2 Peter 3

Ahirani (आहिराणी नवा करार) - No Year

← Chapter 2 Jump to:

1ओ प्रिय विश्वासीसहोण, आते मी तुमले दुसरा सावा पत्र लिखस, मी दोनी पत्रस्मा तुमले त्या गोष्टीस्ले आठवण देवाळीसन चांगल्या प्रकारे विचार करासाठे प्रोत्साहित कराना प्रयत्न करी ऱ्हायनु, जे तुमी पहिलेच शिकी जायेल शेतस.

2मी अस एनासाठे करी ऱ्हायनु कारण कि मनी ईच्छा शे कि ज्या गोष्टी परमेश्वर ना भविष्यवक्तास्नी पहिले पासून सांगेल शेतस, आणि प्रेषितस्नी ईसन आमना तारणार प्रभु येशु ख्रिस्त नि शिक्षा ना बारामा शिकाळेल शे, तुमी त्या गोष्टीस्ले आठवण ठेवी सकोत.

3सर्वास्तून महत्वा नि गोष्ट तुमी समजी ल्या, कि आखरी दिनस्मा ख्रिस्त ना येवाना पहिले, असा लोक येतीन ज्या आपलीच वाईट वासनास्ना नुसार जीवन जगतीन, आणि तुमना ह्या विश्वास मुळे कि ख्रिस्त परत येणार शे, त्या लोक तुमनी मजाक उडावतीन.

4आणि त्या सांगतीन, तेनी परत येवानी प्रतिज्ञा खरी नई शे, तो नई येणार. कारण कि ज्या आमना पहिले पुढारी होतात त्या सर्वा मरी जायेल शेतस, तरी बी आते लगून काहीच नई बदलन. जव पासून परमेश्वर नि सृष्टी नि निर्मिती करी तव पासून सर्वा गोष्टी तसाच चालत ईऱ्हायनात.

5त्या त जानी बुजीसन हय सत्य ले ईसरी जायेल शेतस कि सृष्टी नि सुरुवात मा परमेश्वर नि शब्द सांग आणि आकाश नि निर्मिती हुईनी. तेनाच शब्द ना द्वारे पृथ्वी पाणी मधून बाहेर निघीसन पाणीमाच स्थिर शे.

6आणि त्या टाईम ना संसार बी पाणी मा नष्ट हुईग्या, कारण कि परमेश्वर नि मोठा पावूस धाळा आणि प्रलय नि पृथ्वी ले आणि तेनावर ना सर्वा जित्ता प्राणीस्ले नाश करी टाक.

7परमेश्वर नि त्याच आदेश ना द्वारे वर्तमान आकाश आणि पृथ्वी ले आग ना व्दारे नाश करासाठे ठीई राखेल शे. तेनी तेस्ले एनासाठे राखी ठीयेल शे कि ज्या तेनी आदन्यास्ना पालन नई करतस, तेस्ले तो न्याय ना दिन नाश करीन.

8ओ प्रिय विश्वासीसहोण, आते जी गोष्ट मी तुमले सांगाले जाईऱ्हायनु तेना कळे दुर्लक्ष नका करा. परमेश्वर ना साठे एक दिन एक हजार साल ना सारखा शे, आणि एक हजार साल एक दिन ना सारखा शे. तेना साठे एक दिन आणि एक हजार साल सर्वा एकसारखा शेतस.

9काही लोक असा विचार करतस कि प्रभु आपला परत येवाना करार ना विषय मा उशीर करी ऱ्हायना. तव प्रभु त्या प्रमाणे उशीर नई करी ऱ्हायना, पण तो तुमना विषय मा धीर धरस, कारण कि तेनी ईच्छा नई कि कोणी बी नाश होवो. पण तेनी ईच्छा शे कि सर्वा आपला मन ले परिवर्तीत करोत, वाईट कामस्ले कराना सोळोत आणि तेना जोळे येवोत.

10पण ख्रिस्त निश्चितच परत ईन. तो चोर ना सारखा अचानक ईपळीन. त्या टाईम ले आकाश मोठा नाद करत नष्ट हुई जाईन. आणि जे काही आकाश मा शे, सूर्य, चांद आणि तारा सर्व काही आग ना द्वारे नष्ट करामा ईन. त्या दिन परमेश्वर सर्वा लोकस्ना पृथ्वी वर करेल कामस्ले प्रगट करीन आणि सर्वास्ना न्याय करीन.

11त जव कि परमेश्वर ह्या सर्व्या वस्तूस्ना नाश करणारच शे, त निश्चितच तुमनी वागणूक पवित्र व भक्ती परमेश्वर ले खुश करणारी पाहिजे.

12जव तुमी त्या दिन नि वाट देखतस, कि परमेश्वर संसार ना लोकस्ना न्याय करासाठे ईन. त प्रयत्न करा कि तो दिन जल्दी ईपळो. त्या दिन आकाश आग कण नाश करामा ईन, आणि त्या आग नि गर्मी कण आकाश ना सर्वा तत्व पिघई जातीन.

13पण आमी विश्वासी परमेश्वर ना करार करेल नवा आकाश आणि नवी पृथ्वी नि वाट देखतस, जठे फक्त धर्मी लोकच ऱ्हातीन.

14एनासाठे ओ प्रिय विश्वासीसहोण, जसा कि तुमी त्या परमेश्वर ना न्याय ना दिन नि वाट देखी ऱ्हायनात, त प्रयत्न करत राहा कि तुमी प्रभु नि नजर मा निर्दोष आणि निष्कलंक ठरोत, आणि तेना संगे तुमले शांती भेटो.

15आमना प्रभु ना धीर ना विषय मा विचार करा, जसा तो तुमले संधी देस कि तुमी येणारा न्याय पासून वाची सकोत. जसा कि आमना प्रिय विश्वासी भावू पौल त्या ज्ञान ना नुसार जो तेले परमेश्वर पासून भेटणा, तुमले पत्र मा लिखेल शे.

16तेनी आपला सर्वा पत्रस्मा ज्या तेनी विश्वासीस्ले लिखात, तसाच गोष्टी लिखेल शेतस ज्या तेनी तुमले लिखेल शे. पण तेस्ना मधून काही गोष्टी ज्या तेनी आपला पत्रस्मा लिखेल शे समजा साठे कठीण शे. आणि त्या लोक ज्या अज्ञानी शेतस आणि जेस्ले आपला विश्वास ना बारामा माहिती नई, ह्या कठीण गोष्टस्ना अर्थ चुकीना सांगतस, तसाच जसा कि त्या परमेश्वर ना पुस्तक ना गोष्टीस्ना अर्थ चुकीना सांगतस. अस करीसन त्या स्वताच आपला नाश ना कारण बनतस.

17ओ प्रिय विश्वासीसहोण, तुमले पहिले पासून माहिती शे कि ह्या सर्वा गोष्टी होणार शेतस. एनासाठे, सावधान राहा, कि त्या लोक ज्या नियमस्ना पालन नई करतस, त्या तुमले आपल्या खोट्या गोष्टीस्कन बहिकाळीसन विश्वास पासून भटकाळी नई देवो.

18पण येणा सारखा जीवन जगा, कि तुमी आमना तारणारा येशु ख्रिस्त तुमना साठे आजून जास्तीत जास्त कृपा कण कार्य करो, आणि हय कि तुमी तेले आजून जास्त चांगला प्रकारे ओयखी सकोत. तेनी महिमा आते आणि युगानयुग होत राहो. आमेन.

← Chapter 2 Jump to:

Recommended Reading

Commentary 2 Peter Commentaries → Devotional 2 Peter Devotional Guide → Get This Bible Ahirani (आहिराणी नवा करार) - No Year Study Bible →