1 Thessalonians 2

Tulu (ಪೊಸ ಒಡಂಬಡಿಕೆ)

← Chapter 1 Jump to: Chapter 3 →

1ಸಹೋದ್ರೆರೇ, ಎಂಕುಲು ಪೊಕ್ಕಡೆ ನಿಕ್ಲೆ ಕೈತಲ್‌ ಬೈದಿಜ ಇನ್ಪಿನೆನ್ ನಿಕುಲು ತೆರಿದರ್.

2ಎಂಕುಲು ದೇವೆರೆ ಬೇಲೆ ಮಲ್ಪೆರೆ ಥೆಸ್ಸಲೋನಿಕಗ್ ಬರ್ಪಿನೆಕ್ಕ್ ದುಂಬು, ಫಿಲಿಪ್ಪಿ ಪಟ್ಟಣೊಡು ಭಂಗ ಬೊಕ್ಕ ಅವಮಾನ ಆತಿನವು ನಿಕ್ಲೆಗ್ ತೆರಿದೇ ಉಂಡು. ಮಸ್ತ್ ವಿರೋಧ ಇತ್ತ್ಂಡಲಾ ದೇವೆರ್ ಎಂಕ್ಲೆಗ್ ಬಲ ಕೊರಿನೆಡ್ದ್ ನಿಕ್ಲೆಗ್ ಧೈರ್ಯೊಡು ಸುವಾರ್ತೆ ತೆರಿಪಾಯ.

3ಐಡ್ದಾವರ ಎಂಕ್ಲೆನ ಬೋಧನೆ ಕಪಟದವುಲಾ ಅತ್ತ್, ಅಶುದ್ಧವಾಯಿನವುಲಾ ಅತ್ತ್, ಮೋಸದವುಲಾ ಅತ್ತ್,

4ಆಂಡ ದೇವೆರ್ ಎಂಕ್ಲೆನ್ ತಕ್ಕದಾಕುಲು ಪಂಡ್ದ್, ಈ ಸುವಾರ್ತೆ ಎಂಕ್ಲೆನ ವಶೊಕ್ಕು ಕೊರಿಯೆ. ಎಂಕುಲು ನರಮಾನಿರೆನ್ ಮೆಚ್ಚಾವಂದೆ ಉಡಲ್‌ನ್ ಪರೀಕ್ಷೆ ಮಲ್ಪುನ ದೇವೆರೆನ್ ಮೆಚ್ಚಾವೊಡು ಅಂದ್‌ದ್ ಪಾತೆರೊಂದುಲ್ಲ.

5ಉಂದು ನಿಕ್ಲೆಗ್ ಸರಿಯಾದ್ ತೆರಿದುಪ್ಪುಲೆಕ್ಕ ಎಂಕ್ಲೆನ ಈ ಬೋಧನೆ ಕಾಲಿ ಬಡಾಯಿ ಕೊಚ್ಚುನ ಪಾತೆರೊಲೆಡ್ದ್‌ಲಾ ಕಾಸ್‌ದ ಆಸೆಗ್ ಬೋಡಾದ್ ವೇಷ ಪಾಡೊಂದುಲಾ ಬೈದಿನಿ ಅತ್ತ್, ಉಂದೆಕ್ಕ್ ದೇವೆರೇ ಸಾಕ್ಷಿ.

6ಉಂದತ್ತಂದೆ ಎಂಕುಲು ಕ್ರಿಸ್ತನ ಅಪೊಸ್ತಲೆರಾದುಪ್ಪುನೆಡ್ಡ್ ಎಂಕ್ಲೆಗ್ ಮರ್ಯಾದಿ ಕೊರೊಡು ಅಂದ್‌ದ್ ಪನೊಲಿಯಾಂಡಲಾ ನರಮಾನಿಲೆಡ್ದ್ ಬರ್ಪಿ ಮೈಮೆನ್ ನಿಕ್ಲೆಡ್ದಾವಡ್, ಬೇತೆಕ್ಲೆಡ್ದಾವಡ್ ಆಸೆ ಮಲ್ಪುನಾಕುಲು ಆದಿಜ್ಜ. ಆಂಡ ಅಪ್ಪೆ ತನ ಜೋಕುಲೆನ್ ತಾಂಕುಲೆಕ್ಕನೇ ಎಂಕುಲು ನಿಕ್ಲೆ ನಡುಟು ಸಮಾಧಾನಿಲಾದ್ ಇತ್ತ.

8ನಿಕುಲು ಎಂಕ್ಲೆಗ್ ಬಾರಿ ಪ್ರೀತಿದಾಕುಲು ಆದಿತ್ತಿನೆಡ್ದಾವರ ಎಂಕುಲು ನಿಕ್ಲೆಗ್ ಪ್ರೀತಿಡ್ ದೇವೆರೆನ ಸುವಾರ್ತೆ ಪನಿಯೆರೆ ಮಾತ್ರತ್ತಂದೆ ನಿಕ್ಲೆಗಾದ್ ಎಂಕ್ಲೆನ ಇಡೀ ಪ್ರಾಣೊನೇ ಕೊರಿಯೆರೆ ತಯಾರಾದಿತ್ತ.

9ಸಹೋದ್ರೆರೇ, ಎಂಕುಲು ನಿಕ್ಲೆಡ್ ಏರೆಗ್ಲಾ ದುನ್ನ ಆವಂದಿಲೆಕ್ಕ ರಾತ್ರೆ ಪಗೆಲ್ ಬೆಂದ್‌ದ್ ಜೀವನ ಮಲ್ತೊಂದು, ದೇವೆರೆ ಸುವಾರ್ತೆ ನಿಕ್ಲೆಗ್ ಸಾರಿಯ. ಎಂಕ್ಲೆನ ಭಂಗಲಾ ಪ್ರಯಾಸಲಾ ನಿಕುಲು ನೆನೆಪು ಮಲ್ತೊಂದುಪ್ಪರ್.

10ನಂಬುನಾಕುಲಾಯಿ ನಿಕ್ಲೆಡ್ ಎಂಕುಲು ಎಂಚ ಭಕ್ತಿಡ್ ನೀತಿವಂತೆರಾದ್, ತಪ್ಪುದಾಂತೆ ಇತ್ತ ಇನ್ಪಿನೆಕ್ಕ್ ನಿಕುಲುಲಾ ದೇವೆರ್‌ಲಾ ಸಾಕ್ಷಿ.

11ಅಮ್ಮೆ ತನ ಜೋಕುಲೆಗ್ ಬುದ್ಧಿ ಪಂಡಿಲೆಕ್ಕನೇ ಎಂಕುಲುಲಾ ನಿಕ್ಲೆಗ್ ಬುದ್ಧಿ ಪನೊಂದು ಧೈರ್ಯ ಕೊರೊಂದುಲ್ಲ.

12ನಿಕ್ಲೆನ್ ತನ ರಾಜ್ಯೊಗ್ಲಾ ಮೈಮೆಗ್ಲಾ ಪಾಲ್‌ದಾರೆರ್ ಆಯೆರೆ ಲೆತ್ತಿ ದೇವೆರೆಗ್ ಯೋಗ್ಯಾದ್ ನಡತೊನೊಡು ಅಂದ್‌ದ್ ಕಂಡಿತಾದ್ ಪನ್ಪಿನೆನ್ ನಿಕುಲು ತೆರಿದುಲ್ಲರ್.

13ಎಂಕುಲು ದೇವೆರೆನ್ ಏಪಲಾ ಪುಗರೊಂದುಲ್ಲ ದಾಯೆಗ್ ಪಂಡ ನಿಕುಲು ದೇವೆರೆನ ಪಾತೆರೊನು ಎಂಕ್ಲೆಡ್ದ್ ಕೇಂಡ್ದ್, ಅವೆನ್ ನರಮಾನಿಲೆ ಪಾತೆರೊಲು ಅತ್ತ್; ಉಂದು ಕಂಡಿತಾದ್ ದೇವೆರೆ ಪಾತೆರೊಲೆ ಅಂದ್‌ದ್ ನಂಬಿನೆಡ್ದಾವರ ನಿಕ್ಲೆ ಉಲಯಿ ಎಡ್ಡೆ ಕೆಲಸೊಲು ನಡತೊಂದುಂಡು.

14ಅಂದ್, ಸಹೋದ್ರರೆ, ಯೂದಾಯೊಡು ದೇವೆರೆ ಸಭೆತಾಕುಲು ಕ್ರಿಸ್ತ ಯೇಸುಡು ಇತ್ತ್‌ದ್ ಯೆಹೂದ್ಯೆರೆಡ್ದ್ ಭಂಗೊಲೆನ್ ಅನುಭವ ಮಲ್ತೆರ್ ಅಂಚೆನೇ ನಿಕುಲುಲಾ ನಿಕ್ಲೆನ ಸ್ವಂತ ಜನೊಕುಲೆಡ್ದ್ ಭಂಗೊಲೆನ್ ಅನುಭವ ಮಲ್ತರ್.

15ಆ ಯೆಹೂದ್ಯೆರ್ ಕರ್ತವೆ ಆದುಪ್ಪು ಯೇಸುನ್ಲಾ ಪ್ರವಾದಿಲೆನ್ಲಾ ಕೆರಿಯೆರ್, ಎಂಕ್ಲೆನ್ಲಾ ಗಿಡ್ತ್ ಬುಡಿಯೆರ್. ಅಕುಲು ದೇವೆರೆನ್ ಮೆಚ್ಚಂದಿನಾಕುಲು, ಮಾತ ನರಮಾನಿಲೆಗ್ಲಾ ವಿರೋಧಿಲು ಆದುಲ್ಲೆರ್.

16ಪಿದಯಿದ ಜನೊಕುಲೆಗ್ ರಕ್ಷಣೆ ಆಪಿನ ಸುವಾರ್ತೆ ಪನಿಯೆರೆ ಬಲ್ಲಿ ಅಂದ್‌ದ್ ಎಂಕ್ಲೆಗ್ ಮಸ್ತ್ ಅಡ್ಡಿ ಮಲ್ಪುವೆರ್, ಇಂಚ ಅಕುಲು ಅಕ್ಲೆನ ಪಾಪ ಕೃತ್ಯೊಲೆನ್ ಹೆಚ್ಚ್ ಮಲ್ತೊಂದೇ ಪೋಪೆರ್. ಅಂಚಾಯಿನೆಡ್ದ್ ದೇವೆರೆನ ಕೋಪ ಕಡೆಕ್ಕ್ ಅಕ್ಲೆನ ಮಿತ್ತ್ ಬೈದ್‌ಂಡ್.

17ಸಹೋದ್ರೆರೇ, ಎಂಕುಲಾಂಡಲಾ ಶರೀರೊಡು ಒಂತೆ ಸಮಯ ದೂರ ಆದಿತ್ತ್‌ಂಡಲಾ, ಉಡಲ್‌ಡ್ ಒಂಜಾದುಲ್ಲ. ನಿಕ್ಲೆನ್ ತೂವೊಡು ಪನ್ಪಿ ಆಸೆಡ್ ದಿಂಜ ಪ್ರಯಾಸಲಾ ಮಲ್ತ.

18ದಾಯೆಗಂದ್ಂಡ, ನಿಕ್ಲೆನ ಕೈತಲ್‌ ಬರಿಯೆರೆ ಎಂಕ್ಲೆಗ್ ಮನಸಿತ್ತ್‌ಂಡ್. ಪೌಲು ಆಯಿ ಯಾನ್ ಒಂಜಿ ರಡ್ಡ್ ಸರ್ತಿ ನಿಕ್ಲೆ ಕೈತಲ್‌ ಬರೊಡೇ ಅಂದ್‌ದ್ ಎನ್ನೊಂದಿತ್ತೆ. ಆಂಡ ಸೈತಾನೆ ಎಂಕ್ಲೆಗ್ ಅಡ್ಡಿ ಮಲ್ತೆ.

19ನಮ ಕರ್ತವೆ ಆದುಪ್ಪು ಯೇಸು ತೋಜಿದ್ ಬನ್ನಗ, ಆಯನ ದುಂಬು ಎಂಕ್ಲೆನ ಭರವಸಲಾ, ಸಂತೋಷಲಾ, ಪುಗರಿಗೆದ ಕಿರೀಟಲಾ ಏರ್? ಅವು ನಿಕುಲೇ ಅತ್ತಾ.

20ನಿಜಾದ್‌ಲಾ ನಿಕುಲೇ ಎಂಕ್ಲೆನ ಗೌರವಲಾ, ಸಂತೋಷಲಾ ಆದುಲ್ಲರ್.

← Chapter 1 Jump to: Chapter 3 →