Madurese Bible 1994 (ALKETAB E DHALEM BASA MADURA)
Reng-oreng Lewi ta' edhaftar epapolong ban ku-suku laenna, 48sabab PANGERAN la adhabu kantha reya ka Mosa, 49“E bakto ba'na nyathet nyamana ban bannya'na reng-oreng Isra'il se sanggup daddi tantara, suku Lewi ta' osa cathet. 50Reng-oreng Lewi soro ngoros Tang Kemah ban but-parabudda. Kawajibanna reng-oreng Lewi jareya mekol Tang Kemah ban but-parabudda sarta ngoros Kemah jareya, ban mon akemah kodu neng e sakalenglengnga Tang Kemah. 51Mon ba'na mangkada, reng-oreng Lewi se kodu abungkar Tang Kemah jareya, ban mon ba'na ambuwa, oreng Lewi keya se kodu maddek Kemah jareya. Salaenna oreng Lewi, sapa'a bai se nyemma' ka Kemah jareya kodu eokom mate. 52Reng-oreng Isra'il laenna kodu maddek kemahna e kennengnganna, e seddi'anna bul-ombulla pasukanna bang-sebang. 53Tape oreng Lewi kodu akemah e sakalenglengnga Tang Kemah, kennengnganna panyempennanna Tang kom-hokom. Reng-oreng Lewi jareya kodu ajaga Kemah jareya sopaja ta' sampe'a badha oreng se entar ka seddi'anna, sopaja Sengko' ta' sampe'a ngokom ommat Isra'il.” 54Daddi oreng Isra'il ajalannagi sabarang se edhabuwagi PANGERAN ka Mosa.