Vaulo, na kw’oko kwakwa mwene, naw’o nĩ ũvano kĩla valũanĩ; ũu nĩw’o nĩandĩkaa.

18Mumo wa Mwĩaĩi waitũ Yesũ Klĩsto nĩwĩthĩwe vamwe nenyu inyw’onthe.

← Chapter 2 Jump to: