Madurese Bible 1994 (ALKETAB E DHALEM BASA MADURA)
Badha toronanna Saul laenna, iya areya Mefiboset, pottrana Yonatan. Mefiboset jareya dippang molae e bakto aomor lema taon, iya areya e bakto Saul ban Yonatan adinggal dunnya. Sabab e bakto badha kabar dhari kottha Yizre'el parkara sedana Saul ban Yonatan jareya, anjuna Mefiboset ngemban kana' jareya pas buru; tape sarrena babine' jareya ru-kaburu, kana' jareya labu sampe' dippang. E bakto meyarsa kabar ja' Abner la epate'e e Hebron, Isyboset pottrana Saul, laju tako', bariya keya ra'yat Isra'il. Isyboset kaagungan parwira kadhuwa se daddi kapalana pasukan panyerrang; se settong nyamana Ba'ana, settonganna Rekhab. Se kadhuwa jareya ana'na Rimon, dhari Be'erot dhari suku Benyamin. (Be'erot reya kaetong dhaerana Benyamin. Pandhudhu' aslina buru ka Gita'im, ban sajjegga jareya terros neng e jadhiya.)