Ephesians 6

Dutch Frisian

← Chapter 5 Jump to:

1Jie, Tjinja, jehorjcht jüne Ellre em Harrn, dan daut es rajcht.

2„Ea dienen Voda en diene Mutta“, daut es daut easchte Jeboot met Vespräatjung,

3„doamet daut die wooljeit en dü oppe Ead lang läwst“. {2Mos.20,12; 5Mos.5,16}

4En jie Vodasch, reizt jüne Tjinja nijch tom Oaja, sonda tratjt dee opp enn Jehuarsom Strenj en Vemoninj emm Harrn.

5Jie, Sklowe, jehorjcht jüne Harren nom Fleesch met Ferjcht en Zettre, enn jünem Eenfeltjen Hoat, aus däm Tjristus;

6nijch met enn Uage deenende, aus Mensche too jefaule seatjende, sonda aus Sklowe Tjristi, de däm Welle Gottes von Hoate doone,

7deent met goodem Welle, aus däm Harrn, en nijch Mensche,

8doa jie weete, daut jiedra, wann hee waut Goodet deit, hee daut emfange woat vom Harrn, es hee Sklowe oda Fria.

9En jie Harren, doot daut selje jäajen ahn en doot nijch droohe, doa jie weete, daut soo aus äa uck jun Harr enn de Himmel es, en bie am tjeen aunseehne de Persoon es.

10Äwajens, Breeda, woat stoatj emm Harrn en enn de Krauft siene Macht.

11Tratjt aun daut gaunse Tjrijchs'Jescherr Gottes, doatoo, daut jie stohne tjenne jäajen de lästje Aunschläj vom Diewel.

12Dan ons Kaumf es nijch jäajen Bloot en Fleesch, sonda jäajen de Machthaba Harscha, jäajen Jewaultje, jäajen de Weltharscha disa Diestaness, jäajen de Jeista de Boosheit enn dee himmlische Uate Welte.

13Doawäajen nämt daut gaunse Tjrijchs'Jescherr Gottes, doamet jie wadastohne tjenne aum beesen Dach - en, nom Siejch daut Feld behoole tjenne.

14Aulsoo stoht, jüne Hofte ommgortet ommjebunge met Woahrheit, en aunjetrocke daut Brostschilt de Jerajchtijchtjeit,

15en Schooh aune Feet met Reedwellijchteit, fe de vetjindjung de froohe Botschoft,

16bie aul däm oppjenohme ha daut Schilt vom Gloowe, met däm jie emmstaund senne woare, aule jläjendje Feilasch vom Beesa Diewel üttolasche.

17Nämt dän Helm de Radinj Heil en daut Schweat daut Jeistes, daut es Gottes Wuat;

18too jieda Tiet bäd met aulem Jebäd en Bedde emm Jeist, en doatoo woakt enn aulem Aunhole en Bedde fe aule Heilje,

19en fe mie, doamet mie biem Mül opmoake daut Wuat jejäwt woat, omm frie en mootijch daut Jeheemniss de froohe Botschoft bekaunt too moake,

20fe dee etj een Jeschetjta enn Tjäde sie, doamet etj enn däm seljen frie en mootijch räd, aus etj räde saul.

21Oba doamet uck jie miene Ommstende weete, waut etj doo, soo woat Tiechikus, dee leewa Brooda een trüa Deena em Harrn, jünt aules metdeele,

22däm etj nü doawäajen no jünt jeschetjt ha, doamet jie erfoahre, woo daut omm ons steit, en daut hee jüne Hoate treestet.

23Fräd es met de Breeda en Leew met Gloowe von Gott, däm Voda, en däm Harrn Jesus Tjristus!

24De Jnod es met aulen, dee onsem Harrn Jesus Tjristus leewe enn Onnvejentjlijchtjeit.

← Chapter 5 Jump to: