2 Thessalonians 2

Quechuan QXO (Biblia en Quechua del sur de Conchucos)

← Chapter 1 Jump to: Chapter 3 →

1Wawqikuna y panikuna, Señornintsik Jesucristo kutimur qorimänantsikpä kanqanta shumaq tantiyayänaykitam munayä.

2Qamkuna ama cäsuyaytsu «Jesucristo kutimunanpä kaq tiempu chämushqanam» nir pipis yachatsiyäshuptiki. Tsaynölla ama criyiyaytsu «Espíritu Santum revelamashqa» nir yachatsiyäshuptiki. Tsaynölla ama criyiyaytsu «kikin Pablum nishqa» y «Pablo cartakamunqan cartachöpis tsaynöllam nikan» nir yachatsiyäshuptikipis.

3Imata niyäshuptikipis ama cäsuyaytsu. Jesucristo kutimunanpäqa puntata atskaq runakunam Tayta Diospa contran shäriyanqa. Tsaynöllam anticristo shamunqa. Paytam Tayta Dios infiernuman qaykunqa.

4Anticristo shamur manam munanqatsu Tayta Diosta ni imatapis runakuna adorayänanta, sinöqa kikillantana adorayänantam munanqa. Tsaymi payta adorayänanpä Dios tukurnin Tayta Diospa templunman yaykuskir jamanqa.

5¿Manaku yarpäyanki tsaynö kananpä kanqanta mayna willayanqäta?

6Qamkuna musyayankim anticristuta manarä shamunanpä ima tsaparanqantapis. Tsaynö tsaparanqa tiempu chämunqanyaqmi.

7Manarä shamuptinpis Satanásqa maynam runakunata mana tantiyaylla engañaykan Tayta Diosta mana cäsuyänanpä. Tsaparaykanqanta Tayta Dios jipiskiptinnam anticristo shamunqa.

8Paytam Señor Jesucristo chipipirrä kutimur ushakaqpä pükaskinqa.

9Jesucristo manarä kutimuptinmi Satanáspa poderninwan anticristo tukuy niraq milagrukunata ruranqa.

10Tsaynöpam infiernuman qaykushqa kayänanpä destinashqa kaqkunata engañanqa. Paykunaqa Jesucristupa willakuyninta mana chaskirmi salvakuyanqatsu.

11Mana chaskiyanqanpitam Tayta Dios paykunata pantakätsinqa anticristuta chaskiyänanpä.

12Tsaynöpam Tayta Diosta mana cäsur jutsa ruraqkuna llapanpis infiernuchö ñakayanqa.

13Peru wawqikuna y panikuna, qamkunataqa Tayta Diosmi kuyayäshurniki salvayäshunaykipä qallananpita akrayäshurquyki. Kananqa Jesucristupa willakuyninta chaskikur payman yärakuyaptiki y Diospa poderninchö kawayänaykipä Espíritu Santu yanapayäshuptikim salvayäshurquyki. Tsaypitam Tayta Diosta imaypis agradëcikuyä.

14Salvashqa kayänaykipämi paypa alli willakuyninta willayaptï qayayäshurquyki. Tsaymi Señornintsik Jesucristo chipipirrä kutimur pushayäshuptiki qamkunapis paypa puntanchö kushishqa kawayanki.

15Wawqikuna y panikuna, tsaynö kananpä kaykaptinqa Tayta Diosman shumaq yärakur ama qonqäyaytsu parlapäyanqäta y cartapapis yätsiyanqäkunata.

16Señornintsik Jesucristo y kuyamaqnintsik, imaypis animatsimaqnintsik y puntanman pushamaqnintsik Papänintsik Tayta Dios

17yanapaykuyälläshuy mana llakikuyänaykipä, pïmaytapis alli shimillaykipa parlapäyänaykipä y allikunata rurar kawayänaykipä.

← Chapter 1 Jump to: Chapter 3 →