Shilluk DC Bible © Bible Society in South Sudan, 2011
Ókwër ɑ́bëëd ri gen kwëër gen. Kí bödhhi thøm; Kwɑrri Leebì bënn, ɑ løg Asɑp, kí Ëmɑn, kí Yeduthun, kí tyëng kɑ̈lli gen, ge rug-ɑ ógudhi kor-ɑ yöm. Kwɑrri Leebì ɑ́cung ɑ tung-ɑ døøg kuni wɑɑng cyɑ̈ɑ̈ng mwøl kì kej kwër kí bullì, kí thøm. Kelli gen dɑ ókwër miyø kí pyɑ̈r ɑ́ryew mø kudhø ki kɑ̈ngì. Cwɑggi tyëng-ɑ wör ɑ́lwøngi kɑ kɑ̈ngì, kí bullì, kí jɑmmi wör møøgø kɑ ɑ́wör gen ge lenh-ɑ Jwøng-ɑ Ácwɑ̈ɑ̈j kinni, “Lenhu Jwøng-ɑ Ácwɑ̈ɑ̈j mɑ́ e døøj o mɑ̈ɑ̈dø mee gït-ɑ ɑtheer.” Keny-ɑ ɑ́cɑ̈gi ókwër ki bëën wɑ̈g kì Kengø, kɑ Kengø yije ceg-ɑ ì loj yi pöölø, kɑ mɑ̈ɑ̈r Jwøng-ɑ Ácwɑ̈ɑ̈j omënyø kì yij pøølɑni. Kɑ ókwër ówïyø ki gwøg mɑ́ Kengø ɑ́pɑ̈ng yi mɑ̈ɑ̈r Jwøng-ɑ Ácwɑ̈ɑ̈j.