1 Thessalonians 2

Luganda (BIBU1) (BIBULIYA ENTUKUVU)

← Chapter 1 Jump to: Chapter 3 →

1Abooluganda, nammwe mumanyi bulungi ng'okujja kwaffe ewammwe tekwafa busa.

2Mumanyi nga bwe twabonaabona e Filippi, ne batuyisa bubi; kyokka olw'obwesige bwe twalina mu Katonda waffe, twabayigiriza n'obuvumu Evangili ya Katonda wakati mu kuwakanyizibwa okungi.

3Okubakubiriza kwe tukola gye muli tekuva mu bulimba, oba mu kugenderera bya buseegu oba eby'okubalabankanya,

4wabula tukikola kubanga Katonda yatusiima n'atukwasa Evangili; naffe bwe twogera, tetugenderera kusanyusa bantu, wabula Katonda ageza emitima gyaffe.

5Mumanyi bulungi nti tetubangako lwe twogera lwa kunyumiikiriza yadde okugendereramu eby'okufuna; Katonda ye mujulirwa waffe.

6Tetwanoonyanga kutendebwa bantu, yadde mmwe mwennyini, nandibadde abalala.

7Sso nno ke tuli abatume ba Kristu, twandisobodde okubaako kye tubasabayo. Naye ewammwe twali ba ddembe; twali ng'omuzadde agabirira abaana be.

8Olw'okubaagala tutyo, twasiima si kubawa Vangili ya Katonda yokka, naye naffe ffennyini okubeewa, kubanga mwali mufuuse baganzi gye tuli.

9Abooluganda, mujjukire okukola kwaffe n'okutegana; bwe twalinga tuyigiriza Evangili ya Katonda, twakolanga emisana n'ekiro tubulweko gwe tukaluubiriza.

10Mujja kutujulira, ne Katonda yennyini atujulira, nti tweyisa mu ngeri entuukirivu, entuufu era eteriiko musango eri mmwe abakkiriza.

11Mumanyi nti twabakubiriza kinnoomu mu mmwe nga kitaawe w'abaana bw'abakola, ne tubagumya nga tubeekubako

12muyise mu ngeri esaanidde Katonda abayita mu bwakabaka bwe ne mu kitiibwa kye.

13Era twebaza Katonda obutasalako, kubanga bwe mwafuna ekigambo kya Katonda nga tukibabuulidde, temwakikkiriza ng'eky'abantu, naye era nga bwe kiri mu mazima: ng'ekigambo kya Katonda, kati ekikola mu mmwe abakkiriza.

14Abooluganda, mwafaananira ddala Ekleziya za Katonda mu Kristu Yezu ez'omu Buyudaaya; anti nammwe bannansi bannammwe baababonyaabonya mu ngeri ye emu nga bali Abayudaaya bwe baabakola,

15abo abatta Omukama Yezu n'abalanzi, naffe abaatugobaganya; Katonda tebamusanyusa, bawakanya n'abantu bonna,

16kubanga tebatuganya kuyigiriza ab'amawanga balyoke balokoke; bwe batyo bulijjo ekipimo ky'ebibi byabwe ne bakireegera ddala okutuusa gye kikoma. Naye kyaddaaki kati obusungu bw'Omukama bubajjidde.

17Abooluganda, akabanga ako akatono ke twayawukana, - mu mubiri naye si mu mutima – twayagala ekisukkiridde n'okwegomba kungi okubalabirako ddala maaso ku maaso.

18Kubanga twayagala okujjako ewammwe, - nze nzennyini Pawulo nakigezaako emirundi egiwerako, - naye Sitaani n'atuziyiza.

19Okuggyako mmwe, tulinayo ssuubi ki eddala oba essanyu, oba engule gye tulyetenderamu mu maaso ga Mukama Yezu Kristu lw'alijja?

20Mmwe kitiibwa kyaffe, mmwe ssanyu lyaffe.

← Chapter 1 Jump to: Chapter 3 →