Revelation 15

Xhosa 2024 (ITestamente Entsha)

← Chapter 14 Jump to: Chapter 16 →

1Ndabona ezulwini omnye umqondiso omkhulu, ongummangaliso; izithunywa zezulu ezisixhenxe zinazo izibetho ezisixhenxe zokugqibela; ngokuba izalisekile ingqumbo kaThixo ngazo.

2Ndabona ngathi lulwandle lwegilasi, luphithikezene nomlilo; bathi abo baloyisayo irhamncwa, nomfanekiselo walo, naphezu kophawu lwalo, naphezu kwenani legama lalo, bemi phezu kolwandle lwegilasi; enemirhubhe kaThixo.

3Bayivuma ingoma kaMoses, umkhonzi kaThixo, nengoma yeMvana, besithi: Mikhulu, ingummangaliso imisebenzi yakho, Nkosi, Thixo Somandla; zinobulungisa, ziyinyaniso iindlela zakho, Kumkani wenceba.

4Ngubani na ongekhe akoyike, Yehova, Angalizukisi igama lakho? Ngokuba nguwe wedwa ongcwele; ngokuba zonke iintlanga ziya kuza ziqubude phambi kwakho; ngokuba ibonakalisiwe imigwebo yakho.

5Ndaza emva koko ndabona, nantso ivuliwe itempile yomnquba wobungqina emazulwini.

6Zaphuma ke etempileni izithunywa zezulu ezisixhenxe, zinezibetho ezisixhenxe, zambethe ilinen emhlophe eqaqambileyo, ziyibhinqile ezifubeni imibhinqo yegolide.

7Yathi enye kuzo izinto eziphilileyo zone, yazinika izithunywa ezisixhenxe iingqayi zegolide ezisixhenxe, zizele ngumsindo kaThixo, odla ubomi kuse emaphakadeni asemaphakadeni.

8Yazala itempile ngumsi ophuma ebuqaqawulini bukaThixo, nasemandleni akhe; akwabakho namnye unako ukungena etempileni, zada zazaliseka izibetho ezisixhenxe zezithunywa zosixhenxe.

← Chapter 14 Jump to: Chapter 16 →