1 Thessalonians 3

Tulu (ಪೊಸ ಒಡಂಬಡಿಕೆ)

← Chapter 2 Jump to: Chapter 4 →

1ಅಂಚಾಯಿನೆಡ್ದ್ ಎಂಕ್ಲೆಗ್ ತಡೆಯೊನೆರೆ ಆವಂದೆ ಎಂಕುಲು ಒಂಟಿ ಆದ್ ಅಥೇನೆಡ್ ಉಪ್ಪುನೆಕ್ಕ್ ಒಪ್ಪಿಯೊಂಡ.

2ನಿಕ್ಲೆ ಮಿತ್ತ್ ಬೈದಿನ ಕಷ್ಟ ಸಂಕಟೊಲೆಡ್ ಒರಿಲಾ ಚಂಚಲೆರ್ ಆವಂದಿಲೆಕ್ಕಲಾ ನಿಕ್ಲೆನ್ ಗಟ್ಟಿ ಮಲ್ಪುಲೆಕ್ಕಲಾ ನಿಕ್ಲೆ ನಂಬಿಕೆ ಹೆಚ್ಚಾವೆರೆಗ್ಲಾ ನಿಕ್ಲೆಗ್ ಬೋಧನೆ ಮಲ್ಪೆರೆಗ್ಲಾ ಎಂಕುಲೆ ಸಹೋದ್ರೆಲಾ ಕ್ರಿಸ್ತನ ಸುವಾರ್ತೆದ ಬೇಲೆಡ್ ದೇವೆರೆ ಸೇವಕೆಲಾ ಆದುಪ್ಪು ತಿಮೋಥಿನ್ ನಿಕ್ಲೆ ಕೈತಲ್‌ ಕಡಪುಡುವ.

3ದಾಯೆಗ್ ಪಂಡ ನಿಕುಲು ಕಷ್ಟೊಲೆಡ್ದ್ ಏರ್ಲಾ ಚಂಚಲ ಆವೆರೆ ಬಲ್ಲಿ. ಬೊಕ್ಕ ನಿಕ್ಲೆಗ್ ಗೊತ್ತಿತ್ತಿ ಲೆಕ್ಕನೇ ಸಂಕೊಟೊನು ಅನುಭವ ಮಲ್ಪೆರೆನೇ ಎಂಕ್ಲೆನ್ ದೇವೆರ್ ನೇಮಕ ಮಲ್ತ್‌ದೆ.

4ಎಂಕುಲು ನಿಕ್ಲೆ ಕೈತಲ್‌ ಉಪ್ಪುನಗಲಾ ಕಷ್ಟ ಸಂಕಟೊಲೆನ್ ಅನುಭವ ಮಲ್ಪೊಡಾಪುಂಡು ಅಂದ್‌ದ್ ದುಂಬೇ ನಿಕ್ಲೆಗ್ ತೆರಿಪಾದಿತ್ತ, ಅಂಚೆನೇ ಆಂಡ್. ಅವು ನಿಕ್ಲೆನ ಅನುಭವೊಗ್ಲಾ ಬತ್ತ್ಂಡ್.

5ಅಂಚಾದ್ ಯಾನ್ ನನ ತಡೆತೊನಿಯೆರೆ ಆವಂದೆ, ಒಂಜಿ ವೇಳೆ ಸೈತಾನೆ ನಿಕ್ಲೆನ್ ಶೋಧಿನೆಡ್ದ್ ಎಂಕುಲೆ ಪ್ರಯಾಸ ಪೊಕ್ಕಡೆಗ್ ಆಂಡಾ ಅಂದ್‌ದ್ ನಿಕ್ಲೆ ನಂಬಿಕೆದ ವಿಷಯೊನು ತೆರಿಯೊನಿಯೆರೆ ತಿಮೋಥಿನ್ ಕಡಪುಡಿಯೆ.

6ಆಂಡ ತಿಮೋಥಿ ಎಂಕುಲೆ ಕೈತಲ್‌ ಬತ್ತ್‌ದ್ ನಿಕ್ಲೆನ ನಂಬಿಕೆ, ಪ್ರೀತಿದ ಸಂಗತಿಡ್ ಎಡ್ಡೆ ವರ್ತಮಾನ ಕೊರಿಯೆ. ನಿಕುಲು ಎಂಕ್ಲೆನ್ ಏಪಲಾ ಎಡ್ಡೆ ನೆನೆಪು ಮಲ್ತಿ ಲೆಕ್ಕನೇ ಎಂಕುಲುಲಾ ನಿಕ್ಲೆನ್ ತೂವೆರೆ ಆಸೆ ಮಲ್ಪುವ. ಅಂಚೆನೇ ನಿಕುಲುಲಾ ಎಂಕ್ಲೆನ್ ತೂವೆರೆ ಆಸೆ ಮಲ್ತೊಂದುಲ್ಲರ್ ಅಂದ್‌ದ್ ತೆರಿಪಾಯೆ.

7ಅಂಚಾಯಿನೆಡ್ದ್ ಸಹೋದ್ರೆರೇ, ಉಂದೆನ್ ಕೇಂಡ್ದ್ ಎಂಕ್ಲೆನ ಮಾತ ಕೊರತೆಡ್ಲಾ ಭಂಗೊಲೆಡ್ಲಾ ನಿಕ್ಲೆನ ನಂಬಿಕೆಡ್ದಾದ್ ಎಂಕ್ಲೆಗ್ ಆಧರಣೆ ಆಂಡ್.

8ನಿಕುಲು ಕರ್ತವಡ್ ಗಟ್ಟಿಯಾದ್ ಉಂತುವರ್ಡ ಎಂಕುಲು ಏತ್‌ಲಾ ಕಷ್ಟೊನು ಸಹಿಸೊಂದು ಬದುಕುವ.

9ಎಂಕುಲು ದೇವೆರೆನ್ ಏತ್ ಪುಗರ್‌ಂಡಲಾ ಅವು ಕಮ್ಮಿಯೆ. ಆಂಡ ದೇವೆರೆ ಎದುರುಡು ನಿಕ್ಲೆಡ್ದ್ ಎಂಕ್ಲೆಗ್ ತಿಕ್ಕಿನ ಸಂತೋಷ ಅವು ಮಸ್ತ್ ಆದುಂಡು.

10ನಿಕ್ಲೆನ ಮೋನೆ ತೂವರೆಗ್ಲಾ, ನಿಕ್ಲೆನ ನಂಬಿಕೆಡ್ ಕಡಿಮೆ ಆದುಪ್ಪುನೆನ್ ದಿಂಜಾಯೆರೆಗ್ಲಾ ಎಂಕ್ಲೆಗ್ ಅನುಕೂಲ ಆವೊಡು ಅಂದ್‌ದ್ ಎಂಕುಲು ರಾತ್ರೆ ಪಗೆಲ್ ದೇವೆರೆನ್ ಆಯಿನಾತ್ ನಟ್ಟೊಂದುಲ್ಲ.

11ಇತ್ತೆ ಎಂಕುಲೆ ಅಮ್ಮೆ ಆದುಪ್ಪು ದೇವೆರ್‌ಲಾ, ಕರ್ತವ ಆದುಪ್ಪು ಯೇಸುಲಾ ಎಂಕ್ಲೆಗ್ ನಿಕ್ಲೆ ಕೈತಲ್‌ ಬರ್ಪಿನ ಅವಕಾಶೊನು ತಯಾರ್ ಮಲ್ಪಡ್.

12ನಿಕ್ಲೆಡ್ ಎಂಕ್ಲೆನ ಪ್ರೀತಿ ಎಂಚ ಉಂಡಾ ಅಂಚೆನೇ ನಿಕ್ಲೆನ ಪ್ರೀತಿಲಾ ಒರಿ ಒರಿಯನ ಮಿತ್ತ್‌ಲಾ, ಮಾತ ನರಮಾನಿಲೆ ಮಿತ್ತ್‌ಲಾ ಇತ್ತ್‌ದ್ ಅಭಿವೃದ್ಧಿ ಆದ್ ಬುಲೆವೊಂದು ಪೋಪಿಲೆಕ್ಕ ಕರ್ತವೆ ನಡಪಾವಡ್.

13ನಮ ಕರ್ತವೆ ಆದುಪ್ಪು ಯೇಸು ನಿಕ್ಲೆ ಉಡಲ್‌ನ್ ದೃಢ ಮಲ್ತ್‌ದ್ ತನ ಮಾತ ಭಕ್ತೆರೆಡೊಪ್ಪ ಬನ್ನಗ, ನಮ ಅಮ್ಮೆ ಆದುಪ್ಪು ದೇವೆರೆ ಎದುರು ನಿಕುಲು ಪರಿಶುದ್ಧೆರಾದ್, ಕಲೆದಾಂತೆ ಉಪ್ಪುಲೆಕ್ಕ ಮಲ್ಪಡ್.

← Chapter 2 Jump to: Chapter 4 →