Shilluk DC Bible © Bible Society in South Sudan, 2011
Tyëng Yeudiyɑ̀ bënn, møg-ɑ bëëdø kì Rïp; cwøw kí mɑ̈nn ge ɑ́köbbɑ møg-ɑ ɑ́kwøb yi Jwøng-ɑ Ácwɑ̈ɑ̈j, Jwøøg Isrɑil kinni, “Wu ɑ́rum ki kwøb kinni wu ómɑll-ɑ Rɑ̈ɑ̈dh Mɑl rɑ̈nh-ɑ dhɑjø, wu ɑ́kööb kinni óngɑ̈ddi yi wun ki gëdhhì, kɑ kunyi yi wun ki møgi oløg, kɑ møgɑni gwøg yi wun ceth. Adɑ́ mïdhu møg-ɑ ɑ́kwöng yi wun ceth. Gwøgu møg-ɑ ɑ́kwøb yi wun!