2 John 1

Ahirani (आहिराणी नवा करार) - No Year

Jump to:

1मी, मंडळी ना वरिष्ठ होवा मुळे ती निवाळेल प्रिय स्त्री आणि तीना पोरस्ना नाव वर जेस्ना वर मी खरा-खरा प्रेम ठेवस. आणि फक्त मीच नई, पण त्या सर्वा जेस्ले सत्य माहिती शे, तुना संगे प्रेम ठेवतस,

2कारण कि तो सत्य आमना मा सदा वास करस आणि कायम आमना संगे राहीन.

3परमेश्वर बाप, आणि तेना पुत्र येशु ख्रिस्त नि कृपा, दया आणि शांती, आमना संगे प्रेम आणि सत्य मा बनेल ऱ्हावो.

4मी हय जानीसन गैरा खुश हुयणु, कि तुना काही पोर त्या आदन्या प्रमाणे सत्य वर चालतस, जी परमेश्वर आमना बाप कळून आमले भेटेल होती.

5आते ओ प्रिय स्त्री, मी तुले कोणती नवी आदन्या नई देस, पण हय तीच आदन्या जी आमना कळे सुरुवात पासून होती, कि आमी सर्वा एक दुसरा वर प्रेम करूत.

6आणि प्रेम हवू शे कि आमी परमेश्वर नि आदन्या ले मानीसन जीवन जगुत. हय तीच आदन्या शे, जी तुमनी सुरुवात पासून आयकेल शे कि तुमी सर्वा प्रेम कण राहोत.

7मी तुमले ह्या सर्वा गोष्टी एनासाठे आठवण करावस कारण कि कितलाक असा भ्रम मा टाकणार प्रत्येक जागा वर पसरी जायेल शेतस, ज्या हय नई मानतस, कि येशु ख्रिस्त देह रूप मा उना. असा माणुस भ्रम मा टाकणार आणि ख्रिस्त ना विरोधी शे.

8आपला विषय मा सावधान राहा, तव तुमी तेले नई दवाळाव जेना साठे आमनी कष्ट करेल शे, पण तुमले तेना पूर्ण प्रतीफय भेटीन.

9जो कोणी ख्रिस्त नि शिक्षा मा बनेल नई ऱ्हास, पण तेना तून बाहेर निघत जास, तेन नात परमेश्वर ना संगे नई शे. पण जो कोणी तेनी शिक्षा मा बनेल ऱ्हास, तेन नात बाप आणि पुत्र दोनीस संगे शे.

10कदी कोणी तुमना जोळे एस, आणि ख्रिस्त नि शिक्षा नई पण काही दुसर शिकाळस, तेले नईत घर मा येवू द्या, आणि नई तेना स्वागत करा.

11कारण कि जो कोणी असा झन ना स्वागत करस, तो तेना वाईट कामस्मा तेना भागी शे.

12मले तुमले गैर काही सांगण शे, पण मनी हय ईच्छा नई शे कि तेस्ले ह्या प्रमाणे पत्र मा लिखू, मनी आशा शे कि मी तुमना जोळे एसू, आणि समोरा समोर गोष्टी करसू, कि आमी पुरा खुश हुई जावोत.

13तुनी प्रिय बहिण ना पोर जिले परमेश्वर नि निवाळेल शे, तेस्ना कळून तुमले नमस्कार.

Jump to: