Job 28

Santali Bible (সান্তালী বাইবেল)

← Chapter 27 Jump to: Chapter 29 →

1“Rupạ reakʼ do khạn menakʼa ar sona nirại ocoy reakʼ hõ ṭhạ̃i menakʼa.

2Hasa khon mẽṛhẽtʼko la totʼeda, ar tamba do gitil dhiri khonko galao totʼeda.

3Dhạrti reakʼ khạndri kaṛaṅ ńutre oka menakʼ manwa do ona sạńgińkate daman dhiri reakʼko ḍunḍhạukana.

4Manwa ṭhạ̃i khon sạṅgińre okare manwa bako calakʼkan onḍe onko do khạnko layeda, ar ona khạnrege onko doko jhilạkʼkana.

5Okaṭakʼ otre phosol janamokʼkan, ona ot latarrege manwa do seṅgel jolkateko ulṭạ ulṭiyetʼkana.

6Onako dhirire do nilkanto mạnik menakʼa, ar otre do sona reakʼ gunḍạge tahenkana.

7Khạn reakʼ hor do gidi kũṛitʼ hõ bako baḍaea, ar jalo cẽṛẽko reakʼ mẽtʼ hõ ona do bako ńelakada;

8Jãhãn dhomok janwar hõ onḍe do bako lebetʼ akawada, ar cele dhạcri kul hõ ona cetante bako parom akana.

9Ona kạṭhin dhirirege manwa do tiye capoyeda ar buru reakʼ rehetʼ khongeye layeda.

10Ona buru talate sunḍkoe kholaoeda; onḍenakʼ sanam damanakʼ jinisko do uniyakʼ mẽtʼre paṛaokʼkana.

11Uni do jharna reakʼ dakʼ ńurokʼe bond ocoyetʼkana ar okoakʼ jinis do marsalteye oḍok ạguyetʼ kana.

12“Menkhan ạkil do okare ńamkokʼa? Ar bud do okare tahen kana?

13Hoṛ do ona reakʼ dam bako baḍaea; jiwetʼkoakʼ disạmre ona do baṅ ńamokʼa.

14Athantar dakʼ doe meneda, ‘ińre ona do bạnukʼa,’ doreão hõe mena, ‘iń ṭhen hõ ona do bạnukʼa.

15Khạṭi sonate hõ ona do ohoge kirińlena, ar ḍher rupạte hõ ona reakʼ dam do baṅ emogokʼa.

16Ophir sonate hõ ona do ohoge kirińlena, Boidurjo mạnik ar nilkanto mạniktehõ ona do baṅ kirińokʼa.

17Sona se damanakʼ kãcte hõ baṅ somanokʼa, nirạ sona reakʼ bhajan bodolte hõ ona do baṅ ńamokʼa.

18Probal ar jiwetʼ dhiri reakʼ hõ dam do bạnukʼa; ar muti mạnikko khon hõ ạkil reakʼ dam do ḍhergea.

19Ona tulucʼ do Kus disạm reakʼ podmorag mạnik hõ baṅ jurikʼa; khạṭi sonate hõ ona do baṅ kirińokʼa.

20“Enḍekhan ạkil do oka khon hijukʼkana? Ar buj do oka khon hijukʼkana?

21Sanam jiwiyankoakʼ mẽtʼ khon ona do danaṅgea, coṭren cẽṛẽko ṭhen khon hõ ona do okore menakʼa.

22Maraokʼ ar gujukʼ dokin menede, ‘ona reakʼ unạn do ạlińakʼ luturte liń ańjomakada.’

23“Isorge ona reakʼ hor doe bujhạu daṛeakʼa; eken unigeye baḍaea ona do okare tahenkana,

24ente uni do dhạrti reakʼ ses simạna hõe ńeletʼkana; ar serma latar reakʼ jotowakʼge uniyakʼ mẽtʼ doe ńeleda.

25Uni do tinre hoere daṛeye emakʼkana ar dakʼko doe soṅ niṭetʼkana,

26tinre uni do jạ̃ṛĩ dakʼ reakʼe bondoboskeda, ar bijli huḍur reakʼ hor hõe bandhaokeda,

27unre uni do ạkile ńelkeda ar onae soṅkeda; uni do mońjteye ńelkeda ar ona reakʼe ḍunḍhạukeda.

28Ona tayom uni do manwae metadea, ‘Probhu Isor botoraege hoyokʼ kana ạkil do, ar bạṛicʼ khon sahaṛokʼge hoyokʼ kana buj do.

← Chapter 27 Jump to: Chapter 29 →