Galatians 5

Dutch Frisian

← Chapter 4 Jump to: Chapter 6 →

1Fe de Frieheit haft Tjristus ons frie jemoakt; aulsoo stoht en loht jünt nijch wade met unja däm Joch de Tjnajchtschoft belauste opplaje.

2Tjitjt, etj, Paulus, saj jünt, daut, wann jie jünt beschniede lohte, Tjristus jünt nuscht nutze woat.

3Oba etj bezeij wada jiedrem Mensch, dee sich beschniede lat, daut hee schuldijch es, daut gaunse Jesatz too erfelle.

4Jie send loosjebunge jetrannt von Tjristus, dee jie derjch daut Jesatz welle jerajchtfoadijcht woare; jie send üt de Jnod jefolle.

5Oba wie lüare derjch däm Jeist üt Gloowe de Hopninj opp de Jerajchtijchtjeit.

6Dan enn Tjristus Jesus jelt nijch Beschniedinj noch Onnbeschnäde, sonda Gloowe, dee derjch de Leew wirtjsaum woat.

7Jie rande goot; wäa haft jünt jehindat oppjehoole, de Woahrheit nijch too jehorjche?

8Daut Äwaräde doatoo tjemmt nijch von däm, dee jünt beroope haft.

9Een bät weinijch Süadäjch derjchsüat däm gaunsen Däjch.

10Etj ha Vetrüe too opp jünt em Harrn, daut jie nijch aundasch dentje woare; oba dee jünt vewerrt woat daut Uadeel droage motte, wäa uck emma hee es.

11Oba etj, Breeda, wann etj noch de Beschniedunk vetjindij, wuaromm woa etj dan noch vefoljd? Doamet es daut Oajaniss vom Tjriez too nuscht jemoakt.

12Etj mucht, daut uck dee sich entmaunne beschniede, veschniede lohte, dee jünt opphetze oppstauntijch moake.

13Oba jie send too Frieheit beroope worde, Breeda; moakt bloos nijch de Frieheit too Jeläajenheit fe daut Fleesch, sonda derjch de Leew deent eenaunda.

14Dan daut gaunse Jesatz es enn eenem Wuat erfellt, enn däm: „Dü saust dien Näajsten leewe aus die selfst“. {3Mos.19,18}

15Oba wann jie jünt unjaenaunda biete en oppfräte, dan seeht too, daut jie nijch vonenaunda oppjefräte woare.

16Oba etj saj: Waundelt em Jeist, en jie woare de Fleescheslost nijch ütfelle vollbrinje.

17Dan daut Fleesch sträwt jäajen däm Jeist, oba de Jeist jäajen daut Fleesch; diese lidje send meteenaunda emm Stried, soo daut jie nijch daut waut jie welle doone tjenne.

18Oba wann jie vom Jeist jeleid woare, soo send jie nijch unja däm Jesatz.

19Oba openboa send de Woatje vom Fleesch, dee doa send: Huararie, Onnreinheit, Ütschweife,

20Jetsedeenst, Zaubarie, Fienschauft, Striet, Aufgonst, Wutt, Zänkisch, Spoolinje, Onneenijchtjeit,

21Neidisch, Drintja, Frätasch, en soowaut mea, von dän etj jünt em verüt saj, soo aus etj uck verhäa jesajcht ha, daut dee soowaut doone, daut Ritj Gottes nijch oawe woare.

22Oba de Frucht vom Jeist es Leew, Freid, Fräd, Jedult, Frintlijchtjeit, Gootsdoone, Trü senne,

23Saunftmoot, Enthoolung; jäajen soone jäftet tjeen Jesatz.

24Oba de Tjristus [Jesus] aunjeheare, ha daut Fleesch jetjriezijcht met de Liedenschofte en Bejia Loste.

25Wann wie derjch üt däm Jeist läwe, dan loht ons uck derjch üt däm Jeist waundle.

26Loht ons nijch voll iedel Riemsucht Easucht senne, eenaunda rütfodre, eenaunda beneide.

← Chapter 4 Jump to: Chapter 6 →