2 Chronicles 30:1 — Compare Translations

Madurese Bible 1994 (ALKETAB E DHALEM BASA MADURA)

Ra'yat gi' ta' ngenneng mabadha paraya'an Paska teppa' e baktona iya areya e bulan settong, sabab mam-imam se nyocce'e ba'na gi' ce' sakone'na ban gi' ta' bannya' oreng se akompol e Yerusalim. Daddi Rato Hizkiya ban ba-ponggabana sarta reng-oreng Yerusalim padha saroju' araya'agiya Paska jareya e dhalem bulan dhuwa', ban kabbi padha perak narema rancana jareya. Rato laju akerem sorat ka sakabbinna oreng e saantero Isra'il ban Yehuda. Bariya keya ka oreng Efraim ban Manasye. Sakabbinna oreng Isra'il dhari dhaerana suku Dan e bagiyan dhaja, sampe' ka Bersyeba e bagiyan lao' eonjang ka Padalemman socce e Yerusalim kaangguy araya'agi Paska ban ngormadi PANGERAN, Allahna Isra'il akantha se la etantowagi e dhalem kom-hokomma Mosa. Sajjegga ta' tao Paska eraya'agi akantha jareya.