2 Thessalonians 3

Luganda (BIBU1) (BIBULIYA ENTUKUVU)

← Chapter 2 Jump to:

1Ekisembayo, abooluganda, mutusabire, ekigambo ky'Omukama kitolontoke, kifune ekitiibwa nga bwe kyakola eyo,

2naffe tuwonyezebwe abantu ababi abagwagwa; anti okukkiriza tekuli mu bonna.

3Katonda ye mwesigwa; ajja kubanyweza abawonye akabi.

4Tuli bakakafu ku mmwe mu Mukama nti mukola era mujja kukolanga bye twabalagira.

5Omukama alambike emitima gyammwe mwagale Katonda, mulinde Kristu n'obugumiikiriza.

6Abooluganda, mu linnya lya Mukama waffe Yezu Kristu, tubakuutira okweggya ku buli waaluganda adda mu kulendera, atagoberera mpisa ze mwatuyigirako.

7Mumanyi mmwe mwennyini bwe muteekwa okulabira ku ffe; ffe bwe twali eyo ewammwe, tetwalenderanga bulendezi;

8tewali we twalyanga mmere ku bwereere; wabula twakolanga ne tutegana ekiro n'emisana tuleme kubaako gwe tukaluubiriza.

9Si kubanga twali tetusaanidde mpeera, naye twayagala kubawa kyakulabirako nammwe mukole nga ffe.

10Ndaba ne bwe twali eyo ewammwe, ekyo kye twabakuutira, nti oba oli tayagala kukola, n'okulya aleme kulya.

11Anti tuwulira mbu abamu mu mmwe balendera bulendezi, basobeza abalala, tebalina kye bakola.

12Tulagira ab'engeri eyo mu Mukama Yezu Kristu era tubakubiriza bagende nga bakola mu kasirise, beefunire bo bennyini kye banaalya.

13Abooluganda, temukoowanga kukola bulungi.

14Oba waliwo atawulira kigambo kye tubawandiikidde mu bbaluwa eno, oyo mumulambe, mumwesambe, alyoke aswale.

15Naye temumuyisa ng'omulabe, wabula mumukomeko ng'owooluganda.

16Omukama oyo kiwamirembe, abawe emirembe ennaku zonna ne mu buli ngeri. Omukama abeere nammwe mwenna.

17Okulamusa kuno nzennyini Pawulo nkuwandiise n'omukono gwange; ke kabonero ku buli bbaluwa yange; bwe ntyo bwe mpandiika.

18Eneema ya Mukama waffe Yezu Kristu ebeere nammwe mwenna.

← Chapter 2 Jump to: