1 Thessalonians 2

Romani Baltic Latin (Biblija - Pe Baltitko Romani čib (Romanes) 2019)

← Chapter 1 Jump to: Chapter 3 →

1Pšalále, tumé džinéna, kokoré, so amaró javiben ke tumé na sys ivjá (naprásnes),

2a syr tumé džinéna, so angíl davá aménge prigijape but te piridživas mén'ki i ladžaipén dre Filipy, ne Devél dyjá aménge zor te rosphenas Léskiri bahtalý zan, na dykhí pe saró pharipén proti aménde.

3Pal-dová so dro amaró sykliakiribén nane nisaví doš, ni nisaví nažužy myslia, ni xohaibén,

4ne, syr Devél vykedyjá amen vaš davá, sob (kaj) te rosphenas bahtalý zan (zvies'), adiáke ame i rakirasa na vaš manušéngiro iló, ne syr trej Devléske, Savó propatiakirela amaré ile.

5Tumé džinéna, so ame nijékhvar na sámas angíl tuménde xohané rakiribnasa, ci vari-savé bokhasa ke lové vaš péske: Devél isyn jakhítko (svidietieljo) dalé sareske.

6Ame na rodasa manušýtko šaribén, ni tuméndyr, ni javirendyr,

7ame mogindiam te javas ke tumé minasa syr Xristosóskire Apóstoly, ne ame sámas štyl (tiha) maškír tuménde, adiáke syr daj laskasa otlydžalape péskire čhavénca,

8adiáke ame, baré tyrdypnastyr ke tumé, zakamdiam te piridas tuménge na jekh so Devléskiri bahtalý zan (zvies'), ne i amaró džiibén, adiáke tumé san dróga aménge.

9Pal-dová so tumé ripirena amarí butý i khinypen: ame kerdiám butý ratý i dyvesé, sob (kaj) te na javas dro pharipén tuménge, ame rosphenasas Devléskiri bahtalý zan tuménge.

10Tumé i Devél san jakhítka aménge, so syr ame sámas maškír tuménde, saró kerdiám syr svénta i čačuné i bidošengire.

11Pal-dová so tumé džinéna, kiéli ame otlydžasaspe tuménca, syr dad džinéla péskire čhavén: ame sykliakirdiam kažnoné tuméndyr i podrikirdiam i mangdiam tumen;

12sob (kaj) tumé te dživén, syr trej Devléske, Savó khardiá tumen dre Léskiro Kralipén i sláva.

13Paldavá i ame adiáke-pac' ŭsády (sak) parikirasa Devléske, so tumé prilyné Devléskiro lav, savó ame rospendiam, tumé prilyné les na sýrby manušéngiro lav, ne syr Devléskiro lav, pir čačipén, savó keréla butý dre tuménde patiaibnaskirende.

14Paldavá so tuménca, pšalále, kerdiápe dová-pac', so i Devléskire khangir'jenca, savé isyn ke Judéia dre Isusóste Xristosóste, adiáke-pac' i péskire manušá menčyndle tumen, syr i len Judy,

15kadalé manušá zamardé (muliakirdé) i Ras-Devlés, Isusós i prorokén, i amen, jone nane lačhé Devléske, i isyn vérgi (vrogi) saré manušénge,

16savé sys terdé pe drom te rakiras Najudénge pal zrakhibén, i pir davá saró keréna baredýr péskire gréhi: ne kakaná Devléskiri xolý javdiá pe lénde.

17Ne ame, pšalále, syr roziaciampe tuménca pe nabaró časo (cýro) mósa, ne na ilésa, ame pričhudiam zor, i kerasas saró, sob (kaj) te dykhaspe tuménca;

18paldavá me drieván kamdjom te javas ke tumé, až me, Pávli, jekh javír mólo skedavaspe te javav ke tumé, ne nálačho na mekciá amen.

19Kon moginéla te javél amaré lačhé užakiribnasa, ci radymása, ci šaribnytkone viankasa (koronasa)? Ci davá isyn na tumé angíl amaré Raste – Devléste, Isusóste Xristosóste, syr Jov javéla.

20Tumé san amarí sláva i rádyma.

← Chapter 1 Jump to: Chapter 3 →