2 Thessalonians 3

Kikuyu Bible (IBUKU RĨRĨA ITHERU RĨA NGAI)

← Chapter 2 Jump to:

1NAGUO ũhoro wa kũrigĩrĩria nĩ atĩrĩ, ariũ a Ithe witũ, tũhoyagĩrei nĩguo Ũhoro wa Mwathani ũtambage narua, na ũkumagio o ta ũrĩa ũtũire ũkumagio kũu kwanyu:

2na ningĩ atĩ tũhonokio kũrĩ andũ arĩa matangĩigua kĩhooto, o na arĩa oru; nĩ gũkorũo ti andũ othe metĩkĩtie.

3Ĩndĩ Mwathani nĩ wa kwĩhokeka, nake nĩwe ũgatũma mũikarage mũrũmĩte wega, na amũgitagĩre kũrĩ ũrĩa mũũru.

4Na nĩtwĩhokete Mwathani ũhoro-inĩ wanyu atĩ gwĩka nĩmwĩkaga, o na mũgũtũũra o mwĩkaga maũndũ marĩa tũmwathaga.

5Nake Mwathani aroonagĩrĩria ngoro cianyu kũgĩa na wendani wa Ngai, na gũkirĩrĩria na ũkirĩrĩria ũrĩa wa Kristo.

6Rĩu-rĩ, ariũ a Ithe witũ, nĩtũkũmwatha na rĩĩtwa rĩa Mwathani witũ Jesu Kristo, atĩ mũtiganage na mũrũ wa Ithe witũ o wothe ũrĩa ũikaraga ta mũndũ ũtarĩ kĩhaarĩro, akaaga kũrũmia kĩrĩra kĩrĩa mwatigĩirũo nĩ ithuĩ.

7Nĩ gũkorũo nĩmũũĩ inyuene ũrĩa mwagĩrĩirũo nĩ kwĩgerekanagia na ithuĩ: amu tũtiatũũraga ta andũ matarĩ kĩhaarĩro hĩndĩ ĩrĩa twatũire na inyuĩ,

8o na kana tũkarĩa irio cia mũndũ o na ũrĩkũ tũhũ; no nĩ kũruta twarutaga wĩra wa hinya ũtukũ na mũthenya tũkĩĩnogagia, nĩ getha tũtikae kũritũhĩra mũndũ o na ũmwe wanyu.

9Na rĩrĩ, ti atĩ tũtirĩ na kĩhooto gĩa kũmũritũhĩra, no nĩ kũruta twarutaga wĩra ũguo nĩ getha tũtuĩke cionereria kũrĩ inyuĩ, nĩguo mũtũũre mwĩgerekanagia na ithuĩ.

10Nĩ ũndũ-rĩ, o na hĩndĩ ĩrĩa twatũire hamwe na inyuĩ, ũndũ ũyũ nĩguo twamwathaga atĩ, Mũndũ o na ũrĩkũ angĩrega kũruta wĩra-rĩ, o na kũrĩa nĩatigage kũrĩa.

11Amu nĩtũiguaga atĩ nĩkũrĩ andũ amwe anyu matũũraga ta andũ matarĩ kĩhaarĩro, matarĩ na wĩra marutaga, no gwĩtonyereria metonyagĩrĩria maũndũ-inĩ ma andũ arĩa angĩ.

12Acio nĩo tũgwatha na tũkamahatĩrĩria, twĩ thĩinĩ wa Mwathani Jesu Kristo, atĩ marutage wĩra makindĩirie, na marĩage o irio ciao ene.

13No inyuĩ-rĩ, ariũ a Ithe witũ, mũtikananogio nĩ gwĩkaga wega.

14Na rĩrĩ, mũndũ o na ũrĩkũ angĩkorũo nĩekũrega kũigua ũhoro witũ ũrĩa wĩ marũa-inĩ maya-rĩ, wĩhũgũragĩrei mũndũ ũcio mũtigatwarane nake, nĩ getha aconoke.

15Ĩndĩ mũtikamũtue thũ yanyu, no kaba mũmũtaarage ta arĩ mũrũ wa Ithe wanyu.

16Na rĩrĩ, Mwathani mwene thayũ we mwene aromũhe thayũ hingo ciothe, o na maũndũ-inĩ mothe. Mwathani aroikara na inyuĩ inyuothe.

17Ngeithi ici ngwandĩka na guoko gwakwa mwene, niĩ Paulo, naguo ũguo nĩguo kĩmenyithia kĩa marũa makwa mothe: nĩ ũguo nyandĩkaga.

18Wega wa Mwathani witũ Jesu Kristo ũrogĩa na inyuĩ inyuothe.

← Chapter 2 Jump to: