1 Thessalonians 2

Kikuyu Bible (IBUKU RĨRĨA ITHERU RĨA NGAI)

← Chapter 1 Jump to: Chapter 3 →

1NĨ gũkorũo nĩmũũĩ inyuene, ariũ a Ithe witũ, ũrĩa twakinyire kũrĩ inyuĩ, atĩ tũtiokire o tũhũ:

2no rĩrĩ, o na mbere, twanyarirũo na tũgaconorũo rĩrĩa twarĩ kũrĩa Filipi, ta ũrĩa mũũĩ-rĩ, nĩ kũũmĩrĩria twomĩrĩirie nĩ ũndũ wa Ngai witũ, tũkĩmũhe inyuĩ Ũhoro-ũrĩa-Mwega wa Ngai, o tũgĩkararagio mũno.

3Nĩ ũndũ ũhoro ũrĩa tũtaaranaga naguo nduumanĩte na ũhoro wa kũhĩtithania, kana ũhoro wa waganu, kana wa wara:

4no rĩrĩ, nĩ kwaria twaragia o ta ũrĩa Ngai atwĩtĩkĩrĩtie, agagĩtũigĩra Ũhoro-ũrĩa-Mwega tũũramatage; na ti andũ tũkenagia, no Ngai, o we ũtuĩragia ngoro ciitũ ũrĩa itariĩ.

5Nĩ gũkorũo gũtirĩ hĩndĩ twanakorũo tũkĩaria ciugo cia kwĩendereria kũrĩ andũ, o ta ũrĩa mũũĩ, o na kana tũkarindĩrĩra ũhoro wa gũcumĩkĩra indo; Ngai nĩwe mũira.

6Na ningĩ-rĩ, tũtiacaragia ũhoro wa gũkumio nĩ andũ, (inyuĩ kana andũ angĩ), o na tũngĩahotire kũmũritũhĩra tũkĩenda gũtĩwo, tondũ atĩ tũrĩ atũmwo a Kristo.

7No rĩrĩ, twatũũrainie na inyuĩ tũrĩ ahoreri, o ta ũrĩa mũreri amenyagĩrĩra ciana ciake mwene.

8Ũguo no taguo, tondũ wa ũrĩa twamwĩriragĩria twĩ na wendo-rĩ, twakenire nĩ kũmũgaĩra Ũhoro-ũrĩa-Mwega wa Ngai, na to Ũhoro wiki, no makĩria o na mĩoyo iitũ nayo, nĩ ũndũ nĩmwatuĩkĩte andũ ende mũno nĩ ithuĩ.

9Amu no mũkũririkana, ariũ a Ithe witũ, ũrĩa twarutaga wĩra wa hinya o tũkĩĩnogagia, na tũkarutaga wĩra ũtukũ na mũthenya, hĩndĩ ĩrĩa twamũhunjagĩria Ũhoro-ũrĩa-Mwega wa Ngai, nĩ getha tũtikae kũritũhĩra mũndũ o na ũmwe wanyu.

10Inyuĩ mũrĩ aira, nake Ngai no mũira, wa ũrĩa twatũire na inyuĩ arĩa mwĩtĩkĩtie tũrĩ atheru, na tũrĩ athingu, na tũtarĩ na ũcuke.

11Ningĩ nĩmũũĩ atĩ nĩtwamwĩkaga, o mũndũ o mũndũ, ta ũrĩa mũthuri ekaga ciana ciake mwene, tũkamũhatagĩrĩria, na tũkamũũmagĩrĩria, o na tũkamuumbũragĩra ũhoro,

12nĩ getha mũthiage na mĩthiĩre ĩrĩa yaganĩrĩire na andũ a Ngai, o we ũmwĩtaga mũtonye ũthamaki-inĩ wake mwene, o na mũgĩe na riri wake.

13Ningĩ nĩtũcokagĩria Ngai ngatho tũtegũtigithĩria nĩ ũndũ wa rĩrĩ, atĩ hĩndĩ ĩrĩa mwetĩkĩrire Ũhoro wa Ngai ũrĩa mwaiguire na ithuĩ-rĩ, mũtiawamũkĩrire ta arĩ ũhoro wa andũ, no ta arĩ Ũhoro wa Ngai, - na nĩ ma, nĩguo ũtariĩ; na nĩguo ũrutaga wĩra waguo thĩinĩ wanyu inyuĩ mwĩtĩkĩtie.

14Amu inyuĩ, ariũ a Ithe witũ, nĩmwatuĩkire a kwĩgerekanagia na makanitha ma Ngai marĩa me thĩinĩ wa Kristo Jesu kũrĩa Judea. Nĩ ũndũ o na inyuĩ nĩmwanyamaririo nĩ andũ a kwanyu na mĩnyamaro o ĩrĩa andũ acio nao maanyamaragio nayo nĩ Ayahudi;

15o arĩa moragire Mwathani Jesu, o na anabii, na ningĩ magĩtũingata ithuĩ, na matikenagia Ngai, magaikara mareganĩte na andũ othe.

16Nao nĩo matũkaanagia tũtikahunjĩrie andũ arĩa, matarĩ Ayahudi ũhoro, nĩguo mahonokio. Ũguo noguo maiyũragĩrĩria mehia mao hĩndĩ ciothe. Ĩndĩ marakara ma Ngai nĩmamakinyĩrĩire o kũmakinyĩrĩra.

17No ithuĩ, ariũ a Ithe witũ, tondũ nĩtwatigithanirio na inyuĩ kahinda kanini, ha ũhoro wa mwĩrĩ, na ti wa ngoro, nĩtwageragia na kĩyo kĩnene makĩria gũcoka kuonana na inyuĩ ũthiũ na ũthiũ, tũkĩmwĩriragĩria mũno:

18tondũ nĩ kwenda twendaga gũũka kũrĩ inyuĩ, na makĩria niĩ Paulo, o kaingĩ. Nake Shaitani aanatũgiria.

19Amu kĩĩrĩgĩrĩro giitũ-rĩ, kaĩ arĩ kĩrĩkũ? O na kana gĩkeno giitũ, kana thũmbĩ iitũ o ĩrĩa twĩrahaga nĩ ũndũ wayo? Githĩ to inyuĩ, rĩrĩa tũkarũgama mbere ya Mwathani witũ Jesu hĩndĩ ĩrĩa agoka?

20Nĩ ũndũ mwĩraho witũ o na gĩkeno giitũ nĩ inyuĩ.

← Chapter 1 Jump to: Chapter 3 →