2 Thessalonians 1

Quechuan QXO (Biblia en Quechua del sur de Conchucos)

Jump to: Chapter 2 →

1Tesalónica markachö kaykaq criyikuq mayikuna: Noqa Pablo, wawqintsik Silvano y Timoteum kay cartata cartakayämü. Qamkunaqa Papänintsik Tayta Diospa y Señornintsik Jesucristupa poderninchömi kaykäyanki.

2Papänintsik Tayta Dios y Señornintsik Jesucristo kuyapäyäshurniki alli kawayänaykipä yanapaykuyälläshuy.

3Wawqikuna y panikuna, Jesucristuman qoyay qoyay mas criyikuyanqaykita y runa mayikita kuyayanqaykita musyarmi Tayta Diosta imaypis agradëcikuyä.

4Tsaymi juklä markakunaman charpis wawqikunata y panikunata willayä runakuna chikir ñakatsiyäshuptikipis Jesucristuman yärakuykäyanqaykita.

5Mana ajayaypa Jesucristuman tsaynö criyikuyaptikim tantiyayä alli juzgaq Tayta Diospa mandakuyninman yaykuyänaykipä kanqanta.

6Tayta Dios alli juzgaq karmi contrayki shäriqkunata castiganqa

7y qamkunatana noqakunatawan manana ñakanantsikpä qorikamäshun. Tsaynö kanqa Señor Jesucristo poderyuq angelninkunawan ciëlupita kutimuptinmi.

8Tayta Diosta mana cäsur Señornintsik Jesucristupa alli willakuyninta mana criyikuqkunatam lunyaypa lunyaq nina chawpinchö shamur castiganqa.

9Paykunaqa poderyuq Tayta Diospa puntanman chäyänanpa rantinqa infiernuchömi imayyaqpis ñakayanqa.

10Tsaynö kanqa Señor Jesucristo kay patsaman kutimuptinmi. Tsay junaqmi payman criyikuqkuna pasaypa kushikur alabayanqa. Tsaychömi qamkunapis Jesucristupa alli willakuyninta willakuyanqäta cäsuyanqaykipita kushishqa alabayanki.

11Tsaymi Tayta Diosnintsikta imaypis mañakuyä pay munanqannö kawayänaykipä. Tsaynö kawayänaykipämi qayayäshurquyki. Poderninwan yanapaykuyälläshuy payman yärakur allikunata imaypis rurayänaykipä.

12Tsaynö kawayaptikim Señornintsik Jesucristupa jutinchö alabayanqa y qamkunapis Jesucristo kanqannö kayanki. Tsaynö kanqa Tayta Diosnintsik y Señornintsik Jesucristupis kuyayäshurniki yanapayäshuptikim.

Jump to: Chapter 2 →