3 John 1

Ahirani (आहिराणी नवा करार) - No Year

Jump to:

1मी वरिष्ठ हय पत्र प्रिय गायस ना नाव वर लिखस जेस्ना शी मी खरा प्रेम ठेवस.

2ओ मना प्रिय मित्र, मी हय प्रार्थना करस कि जसा तू आत्मिक उन्नती करी ऱ्हायना, तसाच तू सर्व्या गोष्टीस्मा उन्नती करो, आणि बरा चांगला राहो.

3मी गैरा खुश हुयणु जव काही विश्वासी भावूस्नी तुना त्या सत्य नि साक्ष दिधी, जेनावर तू खरज चालस.

4मले एनातून जास्त कोणतीच खुशी नई कि मी आयकू, कि मना पोर सत्य प्रमाणे चालत राहा.

5ओ प्रिय मित्र, तू त्या कामस्मा गैरा विश्वास योग्य शे जे तू आपला विश्वासी भावूस साठे करस जेस्ले तू वयखत बी नई.

6तेस्नी आठे मंडळी ना समोर तुना चांगला व्यवहार ना बारामा साक्ष दियेल शे, कृपा करीसन तेस्ना प्रवास ना साठे असा नियोजन कर मदत कर जेना कण परमेश्वर खुश होवो.

7कारण कि त्या ख्रिस्त ना त्या नाव ना प्रचार ना साठे निघेल शेतस, आणि दुसऱ्या जात वाला कळून काही मदत नई लेतस.

8तव आमी ख्रिस्ती विश्वासीस्नी ह्या लोकस्नी मदत कराले पाहिजे, एनासाठे कि आमी बी सत्य ना पक्ष मा तेस्ना सहकारी बनोत.

9मी मंडळी ले एक पत्र लिखेल होतु, पण दियत्रीफेस जो तेस्ना पुढारी होवाना देखत होता, आमले स्वीकार नई करत.

10एनासाठे जव मी एसू, त मी तेना कामस्नी ज्या तो करी ऱ्हायना पुरी मंडळी ना लोकस समोर आठवण देवाळसु. कि तो आमना बारामा वाईट-वाईट आणि खोट्या गोष्टी सांगस, तो नईत फक्त आमनी बदनामी करस. पण तो स्वता भावू-बहिण ना सत्कार करान नई देखस आणि ज्या लोक असा करान देखतस, तो तेस्ले रोकस आणि मंडळी मधून काळी टाकस.

11ओ प्रिय मित्र, वाईट ना अनुसरण नको करू, पण चांगला ना अनुसरण कर. जो कोणी चांगल करस, तो परमेश्वर कळून शे, पण जो कोणी वाईट करस, तेनी परमेश्वर ले नई जान.

12देमेत्रिया ना बारमा सर्वा लोक ख्रिस्त मी मंडळी मा चांगली साक्ष देतस, कि तो सत्य ना नुसार जीवन जगस, आणि आमी बी तेना बारामा हईच साक्ष देतस, आणि तुले माहिती शे कि आमनी साक्ष खरी शे.

13मले तुमले गैर काही सांगण शे, पण मनी हय ईच्छा नई शे कि तेस्ले ह्या प्रमाणे पत्र मा लिखू.

14पण मले आशा शे, कि मी तुमना जोळे एसू, आणि आमी समोरा समोर गोष्टी करसू.

15तुमले शांती भेटो. तुमना सर्वा मित्र तुमले नमस्कार सांगतस. आमना सर्वा मित्रस्ले व्यक्तिगत नमस्कार करज्यात.

Jump to: