1 Thessalonians 4

Tulu (ಪೊಸ ಒಡಂಬಡಿಕೆ)

← Chapter 3 Jump to: Chapter 5 →

1ಕಡೆಕ್ಕ್ ಸಹೋದ್ರೆರೇ, ದೇವೆರೆಗ್ ಮೆಚ್ಚಿಗೆ ಆಪಿನ ಜೀವನ ಎಂಚ ಮಲ್ಪೊಡಂದ್‌ದ್ ಎಂಕ್ಲೆಡ್ದ್ ಕಲ್ತೊಂಡರ್. ಅಂಚೆನೇ ನಡತೊಂದುಲ್ಲರ್; ನನಲಾ, ಹೆಚ್ಚೆಚ್ಚಾದ್ ನಡಪುಡೊಡು ಅಂದ್‌ದ್ ಎಂಕುಲು ಕರ್ತವೆ ಆದುಪ್ಪು ಯೇಸುಡ ನಟ್ಟೊಂದು ಬುದ್ಧಿ ಪನ್ಪ.

2ಅಂಚೆನೇ ಎಂಕುಲು ಕರ್ತವೆ ಆದುಪ್ಪು ಯೇಸುನ ಅಧಿಕಾರೊಡು ನಿಕ್ಲೆಗ್ ಕೊರ್ತಿನ ಅಪ್ಪಣೆಲೆನ್ ನಿಕುಲು ತೆರಿದರತ್ತಾ.

3ದೇವೆರೆನ ಚಿತ್ತ ನಿಕುಲು ಪರಿಶುದ್ಧೆರಾದ್ ಉಪ್ಪೊಡು ಪಂಡ್ದೇ. ಅಂಚಾಯಿನೆಡ್ದ್ ನಿಕುಲು ಹಾದ್ರೊಗು ದೂರ ಆದುಪ್ಪೊಡು.

4ದೇವೆರೆನ್ ತೆರಿಯಂದಿನ ಪಿದಯಿದ ಜನೊಕುಲೆ ಲೆಕ್ಕ ಕಾಮದಾಶೆಗ್ ಒಳಗಾವೆರೆ ಬಲ್ಲಿ. ಪ್ರತಿ ಒರಿಲಾ ಮದ್ಮೆ ಆದ್ ಬೊಡೆದಿ ಒಟ್ಟುಗು ಪರಿಶುದ್ಧತೆಡ್ಲಾ ಮರ್ಯಾದಿಡ್ಲಾ ಉಪ್ಪೊಡು.

6ಈ ವಿಷಯೊಲೆಡ್ ನಿಕ್ಲೆಡ್ ಏರ್ಲಾ ತನ ಸಹೋದ್ರನ್ ಮೋಸ ಮಲ್ತ್‌ದ್ ಆಯಗ್ ಪಗೆ ಮಲ್ಪೆರೆ ಬಲ್ಲಿ. ಎಂಕುಲು ದುಂಬೇ ನಿಕ್ಲೆಗ್ ಎಚ್ಚರಿಕೆ ಕೊರ್ತಿನಂಚೆನೇ ಕುಡಲಾ ಪನ್ಪ, ಇಂಚಿತ್ತಿ ಪಾಪ ಕೃತ್ಯೊಲೆನ್ ಮಲ್ತಿನಾಕುಲೆಗ್ ಕರ್ತವೆ ಪಗತೆ ಕೊರ್ಪಿನಾಯೆ ಆದುಲ್ಲೆ.

7ದೇವೆರ್ ನಮನ್ ಅಶುದ್ಧ ಜೀವನ ಮಲ್ಪೆರೆ ಲೆಯ್ದಿನಿ ಅತ್ತ್, ಪರಿಶುದ್ಧ ಜೀವನ ಮಲ್ಪೆರೆ ಲೆಯ್ದಿನಿ.

8ಇಂಚ ಉಪ್ಪುನಗ ಈ ಪಾತೆರೊಲೆನ್ ತಿರಸ್ಕಾರ ಮಲ್ಪುನಾಯೆ ನರಮಾನಿಲೆನ್ ತಿರಸ್ಕಾರ ಮಲ್ಪುನು ಮಾತ್ರತ್ತಂದೆ, ನಿಕ್ಲೆಗ್ ಪರಿಶುದ್ಧಾತ್ಮ ವರ ಕೊರ್ಪಿನ ದೇವೆರೆನ್ಲಾ ತಿರಸ್ಕಾರ ಮಲ್ಪುನಾಯೆ ಆದುಲ್ಲೆ.

9ಸಹೋದ್ರ ಪ್ರೀತಿದ ಬಗೆಟ್ ನಿಕ್ಲೆಗ್ ಬರೆಪಿನ ಅಗತ್ಯ ಇಜ್ಜಿ, ಒರಿಯನ್ ಒರಿ ಪ್ರೀತಿ ಮಲ್ಪೊಡು ಪನ್ಪಿನೆನ್ ನಿಕುಲೇ ದೇವೆರೆಡ್ದ್ ಕಲ್ತ್‌ದ್‌ರ್‌.

10ಉಂದೆನ್ ನಿಕುಲು ಇಡೀ ಮಕೆದೋನ್ಯೊಡುಪ್ಪು ಮಾತ ಸಹೋದ್ರೆರೆಗ್ ಮಲ್ಪುನಾಕುಲು ಆದುಲ್ಲರ್. ಆಂಡಲಾ ಸಹೋದ್ರೆರೇ, ನಿಕುಲು ಪ್ರೀತಿಡ್ ನನಲಾ ಬುಲೆವೊಂದು ಬರೊಡು ಅಂದ್‌ದ್ ನಿಕ್ಲೆಡ ಕೇನೊನ್ವ.

11ನಿಕ್ಲೆಗ್ ಅಪ್ಪಣೆ ಕೊರ್ತಿ ಪ್ರಕಾರ, ನನೊರಿಯನ ಕೆಲಸೊಡು ತರೆ ಪಾಡಂದೆ ಶಾಂತೊಡು ಬದ್‌ಕ್‌ದ್ ಸ್ವಂತ ಕೆಲಸೊನು ಮಲ್ತೊಂದು ಉಪ್ಪುನವೇ ಎಡ್ಡೆ.

12ಇಂಚ ಇತ್ತರ್ಡ ನಿಕುಲು ಪಿದಯಿದ ಜನೊಕುಲೆ ಎದುರುಡು ಮರ್ಯಾದಿಡ್ ನಡತೊಂದುಪ್ಪುವರ್, ನಿಕ್ಲೆಗ್ ಒಯಿಕ್‌ಲಾ ಕಡಿಮೆ ಆವಂದ್.

13ಸಹೋದ್ರೆರೇ ನಿಕುಲು ಈ ಸತ್ಯೊನು ತೆರಿಯೊನೊಡು, ಸೈತ್ ಪೋತಿನಾಕುಲೆನ ಸಂಗತಿಡ್ ಭರವಸೆದಾಂತಿ ಜನೊಕುಲೆ ಲೆಕ್ಕ ದುಃಖ ಮಲ್ಪೊಡ್ಚಿ.

14ಯೇಸು ಸೈತ್ ಪೋದು ಲಕ್ಕಿಯೆ ಅಂದ್‌ದ್ ನಮ ನಂಬುವಡ, ಅಂಚೆನೇ ದೇವೆರ್ ಯೇಸುಡೊಪ್ಪ ಇತ್ತಿನಾಕುಲು ಸೈತ್ ಪೋಯೆರ್ಡಲಾ ಅಕ್ಲೆನ್ ಲೆತ್ತೊಂದು ಬರುವೆ ಪನ್ಪಿ ವಿಷಯೊನ್ಲಾ ನಂಬೊಡು.

15ಎಂಕುಲು ಕರ್ತವ ಪಾತೆರದ ಆಧಾರೊಡು ನಿಕ್ಲೆಗ್ ಬೋಧನೆ ಕೊರ್ಪಿನಿ ದಾನೆ ಪಂಡ ಕರ್ತವೆ ಬನ್ನಮುಟ್ಟ ಜೀವೊಡುಪ್ಪುನಾಕುಲು ಸೈತಿನಾಕುಲೆಡ್ದ್ ದುಂಬು ಏರ್ದ್ ಪೋವಯ.

16ಕರ್ತವೆ ಸ್ವತಃ ಬನ್ನಗ ಮಲ್ಲ ಘೋಷಣೆಡ್ಲಾ ಮುಂದೂತನ ಶಬ್ಧದೊಟ್ಟುಡ್ಲಾ ದೇವೆರೆ ತುತೂರಿದ ಸ್ವರತ್ತ ಒಟ್ಟುಗು ಬಾನೊಡ್ದು ಜತ್ತ್‌ದ್ ಬರುವೆ, ಅಪಗ ಕ್ರಿಸ್ತಗಾದ್ ಸೈದಿನಾಕುಲು ದುಂಬತ್ತ ಲಕ್ಕುವೆರ್.

17ಜೀವೊಡುಪ್ಪು ನಮಲಾ ಅಕ್ಲೆಡೊಪ್ಪ ಒಟ್ಟುಗು ಮುಗಲ್‌ದ ಮದ್ಯೊಡು, ಬಾನೊಡು ಕರ್ತವನ್ ಎದುಕೊನಿಯೆರೆ ದೆರ್ತಿನಾಕುಲಾದುಪ್ಪುವ, ಬೊಕ್ಕ ನಮ ಏಪಲಾ ಕರ್ತವಡೊಪ್ಪ ಉಪ್ಪುವ.

18ಅಂಚಾಯಿನೆಡ್ದ್ ಈ ಪಾತೆರೊಲೆಡ್ದ್ ಒರಿಯನ್ ಒರಿ ಉಮೇದ್ ಕೊರ್ಲೆ.

← Chapter 3 Jump to: Chapter 5 →